E Mafai Ona E Faia se Eseesega

Saunia e Peresitene Susan H. Porter

Peresitene Aoao o le Peraimeri

Ata

Susan H. Porter

Mai se faatalanoaga ma Olivia Kitterman ma Rachel Peterson.

E alolofa tele le Tama Faalelagi ma Iesu Keriso ia te oe. Ona La’ua te alolofa ia te oe, ua La’ua valaaulia ai oe e osia feagaiga, po o folafolaga, ma i La’ua. E amata ona e faia na folafolaga pe a e papatiso.

A uma lou papatisoga, e te maua le meaalofa o le Agaga Paia. E avea oe o se tagata o Le Ekalesia a Iesu Keriso o le Au Paia o Aso e Gata Ai. O lona uiga e faatuatuaina oe e le Tama Faalelagi e tausia au feagaiga.

O le a se mea e mafai ona e faia o se tagata atoa o le Ekalesia e tausia ai au feagaiga? E mafai ona e faafeiloaia isi i le Peraimeri. E mafai ona e nofo i tafatafa o se tasi e fou ma fesoasoani ia i latou e aoao ia pese. E mafai ona e fesoasoani i gaoioiga a le Peraimeri. E mafai ona avea oe o se taitai i lou aiga. E mafai ona e fai atu e fai se tatalo faaleaiga pe faasoa atu mea na e aoaoina i le Peraimeri.

A uma ona e maua le Agaga Paia, e mafai ona e vaaia manaoga o isi i se auala fou. E mafai ona e tatalo i le Tama Faalelagi ma faapea atu, “Fesoasoani mai ia ou iloa po o ai e mafai ona ou fesoasoani i ai i le asō.” Ona mafai lea ona fesoasoani le Agaga Paia ia te oe e maitau se tasi o nofo na o ia pe ta’u atu ia te oe e faatalofa i se uo. E te faia se eseesega tele pe a e filifili e fesoasoani atu i isi. O loo e galue o se tagata o le Ekalesia a le Tama Faalelagi!

E alofa le Tama Faalelagi ia te oe. E finagalo o Ia e te taitai faatasi ma au faataitaiga i soo se mea e te alu i ai ina ia mafai ona e aumaia isi ia latalata atili atu ia te Ia. Ae e le tatau ona e faia nao oe. O le a le taofia lava le fesoasoani mai o le Tama Faalelagi ma Iesu Keriso ia te oe. E mafai ona e lagonaina le mautinoa aua ua e iloa o loo La faatasi ma oe. E mafai ona e vaai faalemafaufau ia Iesu o tu i ou tafatafa i taimi uma.