O Le Faletusi Laitiiti

Saunia e Julia Willardson

(E faavae i se tala moni)

O lenei tala sa tupu i le ISA.

Sa tapuni e Janie lana tusi ma mapuea fiafia. O lenei tusi o le tusi e sili ona ia fiafia i ai! Ua faatolu ona ia faamaeaina. Sa fiafia o ia e faitau!

“E te manatu e mafai ona ou fauina se tamai potutusi?” Sa fesili atu Janie ia Tina ma Tama i se taimi mulimuli ane o lena aso. Sa manao o ia e fesoasoani i isi e ala i le faasoaina atu o tusi ia i latou.

“O le a se faletusi laitiiti?” O le fesili lea a Tamā.

“O se atigipusa e te tuuina i fafo ma tusi i totonu,” o le tala lea a Janie. “E mafai e tagata ona nono mai e aunoa ma se totogi. Pe e mafai foi ona latou tuua ni tusi mo isi e faitau i ai.”

“Ou te iloa o se manatu sili lena,” sa fai atu ai Tina.

Na luelue le ulu o tamā. “E mafai ona ma fesoasoani ia te oe e fauina.”

“Faafetai,” o le tala lea a Janie. “Atonu e mafai ona fai se maketi o meaai tao e faatau e maua ai se tupe mo sapalai!” Sa faia e Janie ma lona uso, o Carli, ni faailoga e faasilasila ai le faatauina atu o meaai tao. Sa latou tuu faataamilo i le pitonuu. Na faailoa atu e Tina ma Tama i tagata e uiga i le maketi o meaai tao i luga o le initoneti. Sa fiafia lava Sofia!

Sa tele le fiafia o Janie i le faiga o meaai. Sa ia faia ni kuki, poloka silo paanunu, ma keke papae o le sinou.

E le i umi ae oo mai le aso o maketi o meaai tao. Sa tuu e Janie, Carli, ma le la uo o Bella se laulau i lumafale. Sa latou faatau atu ni meaai mama i le toatele o o latou tuaoi. Sa foai atu foi e nisi tagata ni tupe faaopoopo. Sa tuu e Janie tupe uma i totonu o se fagu faapitoa.

Ina ua uma le maketi o meaai tao, sa toe maua e Janie se isi manatu. Sa ia lesitala atu nisi o ana meaai e fiafia i ai i se tauvaga i le faaaliga a le itumalo ma manumalo ai i se taui! Sa ia tuuina le tupe o le taui i totonu o le fagu ma le isi tupe mo lana tamai potutusi.

O lea la ua i ai ia Janie le tupe mo le potutusi laitiiti, sa ia manaomia ni tusi e faatumu ai. Sa alu atu o ia mai lea faitotoa i lea faitotoa ma fai atu i ona tuaoi e foai atu ni tusi latou te lei toe manaomia. O nisi uo na o mai e avatu foi ia Janie a latou tusi.

Sa iu lava ina oo i le taimi e fausia ai lana tamai potutusi. Sa faaaoga e Janie le tupe sa ia maua e faatau ai sapalai. Sa ia tusia se mamanu o le pusa ma faia ni fua. Sa fesoasoani Tama ia te ia e tata fafie, ma sa fesoasoani Janie ia te ia e tuufaatasi fafie.

Sa faatumu e Tina mavetevete ma sooga e taofia ai le vai pe a timu. Sa fesoasoani Janie e tautau se faailo e ta’u atu ai i tagata e ave se tusi pe faasoa atu se tusi.

Na iu lava ina ave e Janie ma lona aiga le atigipusa i lumafale i autafa o le latou laau tele paolo. Sa tuu e Tama se pou i le palapala, ma la tuuina faatasi le pusa i luga o le pou. Sa latou faia se faletusi laitiiti!

Sa tuu e Tama ni maa mamafa se tolu faataamilo i le pou. “E tatau ona taofia ai mai le mafuli,” o lana tala lea.

“O le matuai ou fiafia lava i ai!” Sa fai atu ai Janie. “Ua mafai nei ona tatou tuuina tusi i totonu.” Sa latou faatumuina le potutusi laitiiti i tusi na foai atu.

Ina ua mavae lena, sa alu Janie e siaki le faletusi laitiiti i aso uma. Sa fiafia o ia e vaai po o a tusi na faaopoopo e tagata pe na aveina foi i tua. I se tasi aso sa ia vaaia ai se teineitiiti o filifili se tasi o tusi e sili ona fiafia i ai Janie! Sa matuai fiafia lava o ia sa mafai ona ia fesoasoani i ona tuaoi e ala i le faasoaina o tusi i le potutusi laitiiti.

Ata na tusia e Barbara Bongini