“Ang Bisita sa Panihapon,” Higala, Septiyembre 2023, 12–13.
Ang Bisita sa Panihapon
Si Johne naghinamhinam nga makat-on mahitungod sa laing Apostol.
Kini nga istorya nahitabo sa Guam.
Si Johne nagtan-aw sa nagsagop niya nga mama nga nag-andam sa lamesa. Iyang gipapilit ang litrato ni Elder Dieter F. Uchtdorf ngadto sa subra nga lingkoranan, kauban sa karton nga litrato sa usa ka eroplano.
“Oras na sa panihapon!” Mitawag si Mama.
Ang sinagop nga igsoong babaye ni Johne,si Lydia, miambak gikan sa sopa. “Gigutom kaayo ko!”
“Ako sab,” miingon si Johne.
Gitulod ni Mama ang wheelchair ni Johne padulong sa lamesa ug milingkod tupad niya. Si Papa ug si Lydia milingkod usab sa lamesa. Ganahan si Johne kon silang tanan anaa sa balay alang sa panihapon.
Si Papa ang nag-ampo sa pagkaon, ug si Mama mitunol sa manok ug kan-on. “Magkat-on kita mahitungod sa usa sa Apostoles karong gabhiona,” siya miingon. Gitudlo niya ang litrato nga diha sa lingkoranan. “Duna bay nakaila kinsa siya?”
“Si Elder Uchtdorf kana,” miingon si Johne.
Mitando si Papa. “Akong gipili siya nga maoy bisita karong gabhiona.”
“Makapili ko ugma?” Nangutana si Lydia.
“Sige ba,” miingon si Mama.
Si Johne naghinamhinam nga makat-on mahitungod ni Elder Uchtdorf. Mga duha ka semana na lang sa dili pa ang kinatibuk-ang komperensiya ug ang pamilyang nagsagop ni Johne adunay nindot nga tradisyon sa pagpangandam alang niini. Matag gabii, sila magpili og usa ka Apostol nga kat-onan. Si Mama mopapilit sa litrato sa Apostol ngadto sa lingkoranan. Dayon siya mosulti og mga impormasyon sa pamilya mahitungod kaniya ug mga istorya sa iyang pagkabata.
“Unsay inyong nahibaloan bahin ni Elder Uchtdorf?” Nangutana si Papa.
“Oh, nakahibalo ko!” Miingon si Lydia. “Siya mopalupad og eroplano!” Gitudlo niya ang litrato sa eroplano diha sa lingkoranan.
“Husto kana,” miingon si Mama. “Sa wala pa siya tawaga isip usa ka Apostol, siya usa ka piloto sa eroplano sa Germany.”
Si Johne mipalupadlupad sa iyang kamot ug mihimo og tingog sama sa eroplano. “Fwoosh!”
“Si Elder Uchtdorf miapil sa Simbahan sa dihang siya usa pa ka bata,” miingon si Papa. “Sama sa imong gibuhat, Johne.”
Si Johne mitan-aw sa litrato. Lisod hunahunaon nga si Elder Uchtdorf usa ka bata sama kaniya!
“Ug siya adunay espesyal nga trabaho sa simbahan ma-Dominggo,” miingon si Mama. “Ang organ kinahanglan nga pahanginan aron motukar. Atol sa mga kanta, siya mitabang sa pagbomba og hangin aron ang organ motukar sa mga himno.”
“Sigurado lisod kadto nga trabaho,” miingon si Papa. “Apan siya ganahan og musika. Ang iyang paborito nga kanta mao ang ‘Si Jesus Buot nga Ako Mahimong Bidlisiw.’”
Mipahiyom si Lydia. “Kana sad ang akong paborito nga kanta!”
“Si Elder Uchtdorf daghan og kapareha nato,” miingon si Mama. “Ug sa pipila na lang ka semana, makapaminaw kita kaniya nga mamulong sa tibuok Simbahan. Mopakigbahin siya og mensahe nga gusto ni Jesukristo nga madunggan natong tanan!”
Human sa panihapon, si Mama mitangtang sa litrato nga diha sa lingkoranan. Gipapilit niya kini sa bongbong tupad sa mga litrato sa ubang Apostoles. Ilang ibilin ang mga litrato diha hangtod sa kinatibuk-ang komperensiya aron matabangan sila nga makaila sa mga mamumulong.
Si Johne mitabang ni Papa sa mga plato. Si Papa mihugas niini, ug si Johne ang mipauga niini. Samtang siya mitrabaho, siya mipahiyom sa mga litrato nga diha sa bongbong.
Si Johne ganahan nga makat-on mahitungod sa Apostoles! Naghinamhinam na siya nga maminaw kanila sa komperensiya.
Paghulagway pinaagi ni Brooke Smart