Ang Leksiyon sa Lapis

Ni Sister Tracy Y. Browning

Ikaduhang Magtatambag sa Kinatibuk-ang Kapangulohan sa Primary

Gikan sa usa ka interbiyo ni Lori Fuller Sosa.

Kausa mibisita ko sa mga bata sa Primary sa Jamaica. Gihangyo nako sila sa pagdrowing og litrato sa butang nga ilang mabuhat nianang semanaha sa pagpakita sa Langitnong Amahan nga sila nahigugma Kaniya. Duha ka batang babaye naglingkod duol sa usag usa.

Ang mas manghod nga batang babaye adunay gamay kaayo nga lapis nga walay papas. Naglisod siya sa pagdrowing sa iyang litrato. Ang mas magulang nga batang babaye nakamatikod nga ang mas manghod nga batang babaye nagkinahanglan og tabang. Iyang gitunol ang iyang kaugalingong lapis ngadto kaniya. Ang mas manghod nga batang babaye mipahiyom, midawat sa lapis, ug nagsugod sa pagdrowing.

Gibantayan nako ang mas magulang nga batang babaye nga mapailubong naghulat samtang ang mas manghod nga batang babaye mihuman sa iyang drowing. Dayon ang mas manghod nga batang babaye miuli sa lapis. Nagpulipuli sila sa paggamit sa lapis nga wala mosulti og bisan unsa nga mga pulong. Ang mas magulang nga batang babaye andam nga motabang, ug ang mas manghod nga batang babaye mapasalamaton kaayo ug midawat niana nga tabang. Nasayod sila nga sila makasalig sa usag usa.

Sa dihang ang tanan nahuman na sa ilang mga drowing, gisultihan nako ang mas magulang nga batang babaye nga ako nakakita niya nga mipahulam sa iyang lapis. Nangutana ko, “Nganong gibuhat nimo kadto?”

Miingon siya, “Nakita nako nga nagkinahanglan siya og tabang.”

Dayon gipangutana nako ang mas manghod nga batang babaye, “Unsay imong gibati sa dihang siya mitabang nimo?”

Miingon siya, “Mapasalamaton kaayo ko!” Nindot kaayo kadto.

Usahay maghunahuna ta unsaon sa pagtuman sa atong mga pakigsaad. Tingali nagtuo ta nga kini usa ka dako, komplikado nga butang. Apan kini dili! Nakakita ko og usa ka bata nga nagtudlo nako unsaon sa pagtuman sa mga pakigsaad pinaagi sa pagtabang sa uban nga nanginahanglan.

Mopamatuod ko nga samtang buhaton ninyo kadtong yanong mga butang sa pagtabang ug pagserbisyo sa uban, nagtuman kamo sa inyong mga pakigsaad. Ug kon kita motuman sa atong mga pakigsaad, mabati nato ang gahom sa Dios sa atong mga kinabuhi.