“Suega a Tasi,“ Uo, Oke. 2023, 40–41.
Suega a Tasi
Sa tatalo Tasi ina ia tauia lana galuega faigata.
O lenei tala sa tupu i Zimbabwe.
Sa manava loloa Tasi a o toe tuuina atu e lona faiaoga i tagata aoga a latou suega. E ui lava sa na o se suega faataitai, ae sa popole o ia i le vaaia o ona togi.
O le tausaga mulimuli lea o le aoga tulagalua a Tasi, ma sa tele ana suega. E ese mai suega i le numera ma le saienisi, sa tatau foi ona ia faia ni suega o le gagana. I Zimbabwe, sa latou aoao ai e tusitusi ma tautatala i le Igilisi ma Shona. O Shona sa sili ona faigata mo Tasi.
“Ia lea, Tasi.” Sa tuuina atu e le faiaoga a Tasi ana togi. Sa lelei lana togi i le numera! Ma e lelei tele i le faaPeretania. Ona vaaia lea e Tasi o ona togi mo le Shona, ma na le lelei ai lana faalogo ma tau faama’ima’i ai. Sa lei lelei lava i lana mataupu lea!
Sa tilotilo Tasi i le eleele i le savaliga atoa i le fale mai le aoga.
“O le a se mea ua tupu?” O le fesili lea a Tina.
“Sa ou maua se togi leaga i lau suega faataitai mo le Shona,” o le tala lea a Tasi. “Sa ou leaga lava i taimi uma i le Shona. Ae faapefea pe afai ou te toilalo i le suega moni?”
Sa saofafai i lalo Tina ma Tasi. Sa tilotilo atu o ia i ona maka. “E foliga mai e te manaomia nisi faataitaiga.”
Sa oi Tasi.
“Ae faapefea pe afai e te faatuina se sini e galue e tusitusi i le Shona?” Na toso mai e Tina le Tusitaiala a Tamaiti a Tasi. Ona ia faitauina lea o le mau o loo i le itulau muamua. “Ma na tuputupu a’e Iesu i le poto ma le tino, ma ua alofagia e le Atua atoa ma tagata.”* Sa ataata atu ia Tasi. “Sa tuputupu ae Iesu i lea taimi mai lea taimi, ma e mafai foi e oe.”
“Ua lelei la,” na fai atu ai Tasi. “E te manatu o le a fesoasoani mai le Tama Faalelagi ia te au?”
“Ou te iloa o le a Ia faia.”
I lena po, sa faia ai e Tasi se tatalo. “Tama Faalelagi pēlē, faamolemole fesoasoani mai ia te au ia pasi lau suega o le Shona. Faamolemole fesoasoani mai ia te au e aoao ma ia ou lelei atili. I le suafa o Iesu Keriso, amene.”
Sa faafetai Tasi ona sa mafai ona ia tatalo mo se fesoasoani. Ae sa ia iloaina e tatau foi ona ia galue malosi. O aso uma lava, e faataitai ai e Tasi ona tusitusi i le Shona. Sa ia maua se fesoasoani faaopoopo mai ona faiaoga. O nisi taimi sa ia moomoo maimau pe ana mafai ona ia taaalo ma ana uo pe fai se isi mea. Ae sa ia taumafai pea.
“Ua tele lou alualu i luma,” o le tala lea a le faiaoga a Tasi.
Sa lagona e Tasi le mitamita ia te ia lava mo le galue malosi.
Na iu ina oo mai le aso o le suega. Sa ia toe faia se isi tatalo se tasi ma ole atu mo le fesoasoani a le Tama Faalelagi.
Sa tuuina atu e le faiaoga ia suega i tagata aoga, ma sa piki i luga e Tasi lana penitala. A o amata ona ia tusitusi, sa ia lagonaina se lagona mafanafana, ma le toafilemu. Sa ia iloaina o le Agaga Paia. Sa faamafanafanaina o ia e le Tama Faalelagi ma fesoasoani ia te ia.
Ina ua uma le suega, sa fiafia Tasi e ta’u atu i ona matua e uiga i le suega. Na te lei iloaina po o le a lana togi, ae sa ia maua se lagona lelei e uiga i ai. Sa ia faia le mea sili na te mafaia.
“Ua ou mitamita lava ia te oe,” na fai atu ai Tina.
“Faafetai!” Sa ataata Tasi ma toso mai i fafo lana Tusitaiala a Tamaiti e toe faitau ai le mau. Ae sa ia suia sina vaega itiiti se tasi. “Ma na tuputupu a’e Tasi i le poto ma le tino, ma ua alofagia e le Atua atoa ma tagata.”
O ata na tusia e Pauline Gregory