“Faalogo i le Perofeta,” Uo, Oke. 2023, 4–5.

Faalogo i le Perofeta

Saunia e Carolina Marín

(E faavae i se tala moni)

Sa fiafia lava Francesco e faalogologo atu ia Peresitene Nelson.

O lenei tala sa tupu i Atenitina.

A young boy named Francesco looks out a window of his house. A produce truck is passing by with loudspeaker. There is a large amount of produce like pumpkins, bananas, tomatos, apples, and peppers in the back of the truck. Spot illustration of a family is sitting in their home enjoying a treat while watching General Conference.

Sa saofai Francesco i luga o le sofa i autafa o le faamalama. Sa ia lainaina ana taavale meataalo i luga o le faamalama.

“Taimi e faitau ai tusitusiga paia,” o le tala lea a Mama. Sa faapotopoto Francesco ma ona uso ma tuafafine i le potu malolo. Sa tatala e Mama lana Tusi a Mamona.

Sa faalogologo Francesco a o faitau e Mama le tala ia Apinati. O ia o se perofeta sa taumafai e aoao tagata. Ae sa latou lei faalogo.

“Pe lei lototoa ea o ia?” Sa fesili atu ai Mama. “Sa i ai sana savali taua mai ia Iesu Keriso e aoao ai tagata. Ma e lei taofia lona taumafai!”

Sa lue atu le ulu o Francesco. Sa ia vaai faalemafaufau ia Apinati o aoao atu tagata.

“E te manatua le mea o le a tupu i le vaiaso a sau?” Sa fesili atu ai Papa.

“Ioe!” Sa nofo sao i luga Francesco. “Konafesi aoao!”

“E sa’o lelei,” na fai atu ai Mama. “I le konafesi aoao e mafai ona tatou faalogo ai i lo tatou perofeta.”

Sa faafuasei ona latou faalogoina se leo mai fafo i le auala tele. “O le asō ua i ai a’u maukeni, pepa ‘ai foliga i logo, ma tamato!” sa valaau mai ai se leo tele.

Sa iloa e Francesco lena leo! O Ramón, o le faatau fualaau aina ma fualaau faisua. O aso uma lava na te aveina atu ai lana loli i le auala, ma ta’u atu i tagata uma ia fualaau aina ma fualaau faisua o loo ia faatauina atu. Sa ia faaaogaina se faaleotele leo ina ia mafai ai e tagata ona lagona mai o ia mai totonu o o latou fale. Ona mafai lea ona latou o i fafo e faatau ni meaai.

“E i ai foi a’u apu ma fa’i tofolelei!” Sa valaau mai ai le leo o Ramón.

Na aumaia e lena mea se manatu ia Francesco. “Mama! O Perofeta ua faapei o ni faaleotele leo!”

“O le a le uiga o lau tala?” o le fesili atu lea a lona tuafafine.

“E faaaoga e Iesu le perofeta e faasoa mai Ana upu, e pei lava ona faaaoga e Ramón le faaleotele leo. O lena auala e mafai ai e tagata uma i le lalolagi ona lagona o Ia!” Sa ataata tele Francesco.

Na mavae atu aso, ma e lei umi ae oo i le taimi mo le konafesi aoao. Sa faatuina e Papa se masini faaali ata [projector] ina ia mafai ona latou matamata ai i le konafesi i luga o le puipui. Sa pei o se fale ata tifaga!

Sa fai e Mama ni kuki sukalati e aai ai a o latou matamata. Sa latou fiafia uma ina ua oo i le taimi e saunoa ai le perofeta.

“Oso i luga o le ala o feagaiga ma tumau ai iina,” na saunoa ai Peresitene Nelson.^*

“Ou te manao e faia le mea lena” na faapea mai ai Francesco. “Ae e faapefea?”

“O lena ua e faia le mea lena.” Sa ataata Papa. “E fe mulimuli ia Iesu Keriso e ala i le papatisoina. Ma i le taimi nei ua mafai ona e tumau i luga o le ala o feagaiga e ala i le taumafai e mulimuli ia te Ia i aso uma.”

Sa ataata Francesco. Sa manao o ia e mulimuli ia Iesu Keriso. Ma e mafai ona ia faia lena mea e ala i le mulimuli i le perofeta!