“E Sili Atu Nai Lo o se Aso Lelei i le Koleni,” Uo, Nov. 2023, 14–15.
E Sili Atu Nai Lo o se Aso Lelei i le Koleni
Sa le’i i ai i le tamaitai se lagona lelei. Mata e mafai ona fesoasoani Isamaeli?
O lenei tala sa tupu i Polivia.
Sa ataata Isamaeli a o ia laa atu i fafo i le lasusulu. Sa la o ma Papa i le paka. A o la savavali, sa uu e Isamaeli le lima o Papá ma sii lana polosoka. Sa fiafia Isamaeli e faaalu le taimi ma Papa—aemaise lava pe a la taaalo soka!
Ina ua la taunuu i le paka, sa tilotilo solo Isamaeli. Sa vele vao se tamaitai i talaane o le malae soka. Sa savavali se aiga i luga o le auala savali. Ae sa leai se tasi na taalo i le malae soka. O le a maua e Isamaeli ma Papa se avanoa telē e faataitai ai!
“Sauni e taalo?” Sa fesili atu ai Papa.
“Ioe!” Sa tamoe Isamaeli i le vave na te mafaia i luga o le malae. Sa ia faataitaia le tamoe fepiopioa’i, kiki o sala, ma kiki tulimanu.
Sa kiki malosi e Papa le polo. Na lele i luga a’e tonu o le ulu o Isamaeli!
“O le a ou alu e aumai,” o le tala lea a Isamaeli. Sa tamoe atu o ia i le tulimanu o le malae ma piki i luga le polo. Sa ia vaaia le tamaitai o eli pea i le palapala. Sa vaaia lona vaivai.
“O le a ou puipui sikoa i le taimi nei,” o le valaau lea a Papa. “Vaai pe mafai ona e sikoa!”
Sa toe tamoe Isamaeli ma kiki le polo agai i le itu sikoa. Sa aapa atu Papa e taofi ae sa toeitiiti misi.
“Sikoaaa!” Sa alaga Isamaeli a o tau le polo i le neti.
E le’i umi ae mavae atu se itula atoa. “Ua oo i le taimi ta te o ai,” o le tala lea a Papa.
Sa toe tepa i tua Isamaeli i le tamaitai o loo vele vao. O le galue i le la e le o se mea malie e pei o le taalo soka, sa ia mafaufau ai. Sa manao o ia e faafiafia [le tamaitai]. Ona maua lea o sona manatu.
“Papa, e te le manatu o loo faia e lena tamaitai se galuega lelei?” na ia fesili atu ai.
“O le a?” Sa tilotilo atu Papa i le tamaitai. “Oi, ioe.”
“Ou te manatu e tatau ona ta o e ta’u atu ia te ia!” o le tala lea a Isamaeli.
“Ia, e tatau ona ta faatopetope i le fale. O loo faatali Mama mo i ta’ua,” o le tala lea a Papa.
Sa vaavaai atu Isamaeli i le tamaitai o solo lona muaulu. Sa malosi le lagona e talanoa atu ia te ia. “Ou te lagona moni lava e tatau ona ta faia,” o lana tala lea. Sa ia uuina le lima o Papa ma savavali atu ia te ia.
“Talofa, tamaitai,” o le tala lea a Isamaeli ma talotalo atu.
Sa le’i ea a’e i luga le tamaitai. “O le a le mea e te manao ai?”
Sa iloa lelei e Isamaeli sa le’i fiafia tele o ia. Ae sa le’i taofia ai o ia e lena mea. “Sa ou manao e ta’u atu ia te oe o loo e faia se galuega maoae!”
O le taimi lea na tilotilo atu ai le tamaitai ia te ia.
Sa ataata Isamaeli. “Faafetai mo le tausiga o le paka!”
Sa ataata mai foi le tamaitai. “Faafetai lava,” o lana tala lea. Ona faateleina ai lea o lana ataata. “Faafetai tele lava.”
Sa lagona e Isamaeli le fiafia a o la savali atu i le fale ma Papa.
“Ou te manatu o le mea na e fai atu ai sa taua ia te ia,” o le tala lea a Papa. “Ua ou fiafia sa e faalogo i le lagona na e maua.”
“Ma a’u foi.” Sa mafaufau Isamaeli mo sina taimi. “Ona ia fesili mai lea, “E te manatu o le Agaga Paia lea?”
Sa luelue le ulu o Papa. “O nisi taimi e tuuina mai ai e le Agaga Paia ia i tatou se manatu e fesoasoani i se tasi. Ma o le mea tonu lena na e faia.”
Sa ataata Isamaeli. O le talanoa atu i le tamaitai sa na o sina mea itiiti, ae sa ia faaleleia lona aso. O le faalogo i le Agaga Paia na sili atu ai foi lona aso!
O ata na tusia e Jennifer Bricking