“O le Sini o le Faitau,” Uo, Ian. 2024, 36–37.

O le Sini o le Faitau

Saunia e Chelsea Mortensen

(E faavae i se tala moni)

Sa le fiafia Anders e faitau leotele.

O lenei tala sa tupu i le ISA.

Sa faalogologo Anders i lona tuafafine o faitau i le taimi o suesuega faaleaiga o tusitusiga paia. Sa ia taumafai e mulimuli ai i lana tapeleti. Ae sa faigata ona taulai atu i upu.

Sa faigata lava i taimi uma ona faitau ia Anders. I le tausaga ua tea, sa ia iloa ai e maua o ia i le dyslexia. O le dyslexia o se faaletonu lea e faigata ai ona aoao e faitau. E fefiloi upu ma mataitusi i lona mafaufau, ma e feosoosofai solo i le isi itu o le itulau ao ia taumafai e faitau.

Na uma ona faitau e lona tuafafine lana fuaiupu, ma sa faitau e lona uso le isi fuaiupu. Ae e lei faitau Anders. Sa lei fiafia o ia e faitau leotele. O le faamatamatatetele o upu i luga o lana tapeleti na fesoasoani laitiiti. Ae sa ita o ia i le telegese ma le le lelei o lana faitau. Sa ia faia le tele o mea sese! Sa tatau ona ia galue malosi mo se mea lea sa foliga faigofie mo isi tagata uma.

Ina ua uma ona latou faitau, sa matamata le aiga o Anders i se vitio. Sa faatatau i le polokalama a Tamaiti ma le Autalavou.

“Faatutu ni sini patino ia e luitauina ma faaleleia ai oe,” na saunoa ai Elder Gong i le vitio. “Iloa taleni fou, mea e fiafia i ai, ma tomai.”^*

Sa mafaufau Anders e uiga i sini e mafai ona ia faatutuina. Atonu e mafai ona ia aoao pe faapefea ona tao kuki. Pe taalo soka lelei!

Ona ia tilotilo atu lea i le Tusi a Mamona i luga o le laulau. O le lelei atili i le faitau e lei foliga mai o se sini manaia tele. Ae sa manao o ia ia mafai ona ia faitauina faatasi tusitusiga paia ma lona aiga.

“Ou te iloa le mea ou te manao ia avea ai la’u sini,” na ia fai atu ai ia Tama.

“O le a?” O le fesili lea a Tamā.

Sa piki i luga e Anders le Tusi a Mamona. “Ou te manao e faitau leotele se fuaiupu o le Tusi a Mamona i aso uma.”

“E foliga mai o se manatu lelei lena,” sa fai atu ai Tama. “O afea e te manao e amata ai?”

“Taimi nei”

Sa alu Anders i lona potu ma tapuni le faitotoa. Sa lei manao o ia e faalogo se tasi ia te ia. Ona ia tatalaina lea o lana Tusi a Mamona. Sa ia faafefiloiina nisi o upu, ae na o se minute na ia faauma ai le fuaiupu muamua. Sa le leaga tele lena mea, o ona mafaufauga ia.

E faitau e Anders se mau i aso uma. Sa faigata! Na te lei lagonaina foi e pei ua faasolo ina lelei o ia. Ae sa faaauau pea ona ia galue iai.

Ona oo lea i se tasi aso i le aoga, sa fai mai lona faiaoga, “Oka! Ou te le talitonu i le vave o lou aoaoina.”

Sa ea a’e Anders mai lana meaaoga. “E mo’i?”

Sa luelue atu lona ulu. “Ua tele lava lou alualu i luma.”

Sa tilotilo ifo Anders i upu i luga o lana pepa. Sa sili atu ona faigofie le faitauina nai lo le taimi muamua. O lana sini e faataitai le faitauina o tusitusiga paia sa fesoasoani foi ia te ia e aoao ai i le aoga.

Ina ua sau o ia i le fale, sa ia tamoe i le falealuga e faitau ana tusitusiga paia. Ina ua ia tilotilo atu i le itulau, sa foliga mai o loo taavili solo upu. Ae sa faigofie atu le malamalama i mea na latou fai mai ai.

Sa fiafia Anders i suesuega faaleaiga o tusitusiga paia i lena po.

“Ei, Tama,” na ia fai atu ai. “E mafai ona ou fesoasoani e faitau i le aso?”

Sa ataata Tama. “Ou te fiafia i lena mea!”

Sa mulimuli ma le faaeteete Anders a o faitau taitoatasi e ona uso ma tuafafine se fuaiupu. Ina ua oo i lona taimi, sa ia faitauina lemu le fuaiupu ina ia mautinoa ua sa’o upu uma. Ina ua uma ona ia faitau, sa ia tepa ae i luga. Sa tau fai ataata uma atu tagata ia ia te ia.

E ui lava e le o ia o se tagata faitau e le atoatoa, ae sa lagona e Anders le mitamita ia te ia lava. Sa ia iloa a galue malosi o ia, o le a i ai pea le Tama Faalelagi iina e fesoasoani ia te ia.