“O Le Pati Lelei Atoatoa a Papa,” Uo, Ian. 2024, 18–19.
O Le Pati Lelei Atoatoa a Papa
Ae faapefea pe afai e le uma le timu?
O lenei tala na tupu i Samoa.
Sa faamalumalu mai ao pogisa ma puaoa i le lagi. Sa pupula faanoanoa atu iai Alex.
PA!
Ua taalili mai nisi faititili. Sa palasi mamafa mai ni timuga tetele i vaega uma.
Na lūlū le ulu o Alex. Sa le lelei lenei mea. E matua le lelei lava. O nisi taimi, i Samoa, e tele ina timu mo le tele o aso e aunoa ma le laofie. Ae sa ia manao ia lelei atoatoa le aso fanau o lona tamamatua!
Sa alu Alex i lona potu ma tootuli i tafatafa o lona moega.
“Tamā Faalelagi pele e,” na ia faimai ai. “Faamolemole ia aveese timuga i le taimi mo le pati o le aso fanau o Papa taeao. Ua uma ona matou auina atu ia valaaulia. I le suafa o Iesu Keriso, amene.”
Ina ua tu i luga Alex, sa ia vaaia Tina ma Tama o tutu i lona faitotoa. Sa ataata i la’ua.
“Ou te faamoemoe e le afaina ia te oe lo ma faalogo atu i lau tatalo,” o le tala lea a Tina.
Sa ataata Alex. “E le afaina. Nao lo’u manao lava ia faapitoa taeao mo Papa. O le a le tutusa pe a tatou faaaogaina totonu o le fale. O le a leai se avanoa tatou te sisiva ai!”
Sa oomi e Tama le tauau o Alex. “Po o le a lava le tulaga o le a iai le tau, o le a iloa e Papa le tele o lou alofa ia te ia.”
O le taeao na sosoo ai, na fai atu ai Tina ma Tama ia Alex e fai le tatalo faaleaiga. Sa mamafa pea timuga. Ma sa foliga mai pea o le a le laofie lava.
“Faamolemole faamanuia le timu ia alu ese i le taimi mo le pati,” o lana tala lea. “Ma faamolemole faamanuia i matou uma ia maua se taimi fiafia. Aemaise lava Papa!”
Sa matamata Alex i le lagi i le taeao atoa. Mo se taimi umi lava, e leai se mea na suia. Ona i ai lea o se mea ofoofogia na tupu.
“Vaai!” Sa alaga atu ai Alex. “O se vaega lanumoana o le lagi!” Sa taufetuli atu lona aiga i fafo. Sa amata ona kilia ao.
I ni nai itula, sa leai uma ni ao! E oo lava i vaivai i luga o le eleele ua matutu. Sa faanatinati atu Alex e teuteu le fanua. Ua toeititi taunuu mai Papa ma isi mālō valaaulia.
Ina ua taunuu Papa iina, sa faateia o ia. Sa ia tilotilo atu i moli, o meateuteu felanulanuai, ma mālō uma. “Ua matagofie mea uma,” o lana tala lea. “Faafetai tele lava!”
Sa matuai manaia lava le pati e pei lava ona sa faamoemoe iai Alex. Sa latou sisiva i pese e fiafia i ai Papa. Sa tofo lelei meaai—aemaise lava le falaoa popo suamalie. Sa mafai foi ona pepese Alex ma Papa.
Ae o le vaega na sili ona matagofie, o le taimi lea mo le Siva Taualuga. O lenei siva e faatinoina e le tagata e taua e faasino iai le aso. Ma, ioe, o Papa lena!
Sa tu i luga Papa e siva, ae sa ia tilotilo atu ia Alex. “Sau ta sisiva faatasi, Alex!” Sa valaau atu ai Papa. Sa oso i luga Alex ma siva i tafatafa o Papa. E lei umi ae sisiva uma foi isi tagata.
Sa punou ifo Papa e fusi ia Alex. “Ua e aumaia se lagona taua mo au i le aso”, o le tala lea a Papa. “O le pati aso fanau lelei atoatoa lenei.”
Ina ua uma le pati, sa tilotilo ae Alex i luga i le lagi. Sa toe foi mai ao uliuli mafiafia. Sa amata ona toe to ifo timuga i o latou luga. Ae o le taimi lea, sa lei afaina lea ia Alex. Sa ia iloa sa fesoasoani le Tama Faalelagi ia lelei le tau i le taimi atoa o le pati mo Papa.
“Faafetai i Lau Afio mo le tau manaia,” na tatalo ai Alex. “Faafetai i Lau Afio mo se Tamamatua lelei tele.”
Ata na tusia e Augusto Zambonato