“O Se Tasi e Malamalama,” Uo, Nov. 2023, 26–27.
O Se Tasi e Malamalama
Sa le’i malamalama uo a Blair pe na faape’i le maua i le faama’i o le gaau papala.
O lenei tala sa tupu i le ISA.
“E le mafai ona ou alu atu nei,” o le tala lea a Blair. Sa lagona e ona foliga le vevela mai le maasiasi.
Sa sioa atu ana uo ia te ia. “Ae na e fai mai o le a e sau!” Na fai mai ai Sammy.
“O lea oute iloa.” Na sioa Blair i lalo i ona vae. “Ou te le o malosi lelei. Ou te faamalie atu.”
“O lau tala foi lena na fai mai i le taimi ua te’a,” o le tala lea a Jessica.
Sa le iloa e Blair le tala e fai. Sa moomoo maimau pe ana mafai ona alu o ia i le fale o Sammy. Ae ua matuai tiga lona manava i lenei aso. Sa manaomia lona alu i le fale e malolo.
Sa maua Blair i le faamai o le Crohn [gaau papala]. Sa tiga ai lona manava, ma sa matuai tiga lava. O le tele o aso sa tiga ai lona manava i sina mea itiiti. Ae o nisi aso sa sili atu ona leaga nai lo isi. O le nei o se tasi lea o na aso. Sa moomoo maimau pe ana mafai ona ia filifili po o fea aso e sili atu ona tiga ai o ia. Sa foliga mai e sili ona tiga lona manava i soo se taimi lava na te manao ai e fai se mea malie.
“Ta o loa,” o le tala lea a Sammy ia Jessica.
Ina ua taunuu Blair i le fale, sa ia inuina lana fualaau. Ona taumafai ai lea e moe. Ae sa tiga tele.
Na omai Tina ma Tama e siaki o ia. Sa nofo Tama i luga o lona moega. “O le a sou lagona?”
“Lea ua lelei. Sa fesoasoani laitiiti le fualaau,” o le tala lea a Blair.
“Ou te faamalie atu i le le mafai ona e alu i le fale o Sammy,” o le tala lea a Tina.
Sa melotagi Blair. “E lē fea! E le malamalama au uo pe faape’i.” Sa togi e Blair se aluga i le puipui. “Pau lava le mea ou te manao ia manuia.”
Sa opo lemu e Tamā ia Blair. “Ua ou iloa. E te manao i se faamanuiaga faaleperisitua?”
Sa lue atu le ulu o Blair. O faamanuiaga e masani ona fesoasoani ia te ia e lagona atili ai le toafilemu.
Sa tuu e Tama ona lima i luga o le ulu o Blair ma faamanuia o ia e malolo ma lagona le mafanafana. Sa o se faamanuiaga manaia. Sa fesoasoani ia te ia e manatua ai e alofa le Tama Faalelagi ia te ia. Ae sa ia lagona pea le faanoanoa e uiga i ana uo.
Ina ua uma le faamanuiaga, sa tuuina atu e Tina ma Tama ia Blair se kisi faamanuia mo se po lelei. Sa la tuua o ia ina ia mafai ona moe.
Sa taoto i lalo Blair ma moeiini ona mata. Sa fesoasoani le faamanuiaga, ae sa tiga pea lona manava.
Sa tootuli o ia i autafa o lona moega e tatalo. I le taimi muamua sa pei o le tele o ana tatalo. Sa ia ta’u atu i le Tama Faalelagi le mea sa ia faafetai ai ma ole atu ia maua se lagona lelei. Ae o le taimi la lea sa faaauau pea lana [tatalo].
“Tama Faalelagi, ou te lagona le faanoanoa tele. Ua ou misia le faatasi ai ma a’u uo,” o lana tala lea. “Ou te lagona le tuuatoatasi. E leai se tasi e malamalama i le tele o lo’u tiga i aso taitasi. Ua ou misia le tulaga na i ai ae ou te le’i ma’i.
O le umi lava na tatalo ai Blair, o le tele foi lea o lona lagonaina o loo faafofoga mai le Tama Faalelagi i lana tatalo. Sa le mafai ona ia faalogo pe vaai ia te Ia, ae sa ia lagonaina Lona alofa. Sa ia iloa na Ia popole i mea sa ia fai atu ai. Sa le’i manao Blair e faamuta le lagona.
Sa tatalo Blair seia oo ina ia ta’u atu i le Tama Faalelagi mea uma sa ia lagonaina. Ona oo mai lea o se manatu i lona mafaufau. Atonu o le a le iloa lava e uo a Blair le lagona o le maua ai i le faama’i o le gaau papala, ae sa iloa e le Tama Faalelagi ma Iesu Keriso. Sa La’ua iloa le tele o lona tiga ma le tuuatoatasi o ona lagona. O le a i ai pea i La’ua iina mo ia.
Sa lagona e Blair e pei o loo ia mauaina le opo sili ona tele. Ina ua uma lana tatalo, sa alu o ia e sue ona matua e ta’u atu ia i la’ua le mea na tupu.
“Pe na fai sau miti taufaafefe”? O le fesili lea a Tinā.
Sa ataata Blair. “Leai. Sa ou tatalo.”
Sa te’i Tina. “Sa ma faamanuia atu le po i se taimi ua leva atu. Pe na e tatalo i lena taimi atoa?”
Pe ua leva ea? Sa lue atu le ulu o Blair. “Sa pei o se opo lapoa. E silafia e le Tama Faalelagi ma Iesu Keriso o’u lagona. Ona o i La’ua, ou te le lagona ai le tuuatoatasi!”
O ata na tusia e Tammie Lyon