“Faamagalo atu e Faapei o Nifae,” Uo, Ian. 2024, 4–5.
Faamagalo Atu e Faapei o Nifae
Sa le’i manao Aisea e ita pea ia Iosia e oo i le faavavau.
O lenei tala sa tupu i le ISA.
Sa tamoe atu Aisea ma kiki le polo i lana au, o Timoteo. Sa ia tilotilo atu a o sasau e Timoteo lona vae ma kiki le polo i le pou.
“Sikoa!” Sa alaga atu ai Timoteo ao tau le polo i le neti.
Sa alalaga fiafia Aisea. Sa latou manumalo i le taaloga!
A o savali ese atu o ia mai le malae, sa ia lagonaina le fiafia tele! Ae o se tasi o tamaiti i le isi au, o Iosia, na valaauina o ia i se igoa uigā.
Sa lagona e Aisea le te’i ma le tiga. Sa leiloa e ia se tala e fai atu. Sa tilotilo ifo o ia i lalo i le eleele ma savali lemu atu i lana au taaalo.
“Ua tatou malo!” Sa fai atu ai Timoteo. “Manaia tele le pasi, Aisea.”
Ae sa lei lagonaina e Aisea se lagona lelei. Talu mai le tala a Iosia na fai atu ia te ia! Sa ia lagona le faanoanoa ma le ita.
O le vaega na totoe o le aso, sa lagona e Aisea le pei o se avega mamafa na tosoina o ia i lalo. E lei toe fiafia o ia ia Iosia.
I lena po, sa nonofo ai Aisea ma lona aiga i le taimi o tusitusiga paia. Sa ia taumafai e faalogo i lona tuafafine o faitau. Ae sa le mafai ona taofi lona mafaufau e uiga i le tala a Iosia.
Sa tilotilo Aisea i itulau o lana Tusi a Mamona. Sa ia taofi i se mau i le 1 Nifae. Sa faatatau i se taimi na agaleaga ai uso o Nifae ia te ia.
“Ma sa oo ina ou faamagalo ma le alofa ia te i la’ua,” na fai mai ai le mau.*
Nifae faamago e Nifae ona uso? Sa mafaufau Aisea. E oo lava ina ua mavae lo latou agaleaga tele?
Sa mafaufau Aisea ia Iosia. Sa lei manao o ia e taofimau i ona lagona le lelei mo Iosia e faavavau. Sa na o le 10 ona tausaga!
Sa manao Aisea e avea e faapei o Nifae. E mafai ona ia faamagalo ia Iosia, e pei lava ona sa faamagalo e Nifae ona uso. Ma afai e toe fai atu e Iosia se tala le lelei, o le a ia fai atu loa ia te ia e aua nei toe faia.
Sa ia lagona le mafanafana ma le filemu i totonu. Sa pei o loo fai mai le Agaga Paia, “O loo e faia le mea sa’o.”
“Aisea, o le a se mea na e aoao mai i nei mau?” O le fesili lea a Tinā.
Sa ea a’e i luga Aisea. “Faamalie atu, sa ou faitauina se isi mau,” o lana tala lea. Sa ia ta’u atu i lona aiga le mea na tupu i le soka.
Sa fusi mai e Tina ma Tama ia Aisea. “Ou te faamalie atu sa agaleaga Iosia ia te oe,” o le tala lea a Tama. “E le moni le mea na ia fai atu ai. Ae e le afaina le lagona tiga i ai.”
Sa ataata Aisea. “Faafetai. Mo sina taimi sa matuai o’u ita lava. Ae o lenei ua ou faitauina tusitusiga paia, ou te le manao e ita ia te ia. Ou te manao e faamagalo atu ia te ia. Ma ua ou maua se lagona lelei!”
“Ua lelei tele lena!” Sa ataata foi Tina. “E le faigofie i taimi uma le faamagalo atu. Ae e sa’o oe. E matua aoga lava.”
Sa tilotilo ifo Aisea i ana tusitusiga paia. Sa fesoasoani ia te ia! O le mamafa na iai i le taimi muamua ua alu ese. Na lagona e lona loto le mafanafana ma tumu i le filemu.
Ata na tusia e Alyssa Tallent