“O Tusitusiga Paia a Sami,” Uo, Ian. 2024, 10–11.
O Tusitusiga Paia a Sami
Sa manao foi Sami e faitau.
Na tupu lenei tala i Polivia.
Sa patipati lima o Papi i le faaiuga o le afiafi faaleaiga. “E i ai so’u manatu mo se sini faaleaiga,” o lana tala lea. “Tatou faitau faatasi i le Tusi a Mamona i aso uma.”
O uso matutua o Sami, o Andrés ma Juan, na luelue atu ulu ma ataata i le manatu.
“Ua lelei,” o le tala lea a Andrés.
Sa fiafia foi Sami. Ona ia manatuaina lea o se mea. Na sii lona lima. “Ou te leiloa faitau. E mafai faapefea ona ou fesoasoani?”
Sa faamimigi tauau o Juan. “E mafai lava ona e faalogologo mai.”
Ua leva ona iloa e uso o Sami faitau. Ae o Sami sa na o le lima. Na te lei aoao e faitau.
“Ae ou te fia fesoasoani foi!” Sa fai atu ai Sami ma se faanonō.
Sa fusi mai e Mama ia Sami. “Ma o le a e fesoasoani,” o lana tala lea. “E i ai lava le auala e fai ai le mea ua poloaiina ai i tatou e le Atua.”
O le po na sosoo ai, na faapotopoto ai le aiga o Sami e faitau le Tusi a Mamona. Sa latou aumaia uma a latou lava tusitusiga paia, vagana ai Sami. Na tuuina atu e Mama ia te ia se tusi ata o tala o le Tusi a Mamona.
“E le mafai ona e faitauina upu i le taimi nei. Ae e mafai ona e faitauina ata,” sa ia fai atu ai ma se ataata.
Na uu mau e Sami le tusi. O lea la ua mafai foi ona ia faitau faatasi ma lona aiga!
Sa latou auaua’i uma i le faitauina. Sa tilotilo atu Sami i ata na faaalia ai le tala. Ina ua oo i lona taimi, sa ia ta’u atu i isi mea sa ia vaaia i ata. Sa ia faamatalaina le tele o faamatalaga na te mafaia.
A o mavae atu aso, sa manao Sami e faitau atili. Sa aoaoina o ia e Mama i leo o mataitusi taitasi. Ona ia faaali atu lea ia te ia le ala e faaleo ai upu. I ni masina mulimuli ane, sa lei manaomia tele e Sami le tusi ata. Nai lo lena, sa ia faitauina le upu mulimuli o fuaiupu uma e faitau e lona aiga. Sa faitau muamua e Mama le upu, ma sa toe ta’u atu lea e Sami.
I le taimi muamua, sa latou faitau lemu. O le oo atu i le faaiuga o mataupu taitasi na umi se taimi na alu ai. Sa atigū Andre ma Juan ina ua oo i le taimi o Sami. Ae sa latou faitau pea o se aiga.
I sia taimi ma sia taimi, sa faitau atili ia Sami. Sa ia faitauina se upu se tasi o se fuaiupu, ona lua lea o upu, ona tolu lea. Ona amata lea ona ia faitauina se fuaiupu atoa!
I le taufaaiuiuga o la latou sini, na mafai ai e Sami ona faitau na o ia ni nai fuaiupu. Ua lelei atili lana faitau. Ua faatupulaia foi lona fiafia i le Tusi a Mamona.
Mulimuli ane, na faamaeaina e le aiga o Sami le Tusi a Mamona. E lua tausaga na alu ai! O lea la ua fitu tausaga o Sami, ma sa ia aoao ia lele tele lana faitau.
“Faamalo atu!” Na fai atu ai Papa. “Ua tatou faia!”
Sa alalaga faatasi ai Sami ma lona aiga. Sa ia fesoasoani ia i latou e faauma le Tusi a Mamona!
Sa fusi mai e Juan ia Sami i se opo lapoa. “O le a lau sini mo le isi lua tausaga?”
Sa ataata Sami. Sa tu maualuga o ia ma fai mai, “O le a ou toe faitauina le Tusi a Mamona!”
Ata na tusia e Melissa Manwill Kashiwagi