“O Faataitaiga,” Uo, Nov. 2023, 30–31.
O Faataitaiga
Na iloa e Iareto sa i ai Iesu Keriso i lana itu.
O lenei tala sa tupu i Farani.
Sa po po atu e Iareto le polo i le isi itu o le malae. Sa taufetuli solo tagata taaalo ia te ia, ma fe’i solo o latou seevae i luga o le fola.
“Lea ou te avanoa!” Sa valaau atu ai Kaperielu.
Sa pasi atu e Iareto le polo ia Kaperielu ma tamoe pea. Ona toe pasi ane lea o le polo e Kaperielu. Sa togi e Iareto le polo i le mama.
SWOOSH!
Sa alu i totonu!
“Manaia le taalo, Iareto,” o le tala lea a lona faiaoga ina ua uma le taaloga. “E te iloa, o faataitaiga mo le ’au faaitulagi e toe lua vaiaso fai.”
Sa ataata Iareto. Sa na o ni nai tagata taaalo sa valaaulia e taumafai mo lena ’au.
“O faataitaiga o le a faia i le Aso Sa,” o le tala lea a le faiaoga. “Faamata e mafai ona e sau?”
Na vave lava ona mou atu le fiafia o Iareto pei ona oo mai.
“I le Aso Sa?” sa fesili atu ai Iareto.
“Ioe. E i ai se faafitauli?”
Sa mafaufau i ai Iareto. O lona avanoa lenei e taalo ai i se ’au lelei tele! Ae o Aso Sa o le taimi lea e alu ai o ia i le lotu ma taulai atu i le Faaola.
“O Aso Sa o se aso faapitoa mo a’u,” o le tala lea a Iareto. “Ae o le a ou talanoa i o’u matua e uiga i ai.”
I lena po, sa saofai ai Iareto i luga o lona moega ma ona matua. Sa ia togiina lana polo pasiketi i le ea a’o ia mafaufau. “Ou te matua manao lava e taumafai mo le ’au,” na ia fai atu ai ia Tina ma Tama. “Ae ou te le manao e fai i se Aso Sa. Ou te iloa e sili atu le taua o le Atua nai lo le pasiketipolo.”
“O a ni mea e mafai ona tatou faia e fesoasoani ai?” O le fesili lea a Tinā.
Sa feliuai e Iareto le polo i ona lima. “E mafai ona tatou faia faatasi se tatalo?”
Sa ia tuu ese lana polo pasiketi ma tootutuli i lalo faatasi ma Tina ma Tama. “Tama Faalelagi pele,” na ia fai mai ai, “Ou te matuai, matuai manao lava e taumafai mo lenei ’au pasiketipolo. Ae o faataitaiga o loo faia i se Aso Sa! Ou te iloa o le Aso Sa o le aso lea ou te avatu ai ia te Oe. O le a se mea e mafai ona ou faia?”
Ina ua uma le tatalo, sa lagona e Iareto se lagona mafanafana.
“O le a sou faalogona?” O le fesili lea a Tina.
“Ou te le alu pe afai e faia faataitaiga i se Aso Sa,” o lana tala lea. “Ae e i ai so’u lagona o le a lelei mea uma.”
E lua aso mulimuli ane, ae maua e le tina o Iareto se imeli. Na faapea mai o le a faia nei le faataitaiga i le Aso Toonai!
E mafai e Iareto ona faataitai ai ma tausia le paia o le aso sapati! Sa ia iloa na faafofogaina e le Tama Faalelagi lana tatalo.
Mo le isi lua vaiaso na sosoo ai, sa fai ai faataitaiga pasiketipolo a Iareto i le malosi na te mafaia. Ina ua oo mai le aso tele, sa faia e Iareto le mea sili na te mafaia. Sa ia tamoe faatopetope i le va o taaloga, fai le tele o ana togi, ma faamalosiau atu mo lana au taaalo.
“O tagata taaalo nei o le a faaauau pea i faataitaiga mo le ’au,” o le tala lea a le faiaoga ina ua uma le taamilosaga muamua. “Faamolemole faalogo mo lou igoa.”
Sa tātā leotele le fatu o Iareto. Sa ta’ua e le faiaoga le igoa e tasi. Sosoo ai ma le isi. Ma le isi. Sa lagona e Iareto le mou atu o lona faamoemoe e auai i le ’au.
E le’i umi ae uma loa le lisi a le faiaoga. Na te le’i valaauina le igoa o Iareto. O le a le au atu Iareto i le isi taamilosaga o faataitaiga.
Sa nofo Iareto i luga o le nofoa i fafo o le faletaalo ma sioa atu i ona seevae. Sa matua galue malosi o ia. Ae sa ia lagonaina o lana galuega atoa sa faia mo se mea noa.
Ina ua piki o ia e Tina, sa lulu le ulu o Iareto. “Ou te le’i taulia i le ’au.”
Sa fusi mau o ia e Tina. “Ou te faamalie atu ona e le’i oo i le mea na tatou mananao ai,” o lana tala lea.
Sa manava loloa Iareto. Ona oo mai lea o se manatu faamafanafana ia te ia.
“O le a le lelei lava mea i taimi uma i le auala ou te manao ai,” o lana tala lea. “Ae e silafia lelei e Iesu Keriso o’u lagona. O loo i ai o Ia i o’u tafatafa.”
Na ataata Tinā. “E sa’o oe! Na te silafia ou lagona.”
Sa toe ataata atu i ai Iareto. Sa faanoanoa pea o ia, ae sa lelei ona lagona sa malamalama le Faaola i ona lagona. Sa iloa e Iareto o le a alofa ma lagolagoina o ia e Iesu i taimi uma.
Ata na tusia e Britain Morris