“Tautulimoe i Le Taimi o Tusitusiga Paia,” Uo, Ian. 2024, 30–31.
Tautulimoe i Le Taimi o Tusitusiga Paia
E ui lava o le vaveao, ae sa iloa e Elvira o le faitauina o tusitusiga paia sa aoga.
O lenei tala sa tupu i Nouei.
Sa ala i luga Elvira i le leo o Tama. “Taimi mo tusitusiga paia,” o lana tala lea.
Sa nofo ae i luga i le moega ma mili ona mata fia moe. Na pogisa lava fafo. Ma sa malulu! Sa lei manao Elvira e tuua lona moega mafanafana.
Fai mai Tina o le faitauina o tusitusiga paia o le auala lea e mafai ona latou iloa atili ai Iesu. Ae o le faitauina o tusitusiga paia i taeao uma sa faigata!
Sa savali lemu atu Elvira i luga o le faasitepu ma nofo i tafatafa o lona uso matua, o Sigrid, i luga o le nofoa. Sa ia opoina se aluga ma faapupuu i le mafanafana o lona palanikeke mamoe. Sa i ai ona tuagane i le isi potu e amata ai la latou vasega seminare i le initoneti.
Sa tatagi le telefoni a Tama. Sa ia taliina, ma na faaali mai tagata o le aiga i luga o le lau. Sa laei mama aunt Liv ma sauni mo le galuega. O lo latou tausoga, o Dorthea, sa i ai pea i ona ofu moe, e pei lava o Elvira.
Sa talotalo atu Elvira ia i latou e ala i le valaau i le vitio ma mavava. Sa latou faitau i taimi uma tusitusiga paia faatasi ma Aunt Liv ma Dorthea. Sa latou nonofo i se isi vaega o Nouei e fa itula e mamao ai. Sa faigofie atu mo i latou uma ona faitau tusitusiga paia pe a i ai sa latou sini e valaau le tasi i le isi i aso uma. Ma sa fiafia Elvira e vaai i lona tausoga!
I ni nai minute mulimuli ane, sa auai foi Tina i le valaau. “Talofa, tamaitai” sa ia fai atu ai. Sa malaga o ia mo le galuega i lenei vaiaso, ae sa ia valaau mai pea mo le taimi o tusitusiga paia faaleaiga.
Sa fai se latou tatalo. Ona susue lea e Elvira o ana tusitusiga paia. Sa latou faitauina faatasi le Tusi a Mamona. E feauauai tagata uma i le faitauina o fuaiupu.
Sa faalogo Elvira a o faitau isi, ae sa faigata ona ala pea. Sa toe moe Sigrid i luga o le nofoa. Sa eu o ia e Elvira. Ae sa i ai se mea i le fuaiupu na tosina atu i ai o ia.
“Ma sa ou vaai i se āi uʼamea, ma sa faaauau faasolo ane i le auvai o le vaitafe, ma sa tau mai i le laau lea sa ou tu ai i ona tafatafa.*
“Ou te iloa le tala lea!” Na fai atu ai Elvira. “O le miti lea a Liae.” Sa ia vaai i se vitio o mau e uiga i ai. Sa i ai se laau matagofie ma ni fua papae, ma sa pipii atu tagata i le ai uamea e fesoasoani ia i latou e oo atu i ai.
“E te manatua o le a le mea e faatusa iai le ai uamea?” o le fesili lea a Tina.
“O Tusitusiga Paia?”
“E sa’o lena!” Na fai atu ai Tama. “Na aoao mulimuli ane Nifae o le ai uamea e faatusa i le afioga a le Atua. O le a sou manatu e mafai faapefea ona tatou pipiimau i le ai uamea e pei o tagata i le miti a Liae?”
“O loo matou uuina le ai uamea i le taimi nei!” Sa sii i luga e Elvira lana Tusi a Mamona. “E ala i le i ai o se taimi mo tusitusiga paia.“
Sa luelue le ulu o Tina. “Pe a tatou faitau i tusitusiga paia, tatou te latalata atili atu ia Iesu Keriso. E pei lava ona latalata atu tagata i le laau o le ola ina ua latou pii mau i le ai uamea.”
A o latou faitau pea, sa vaai faalemafaufau Elvira ia te ia lava o pipiimau i le ai uamea ma savali agai atu i le laau matagofie. Sa lei toe fia moe o ia.
E le’i umi ae oo i le taimi e uma ai. Sa manaomia ona o Aunt Liv ma Tina e faigaluega. Ma sa manaomia ona sauni Elvira, Sigrid, ma Dorthea mo le aoga.
“Tofā, tagata uma!” Sa talotalo atu Elvira i lona aiga i luga o le lau. “Alofa atu!”
A o tamoe o ia i le fogafale i lalo e sauni mo le aoga, sa lagona e Elvira le mafanafana i totonu. Ma e le ona o lona palanikeke mamoe. Sa ia iloa o le lagona mafanafana o le Agaga Paia lea na tau atu ia te ia e moni le Tusi a Mamona. O se auala sili lea e amata ai le aso!
Ata na tusia e Hector Borlasca