“O Le Uunaiga e Siaki Pateta Falai,” Uo, Ian. 2024, 14–15.
O Le Uunaiga e Siaki Pateta Falai
Sa i ai se lagona malosi ia Maya e siaki mea o loo gaosia ai.
O lenei tala sa tupu i le ISA.
Sa tipitipi faamanifi e Maya ia strawberries ma faaopoopo i le pesini o le salati fualaau aina suamalie. O fualaau aina suamalie o lana meaai lea e fiafia lava iai. E fiafia o ia i lanu sesega uma. Ma e lei popole lava o ia pe a ‘ai ai!
Sa tele ni meaai e ma’i ai Maya. Sa tatau ona ia faaeteete ona o le ‘ai i meaai sese e mafai ona ma’i tigaina ai o ia. A o laitiiti o ia, sa mao lona inuina o se susu povi ma sa faigata ai ona manava. Sa tatau ona ia alu i le falema’i. Sa lei manao o ia e toe tupu lena mea.
O nisi taimi sa faigata ona ‘ai i meaai e ese mai i ana uo ma aiga. Ae sa ia iloaina e taua le nofo saogalemu.
Sa ave e Maya le salati fualaau aina suamalie i le fata. “Ua uma ona tapena le salaki.”
Sa ea ane i luga Tamā mai le ulo sa ia saeuina. “Lelei tele! Toeitiiti taunuu a tatou mālō.”
Sa faalogoina e Maya se tuitui i le faitotoa ma tamoe atu e tatala. Sa ataata atu le aiga o Johnson ma faifeautalai ia te ia mai le faapaologa. O le au Johnson o ni uo a le aiga. Sa fiafia Maya e toe vaai atu ia i latou. Sa ia tatalaina lautele le faitotoa mo tagata uma e o mai i totonu.
A o latou faatalitali mo le taumafataga o le afiafi, sa faaali atu e se tasi o faifeautalai ia Maya se faatogafiti. Sa le mafai ona ia iloa pe na faapefea ona ia tosoina ese le tupe siliva mai lona taliga!
E le’i umi ae oo i le taimi e e aai ai. Sa faia e Brother Johnson le tatalo. Ona latou laina uma lea e asu a latou ipu.
Ina ua oo i le taimi o Maya, sa ia asuina se asu telē o le salaki fualaau aina suamalie. Sa iai ni meaai sa ia lē asuina ona sa ia iloa sa i ai le susu i totonu.
Ona ia pikiina lea i luga o se pepa pateta falai lapoa ma sasaa sina mea i luga o lana ipu. Sa foliga mai o le ituaiga lava lea e tasi sa ia ‘aia muamua. Sa ia tuuina le tasi i lona gutu.
Ae ina ua amata ona ia lamuina, sa ia maua se lagona malosi. Siaki mea e o loo gaosia ai, na fai mai se leo i lona mafaufau.
Sa taofi le lamu a Maya. Sa ia tilotilo i le lisi o mea o loo gaosia ai i luga o le pepa. Sa i ai i le susu i totonu!
Sa uu mai e Maya se solopepa ma feanu i ai ia pateta falai i le vave na ia mafaia. Sa loimatā ona mata. Na te lei foloina. Ae mata e iai se mea leaga o le a tupu?
“Tina! “Tamā!” Sa faanatinati atu Maya i ona matua. “Sa ou tuuina se pateta falai o loo iai le susu i lo’u gutu!”
“E le afaina,” sa fai atu ai Tina. “Sei aumai le fualaau.” Sa folo e Maya le fualaau na tuu atu e Tina ia te ia ma manavanava loloa. Sa sii e Tama ia Maya a o la faatalitali sei aogā le fualaau.
Ina ua mavae ni nai minute, sa fai atu Tina, “O le a sau faalogo?”
Sa lagona pea e Maya le fefe. Ae sa leai se mea faaletonu na lagonaina i lona tino. “Ou te manatu ua ou manuia. Ae e mafai ona ou maua se faamanuiaga?”
“Ioe,” sa fai atu ai Tama. “Sei tatou fesili atu i faifeautalai e fesoasoani mai.”
Sa saofai Maya i se nofoa, ma sa tuu e Tama ma faifeautalai o latou lima i luga o lona ulu. Sa latou faamanuia ia te ia ina ia saogalemu. Sa lagona e Maya le toafimalie. Ua te’a ese uma ona lagona le lelei.
“Na faapefea ona e iloa e siaki mea o loo gaosia ai i luga o le pepa?” O le fesili lea a Tinā.
“Sa ou lagonaina se lapataiga mai le Agaga Paia!”
Sa tuu atu e Tamā ia te ia se opo lapo’a. “Ua ou fiafia lava sa e faalogo iai.”
Sa luelue atu le ulu o Maya. Sa ia iloa e alofa ma popole le Tama Faalelagi mo ia.
Ata na tusia e Chrisanne Serafin