“Agai i Luma ma Selesele Pea!” Uo, Oke. 2023, 32.
Uo i le Uo
Agai i Luma ma Selesele Pea!
Ata na tusia e Garth Bruner
Sa ou nofo i Kalefonia, ISA, faatasi ma lo’u aiga i lo’u tuputupu ae. I le taumafanafana sa matou seleseleina ai vine i se tovine. E toatele lo matou aiga, ma sa matou galulue faatasi uma. Sa ou laitiiti, ae sa aoaoina au e lou tama ia galue malosi.
Sa matou otieseina ni fua o vine mai le vine. Ona matou faaputuina lea o vine i luga o se fata uamea. Ina ua tumu le fata, sa matou aveina atu i lo’u tama. Sa ia folaina vine e faamago i ni vine mago i le la vevela. Sa totogi e le pule o le tovine lo’u tama mo vine sa matou faia.
O taimi uma lava matou te aveina ai vine i lo’u tama, na ia tau mai ai ia i matou, “Agai i luma ma selesele pea.”
O lea na matou o ai i le isi vine e selesele ai le isi vaega o vine. Sa matou faia pea lava pea lenei mea. Sa matou taulai atu i le isi vine ma le galuega o loo i o matou luma. Matou te lei faatagaina i matou lava e faalavelave i mea ua i o matou tua.
O vaiaso uma lava e totogi ai e lo’u tama o’u tei ma a’u mo le matou galuega. Sa ia aoaoina i matou e faaaoga le 10 pasene mo le sefuluai. Sa matou sefeina le vaega na totoe. Ina ua lava mea na matou maua, sa matou taitasi ma faatauina se vaalele laupapa po o se lole e sili ona matou fiafia i ai. Sa matou faaaluina aoauli o Aso Toonai e taaalo ai i le paka ma a matou vaalele ma ai a matou lole.
O le tala a lo’u tama e “agai i luma ma selesele pea” ua avea ma se tu masani i lo’u aiga. Ua aoaoina ai i matou i le taua o le galue malosi. E taua mo i tatou le “agai i luma ma selesele pea” i mea uma tatou te faia. Pe a tatou galulue malosi ma mulimuli i mea ua poloaiina ai i tatou e le Atua e fai, e mafai ona tatou maua le olioli i le olaga.