O Le A Ta Faia Faatasi Lenei Mea

Saunia e Jane McBride

(E faavae i se tala moni)

Sa fefe Ane e amata i Tamaitai Talavou.

O lenei tala sa tupu i le ISA.

Sa mili e Ane le ie o lona ofu. Sa taumafai o ia e faalogo i failauga. Ae sa i ai sona lagona popole, ma taufaafefe i lona manava.

O le asō o le aso lea o le a amata ai ona alu Ane i Tamaitai Talavou. E alu o ia i le vasega i le taimi lava e uma ai le sauniga faamanatuga. Sa ta’u atu e tagata uma ia Ane e tatau ona fiafia o ia, ae nai lo lena, sa fefe o ia.

Sa tilotilo atu o ia ia Tami, lona uso matua. Sa i ai Tami i Tamaitai Talavou mo le tolu tausaga, ma sa fiafia i ai o ia. Sa ia ta’u atu ia Ane le maoae tele. “O le a e faia ni uo se toatele,” o le tala lea a Tami. “E ese mai le Peraimeri. E toetoe lava pei oe o se tagata matua.”

Ae sa le pei Ane o lona uso. Sa fiafia Tami e feiloai i tagata fou, ma sa faigofie mo ia ona faia ni uo. Sa filemu Ane ma e sili atu ia te ia le faitau pe tusi se ata nai lo le talanoa atu i isi.

Sa fuafuā foliga o Ane, ma sa ia lagona le matamuli e uiga i ona foliga. Sa ia faaaogaina se kulimi faapitoa, lea na fesoasoani. Ae o patupatu mumu i luga o lona pa’u o le a le alu ese lava.

Ina ua uma le sauniga faamanatuga, sa faatosotoso loloa atu vae o Ane i le alasavali. “E le mafai ona ou alu i Tamaitai Talavou i le asō,” sa ia fai atu ai ia Tina ma Tami.

Sa foliga popole Tinā. “Sa ou manatu sa e fiafia i le alu atu i Tamaitai Talavou. O le a le mea ua tupu?”

“Ou te le iloa se tasi o teineiti matutua.” Sa pa’i atu Ane i ona foliga. “Ma atonu o le a latou taliē pe a latou vaai mai ia te a’u.”

Sa tuu atu e Tina se opo ia Ane. “Manatua o le a i ai foi Tami iina.”

“Ou te le pei o Tami,” o le tala lea a Ane. Sa ia tilotilo atu i lona uso. “E te lelei i le talanoa atu i tagata.”

“Ou te iloa e faigata ona alu i se vasega fou,” o le tala lea a Tami. “Ae o le a ta faia faatasi lenei mea. Sa ou lagona foi le fefe ina ua ou amata i Tamaitai Talavou.”

Sa sioa atu Ane ia Tami ma ni mata lapopoa. Sa foliga mai sa lototoa Tami i taimi uma! Sa taumafai foi o ia mo le tala faamusika a lana aoga ma maua ai le vaega autu. E le’i faia e Ane ni mea faapena. Sa ia taumafai lava ia le matauina o ia [e tagata].

“Ae e te le fefe lava,” o le tala lea a Ane.

Sa ataata Tami. “Ioe, ou te fefe! Sa ou fefe ina ua ou taumafai mo le tala faamusika. E te iloa le mea na ou faia?

Na lūlū le ulu o Ane.

“Sa ou tatalo ma faia le mea sili ou te mafaia. Ma sa ou fesoasoani foi i isi tamaiti. Sa foliga mai o le toatele o i latou sa fefefe e pei lava o a’u. O le fesoasoani atu i isi ia lototele na fesoasoani ia te a’u ia ou lototele ai.

Sa mafaufau Ane i lena mea. Pe mafai ona ia faia le mea na faia e Tami ma fesoasoani i isi teineiti o lana vasega ia le fefefe?

“E te manatu e mafai ona e alu i Tamaitai Talavou i le asō?” O le fesili lea a Tinā.

Sa manava loloa Ane. Ona luelue lea o lona ulu. E mafai ona ia faia.

Sa savavali atu Ane ma Tami i le potuaoga o Tamaitai Talavou. Na tilotilo atu Ane i isi teineiti. O nisi o i latou sa foliga popole e pei o ia. Sa femilosai e Julie se fasi lauulu faataamilo i lona tamailima a o atiati e Erika ona atigilima.

Sa mafaufau Ane pe mafai faapefea ona ia fesoasoani ia i latou. Sa alu atu o ia e nofo i autafa o Julie. “O e popole foi?” Sa musumusu atu ai Ane. “O le a lē afaina.”

Sa ataata Julie, ma sa ataata atu i ai Ane. Sa lagona e Ane le faaitiitia o le fefe i le taimi nei. Atonu e maoae tele Tamaitai Talavou.

O Ata na tusia e Toby Newsome