“Sa Silafia e Tama Faalelagi,” Uo, Oke. 2023, 28–29.
Sa Silafia e le Tama Faalelagi
Aisea o le a latou manaomia ai le anoanoai o talifofoga?
O lenei tala sa tupu i Filipaina.
Sa faalogo Spencer o tatala mai le faitotoa. Ua sau lona tama i le fale! Sa tumu lima o Tama i meaai mai le faleoloa.
Sa tuu i lalo e Tama ia ato ma fusi atu ia Spencer. “Ua ou fiafia e vaai ia te oe.”
Sa tusi atu Tina i se pusa lapoa na aumai e Tama. “O le a lena mea?”
“Sa ou vaaia se atigipusa o talifofoga i le pa’ū,” o le tala lea a Tama. “Sa ou maua se lagona e mafai ona tatou faaaogaina.”
Sa lē mautonu Spencer. Aisea o le a latou manaomia ai le anoanoai o talifofoga i le taimi nei?
I se vaiaso mulimuli ane, na sau ai Spencer i le fale mai le aoga ma ona tei. Ina ua latou o atu i totonu, sa faatulagaina e Tina ia faaputuga mea i luga o le fata.
“Tina, o a au mea o fai?” O le fesili lea a le uso o Spencer.
“O loo ou suiina sapalai mai a tatou ato mo faalavelave faafuasei,” o le tala lea a Tina. “Sa ou vaai i ai nei i luga o le fata ma manatu ai e tatau ona ou siakia. O lenei meaai ua toeitiiti lima tausaga le umi! E mafai ona e fesoasoani mai ia te a’u?”
Sa fesoasoani Spencer ma ona tei ia Tina e tuu fagu vai ma afifi meaai i totonu o ato. Ona fesoasoani lea o Spencer ia Tina e toe tuu i luga o le fata. Sa mamafa na mea!
Sa latou tuuina foi le pusa o talifofoga i luga o lena fata. Ina ua mavae ni nai aso, sa galo ia Spencer ia mea uma.
I ni nai masina mulimuli ane, ina ua o mai Spencer ma lona aiga i fafo mai le lotu, sa i ai se ea pogisa, ma mafiafia na siomia ai i latou. Sa latou fetalei a o latou tietie ai i le sipi e o atu i le fale.
Ina ua latou taunuu i le fale, sa ki e Tama le TELEVISE e vaai po o le a le mea o tupu. Sa potopoto faataamilo le aiga e matamata.
“Sa amata ona pusa lefulefu mai le Maugamu o Taal i le asō,” o le tala lea a le failipoti. “O le lefulefu e lamatia ai pe a manavaina. Faamolemole fai se talifofoga. E tatau i tagata uma ona nonofo i le fale taeao.”
Sa tilotilo solo Spencer i lona aiga. Sa ofo tagata uma.
“Oi.” Na fai atu ai Tina. “Le pusa o talifofoga!”
Sa ataata Tama. “Sa ou iloa sa i ai se mafuaaga na ou faatauina ai!”
“Tama, na e iloa o le a mu le maugamu?” Na fesili atu ai Spencer.
Na lulu e Tama lona ulu. “Leai,” na ia fai mai ai. “Ae na silafia e Tama Faalelagi. Ma sa Ia auina mai le Agaga Paia e ta’u mai ia te au e faatau ia talifofoga. E tele, e mafai ona tatou faasoa atu foi i isi.”
“Ma ou te manatu na tuuina mai e le Agaga Paia ia te au le manatu e siaki a tatou ato mo faalavelave faafuasei,” o le tala lea a Tina. “O lea la o le a tele a tatou vai ma meaai a o tatou i ai i le fale e faatalitali mo le lefulefu e alu ese atu.”
Sa lagona e Sofia le mafanafana i totonu. Sa pogisa le ea, ae sa saogalemu lo latou fale, ma sa i ai mea sa latou manaomia. Sa ia iloa o le a fesoasoani mai pea le Tama Faalelagi ia i latou. Sa fiafia Spencer sa faalogo atu lona aiga i le Agaga Paia!
Ata na tusia e Laura Catrinella