Pagpanganta sa Dominggo

Ni Joel B. Randall

(Gibase sa usa ka tinuod nga istorya)

Dili man niana ka ngil-ad kon si Alejandra makapalta sa simbahan bisan og kausa, di ba?

Kini nga istorya nahitabo sa Guatemala.

Nanghupaw si Alejandra. Bag-o lang gyod siya nahuman sa pagkanta sa iyang solo diha sa kwarto sa musika alang sa iyang magtutudlo. Ang iyang tanang mga semana sa pagbansay nahimong bililhon! Wala gani siya maglisod sa lisod nga bahin.

“Pagkanindot nga tingog!” Si Ms. Pérez, ang magtutudlo sa musika sa eskwelahan, mibarog ug mipakpak. “Mahimo ka nang mobalhin ngadto sa sunod nga hugna sa sangka sa talento.”

Naghinamhinam si Alejandra! Niini nga sangka, ang mga estudyante gikan sa daghang eskwelahan mokanta, mosayaw, o mopatukar og instrumento sa pag-indigay ug modaog og premyo. Si Ms. Pérez mao ang mohukom kinsa ang pilion nga magpabilin diha sa sangka. Ug karon si Alejandra nakapasar sa sunod nga hugna!

“Kinahanglan kang makapasar og duha pa ka hugna sa mga awdisyon,” miingon si Ms. Pérez. “Kon makapasar ka, makasulod ka sa kataposan nga sangka. Sa Domingo kini sa ulahing bahin niining bulana.”

Ang kalipay ni Alejandra kalit nga nawala sama sa pag-abot niini. Gibati niya nga adunay nakapabug-at sa iyang tiyan.

Nasayod siya nga ang Dominggo mao ang adlaw nga moadto sa simbahan ug magkat-on mahitungod ni Jesukristo. Adlaw kini nga moambit sa sakramento. Adlaw kini sa pagpahulay ug makig-uban sa pamilya.

“Dominggo?” nangutana siya. “Wala ko kahibalo kon makahimo ba ko.”

“Kon ikaw dili makaadto sa kataposang adlaw, nan ikaw dili makaapil sa sangka. Nasayod ko nga maayo ang imong mahimo kon ikaw moapil, apan imoha kana nga pagpili. Hunahunaa kana karong kataposan sa semana ug pahibaloa ko sa Lunes.”

Pagkasunod adlaw, si Alejandra nagsige og hunahuna unsay buhaton. Kanunay siyang moadto sa simbahan uban sa iyang pamilya. Apan kinahanglan ba gayod nga moadto kada semana? Dili man niana kangil-ad kon siya makapalta sa simbahan bisan kausa, dili ba?

Sa oras sa pagpangatulog nakigsulti siya ni Papa mahitungod sa unsay iyang buhaton. “Mokanta ba ko sa sangka o mosimba?” nangutana siya.

“Ang Igpapahulay mao ang usa ka adlaw nga atong ihatag ngadto sa Dios.” Gibira ni Papá ang habol hangtod sa iyang suwang ug milingkod tupad niya sa higdaanan. “Kita adunay unom ka adlaw alang sa atong kaugalinon. Ang Dios nangayo lang og usa ka adlaw. Apan ako dili makahimo niini nga pagpili alang nimo.”

Pagkasunod adlaw didto sa simbahan, si Alejandra ug ang iyang tanang mga higala sa Primary mikanta sa “Ampo sa usa ka Bata” sa atubangan sa tibuok ward. Nagbansay na sila niini nga kanta sulod sa dugay nang panahon!

Si Alejandra mikanta sa iyang tibuok kasingkasing. Ang musika nakapalimot niya sa malisod nga desisyon nga kinahanglan niyang himoon ugma. Sa dihang nahuman na ang kanta, mapagarbohon siyang mibalik sa paglingkod tupad sa iyang pamilya.

Si Mamá migakos niya. “Nindot kaayo nimo pagkakanta!”

“Mapagarbohon kaayo kami kanimo,” miingon si Papa. “Ang pagpakigbahin sa imong talento nagpakita sa imong pagpamatuod ug hugot nga pagtuo sa Dios.”

Nalipay si Alejandra nga mogamit sa iyang mga talento sa pagkanta sa mga kanta sa Primary. Nasayod siya nga kini nakapalipay usab sa iyang pamilya.

Dayon si Alejandra adunay gihunahuna. Kon karon mao pa ang sangka, nakapalta unta siya sa kahigayonan sa pagkanta mahitungod sa Langitnong Amahan. Unsa unta ang mawala niya kon wala pa siya mosimba sa adlaw sa sangka? Wala unta siya makakanta sa iyang pagpamatuod diha sa Primary uban sa iyang mga higala. Ug makapalta unta siya sa sakramento.

Pagka Lunes, si Alejandra nasayod na unsay iyang buhaton. Miadto siya sa kwarto sa musika aron makigsulti sa iyang magtutudlo.

“Salamat sa oportunidad,” miingon siya. “Apan dili ko makaadto sa sangka sa talento kon buhaton nako kana sa Dominggo.”

Si Ms. Pérez mibutang sa panid sa musika nga iyang gitan-aw ug nagmug-ot. “Sigurado ka ba nga dili moapil sa sangka?”

“Oo, sigurado ko.” Si Alejandra mapagarbohon sa iyang desisyon. Lisod kadto nga buhaton, apan siya nasayod nga mao kadto ang sakto nga desisyon. “Mas mawala nako ang mas importante kon ako moadto.”

Paghulagway pinaagi ni Janelle Anderson