“O Le Faamanuiaga Faaleperisitua o Timeona,” Uo, Oke. 2023, 12–13.
O Le Faamanuiaga Faaleperisitua o Timeona
Sa oso atu Timeona agai i le amopou.
O lenei tala sa tupu i Kiribati.
Sa a’e Timeona i luga o le ogalaau i luga a’e o ia. Ona ia tuu lea o ona vae i luga o le ogalaau ma tautau ifo ai i lalo.
“E matagofie lenei nofoaga!” Na fai mai ai Natieta mai lalo.
Na maua e Timeona ma ana uo le tamai fale laau tuufua i luga o le laau i le amataga o lena vaiaso. O se nofoaga sili ona lelei e taaalo ai! O amopou o loo taofia i luga le taualuga sa lelei atoatoa e faalue mai ai.
“Ou te matea e mafai ona ou puna atu i le isi itu—e pei lava o se manuki,” o le tala lea a Timeona.
“Ta fetaui i le afa o le ala!” Na fai atu ai Toani.
Sa faaaoga e Timeona ona lima e lue ai lona tino i luma. Ona ia oso atu lea agai i le amopou e lata i lana uo. Sa aapa atu ona lima, ua sauni e uumau.
Ae na see ese ona lima! Sa pau Timeona i lalo.
“Auoia!” Na fai mai ai Timeona. Sa taufetuli atu ana uo e fesoasoani ia te ia.
“O seki oe?” O le fesili lea a Natieta.
Sa taumafai Timeon e tu i luga, ae sa ia lagonaina se tiga matuitui i lona lima.
“Ou te le iloa pe mafai ona ou gaoioi,” na ia fai atu ai. Sa ia taumafai e aua le tagi, ae sa tafe ifo loimata i ona alafau.
“Ou te faamalie atu Timeona,” na faapea atu ai Natieta. “O le a matou fesoasoani e ave oe i le fale.”
Sa fesoasoani uo a Timeon ia te ia i le isi itu o le motu. Na toeitiiti lava oo i le taimi e goto ai le la i le taimi na latou taunuu ai i lona fale.
“O le a le mea ua tupu?” O le fesili lea a Tina.
“Sa matou taaalo i le fale laau tuufua,” o le tala lea a Toani. “Sa see ese Timeona mai le amopou sa faalue ai.”
Sa le mafai e Timeona ona faasa’o lona lima. E matuai tiga lava!
Sa faafetai atu Tina i uo a Timeona mo le aumaia saogalemu o ia i le fale. Sa ia fesoasoani ia te ia e taoto i luga o le fala ma tuu aluga vaivai i ona autafa.
Sa lagona pea e Timeona le tiga tele. Ae sa leai ni fomai e latalata ane e asiasi ai i le pogisa. Ae faapefea pe afai e tiga pea i le po atoa?
Sa faalogoina e Timeona se leo o valaau faafeiloai mai fafo atu o le fale. “Mauri!” O faifeautalai.
“Ua matagofie le vaai atu ia te oulua Elders,” o le tala lea a Tina. “E mafai faamolemole ona oulua tuuina atu i lo’u atalii se faamanuiaga faaleperisitua? Sa lavea ia te ia lona lima ma o loo tiga tele.”
“Ioe.” Sa ataata Elder Aitu ia Timeona. “E te manao i se faamanuiaga faaleperisitua Timeona?”
Na iloa e Timeona o faamanuiaga faaleperisitua na valaaulia ai le mana mai le Atua e fesoasoani ma faamalolo ai tagata. Na i ai lona faatuatua o le a fesoasoani lona Tama Faalelagi ia te ia. Sa lue atu lona ulu. “Ioe, faamolemole!”
Sa tuu e faifeautalai o laua lima i luga o le ulu o Timeona. Sa laua tau atu lona suafa atoa ma faamanuia o ia e ala i le mana o Iesu Keriso ina ia maua se lagona lelei.
Sa lei umi ae le toe tiga tele le lima o Timeona. Sa ia lagona le toamalie, ma le filemu. Sa mafai foi ona moe o ia.
Ina ua ala a’e o ia, ua o’o i le taeao. O loo tiga pea lona lima, ae e lei tiga tele e pei o le taimi muamua.
“O le a sou faalogona?” O le fesili lea a Tina.
“Ua sili atu ona lelei,” o lana tala lea. “Ou te manatu e moni le mana o le perisitua.”
“Ua ou fiafia na fesoasoani le faamanuiaga ia te oe!” Sa fusi e Tina ia Timeona, ma le faaeteete ia aua nei leua lona lima. “Sei ta o e saili se fesoasoani mo lou lima ina ia mautinoa ai e sologa manuia.”
Sa fesoasoani Tina ia Timeona e oso i luga o se uila. Ona ia oso ane lea i ona tua. Sa ia aveina atu i la’ua i lo latou tuaoi, o le sa mafai ona fesoasoani.
Sa ataata Timeona a o togafitia e lo latou tuaoi lona lima. O le mana o le perisitua o se mana moni mai le Atua. Ma sa ia matua faafetaia lava!
Ata na tusia e Melissa Kashiwagi