“Ang Labing Nindot nga Regalo,” Higala, Septiyembre 2023, 28–29.
Ang Labing Nindot nga Regalo
Unsa ang labing ganahan ni Papa alang sa iyang birthday?
Kini nga istorya nahitabo sa USA.
Naghinamhinam na si Josiah. Birthday karon ni Papa! Gibutangan ni Mama og mabulokong mga banderita ang kusina. Mihimo usab siya og espesyal nga cake.
“Hatagan usab nato siya og mga regalo,” miingon si Josiah.
“Oo!” miingon ang iyang manghod, si Madeline. “Apan unsa kaha?”
“Duna koy ideya.” Miadto si Josiah sa balay silonganan. Mikuha siya og pipila ka pirasong kahoy ug iya kining gipapilit aron maporma og gamay kaayong bangko.
“Nangutlo ko og pipila ka bulak para ni Papa gikan sa iyang garden!” Giisa pataas ni Madeline ang mga bulak. “Ganahan kaha siya ani?”
Oo, miyango si Josiah. “Mahinamon kaayo ko nga iya nang makita ang mga regalo!”
Niana nga hapon, si Josiah ug Madeline mikanta sa “Happy Birthday” ug nangaon sa cake uban ni Papa.
“Oras na para sa mga regalo!” Miingon si Josiah. Gihatag niya kang Papa ang iyang regalo.
Gitangtang ni Papa ang putos nga papel. “Wow! Kanindot sa imong nahimo. Salamat!” Gigakos ni Papa si Josiah.
Dayon gihatag ni Madeline kang Papa ang mga bulak.
“Salamat kaayo!” Mipahiyom si Papa. “Pagkatahom niini.”
Sa wala madugay oras na sa pagpanglimpyo. “Josiah, pweding motabang ka og limpyo sa lamesa?” Mihangyo si Mama.
“Oo,” miingon si Josiah. Mipahiyom siya ug gidala ang mga plato ngadto sa lababo.
“Pwede pod kong motabang,” miingon si Madeline.
Mipahiyom og dako si Papa. “Mobati ko og dakong kalipay kon motabang mo ug magbinuotan sa usag usa. Nasayod ko nga malipay usab si Jesus. Mao kana ang labing nindot nga regalo sa tanan!”
Sa wala madugay si Josiah ug Madeline nagdula sa ilang mga dulaanan. Si Josiah mihimo og taas nga tore gamit ang mga bilding block. Hapit na kini moparehas kaniya ang katas-on! Apan nabungkag kini ni Madeline.
“Ay!” Miingon si Josiah. “Gibungkag nimo ang akong tore!” Mikuha siya og dulaan gikan ni Madeline.
“Akoa man na!” Misiyagit si Madeline.
Miduol si Papa. Nagmug-ot siya. Iya silang gipahinumdoman nga magpulipuli sa ilang mga dulaan.
Dihang mibiya na si Papa, nangutana si Josiah, “Nakita ba nimo ang nawong ni Papa? Nagguol siya.”
“Nganong nagguol siya?” nangutana si Madeline.
“Miingon siya nga ang labing nindot nga regalo mao nga kita magbinuotan,” miingon si Josiah. “Apan gikalimtan nato.”
“Mao ba.” Miduko si Madeline sa salog. “Pasayloa ko sa pagbungkag sa imong tore.”
“OK ra,” miingon si Josiah. “Pasayloa ko sa akong pagkasuko. Magbinuotan ta hangtod matapos ang adlaw.”
“Apan unsa kaha kon makalimot ta?” Nangutana si Madeline.
“Nan, mangayo ta og pasaylo ug maningkamot na usab nga magminaayo,” miingon si Josiah.
Gilimpyohan ni Josiah ug Madeline ang mga bloke. Dayon nagdula sila og bag-ong dula. Dihang miagi si Papa, mipahiyom siya.
“Tingali milampos ta!” Mihunghong si Madeline kang Josiah. “Nahatagan nato si Papa og talagsaon nga regalo!”
Mipahiyom si Josiah. “Oo, mao gyod. Ug regalo usab kini alang kang Jesus!”
Mga paghulagway pinaagi ni Jeff Harvey