Talofa mai Taialani!

Aoao e uiga i fanau a le Tama Faalelagi i le lalolagi atoa.

O Taialani o se atunuu i Asia i Sautesasae. E tusa ma le 72 miliona tagata e nonofo ai iina.

Gagana

O le Tai o le gagana aloaia lea a le atunuu. O le alafapeta Taii e 72 ona mataitusi.

I Tai, e mafai ona e faafeiloaia se uo i le faapea atu, “kin khao reu yang.”

O lona uiga, “Ua e ‘ai?”

Faaaliga Songkran

E faamanatu e tagata i Taialani le latou tausaga fou i le tau i vai [water fight] aupito tele i le lalolagi. Latou te faapisipisi vai i le tasi ma le isi e faamanatu ai ia fufulu ese o mea leaga. E tolu aso e faia ai!

Ana o le Taika

O le Malumalu o le Ana o le Taika o se malumalu Lotu Puta lea e toatele tagata e tapuai ma tatalo ai. Ina ia oo i ai, e tatau ona e a’ea laasaga e 1,260 i luga o se mauga. O loo iai ni tulaga vae o le taika i totonu o le ana!

O Maketi Opeopea

I Taialani, e mafai e tagata ona faatau i luga o vaa o vaitafe, e pei o ni faleoloa faaopeopea laiti. O vaitafe o se tasi lea o auala e malaga faataamilo ai i le laumua. O le tele o fale e tutū i luga o pou ina ia mafai ona nonofo ai i luga ae o le vai.

Gaoioiga

Utia e le Gata le Siusiu

Filifili se tasi e avea ma gata 1 ma se isi e gata 2. O isi tagata uma e tutu i tua o le gata 1 ma pipii i le tagata o loo i o latou luma. O le gata 2 e taumafai e pasi le gata 1 ma taumafai e faamamulu ese le tagata mulimuli i le laina. Soo se tasi lava e mamulu ese e pe!

Fua o le Kuka

Som Tam

O le salaki esi moto o se meaai masani lea i Taialani. O se tasi lea o faiga e mafai ona e faataitai iai!

1. I se pesini tele, saeu le 1½ sipuniti suka pama (po o le suka enaana ), 1 ½ sipuniti sosi i’a (po o sosi soy), ma le 2 sipuni ‘ai o le sua tipolo. Saeu seia matala le suka.

2. Tipi ninii ni tipa aniani saina se 2 ma le 1 pe sili atu o pepa feu mumu. Tipi ni pi lanumeamata se 3. Tipi se tamato e tasi ia faalaumiumi.

3. Fisi se esi moto se 1 (po o le 3 apu lanumeamata). Olo pe tipitipi faamanifi.

4. Tuu faatasi mea uma i se pesini ma saeu.

Faafetai i le aiga o Panya mo le faasoaina atu o lenei fua!

Ata na tusia e Mackinzie Rekers