O Se Talanoaga ma Eilish e uiga i le Agaga Paia

O Eilish o se teineitiiti e 12 tausaga le matua mai le Itulagi i Sasae o Sigapoa. Sa matou fesili atu ia te ia pe faapefea ona fesoasoani le Agaga Paia ia te ia.

Tau mai ia i matou e uiga ia te oe lava ia.

Ou te fiafia lava e faitau ma taalo volipolo, ma o le mataupu e sili ona ou fiafia i ai i le aoga o le matematika. O meaai e sili ona ou fiafia i ai o le lasagna, ma o le lanu e sili ona ou fiafia i ai o le lanumumu. A ou tuputupu ae, ou te faamoemoe ia avea ma se loia ma galue i le faamasinoga.

O le a se lagona o le Agaga Paia ia te oe?

Mo au, o le Agaga Paia e faapei o se uo mamae o loo faatasi ma au. Ou te lagona e pei o Ia o se tasi e mafai ona ou faalagolago i ai pe a ou tausia poloaiga ma a’u feagaiga ma le Tama Faalelagi. Ou te mafaufau ia te Ia o lo’u taiala ma la’u soa. E mafai ona Ia fesoasoani mai ia te au e fai filifiliga lelei.

O le a se fautuaga e te tuuina atu i se tasi e le o mautinoa pe na latou lagonaina le Agaga Paia?

O nisi taimi ou te lagona ai foi le le mautinoa pe o ou lagonaina le Agaga Paia. Ae afai e te mafaufau moni i ai, faitau tusitusiga paia, ma tatalo, ma e te maua se lagona lelei e uiga i ai, o le Agaga Paia lena. O nisi taimi o le lagonaina o le Agaga Paia e le na o se lagona. E mafai foi ona avea o se mafaufauga po o se manatu. Afai e te lagona pea le le mautonu, e mafai lava ona e tatalo e le aunoa ma toe ole atu i le Alii mo se fesoasoani.

O anafea na e lagonaina ai le Agaga Paia?

O le tausaga na tea nei, sa ou taalo ai i se tauvaga volipolo. E pei o le toatele o le matou au, sa ou popole. Ina ua amata ona ou taalo, sa lua taaloga na muamua atu na faiaina ai le matou au. Sa matou lotovaivai. Ona fai mai lea e tagata o loo matamata i le taaloga ni upu le lelei, ma sa atili ai ona le lelei o matou lagona. Sa matou faiaina.

Ina ua fesili mai lo’u tina ia te a’u pe na a mai, sa amata ona ou tagi. Sa matuai o’u le fiafia lava. Sa ou alu i lo’u potu, i le mea sa manaia ma filemu, ma faia se tatalo. Ina ua uma ona ou tatalo, sa ou lagonaina le toafilemu ma le filemu sili atu i lou loto. Sa ou iloa sa faamafanafanaina au e le Agaga Paia ma o le a Ia fesoasoani mai pea ia te au. Faatasi ai ma se isi taamilosaga o le a oo mai i lenei tausaga, ou te iloa o le a faatasi o Ia ma a’u a o ou taalo.

O le a se isi mea na fesoasoani ai le Agaga Paia ia te oe?

Sa fesoasoani foi le Agaga Paia ia te au ina ua ou siitia atu mai le Peraimeri i Tamaitai Talavou. Sa ou fiafia lava e siitia atu i Tamaitai Talavou. Ae sa ou lagonaina foi le popole i le taimi lava e tasi. Sa fai foi si ou faanoanoa e tuua foi le Peraimeri.

A o lei amataina la’u vasega muamua, sa ou faia se tatalo ma ole atu i le Tama Faalelagi e fesoasoani mai ia ou fiafia i Tamaitai Talavou. Sa ou lagonaina le filemu i lo’u loto a o ou laa atu i totonu o lo’u potuaoga fou. Sa ou sauni e aoao. Sa fesoasoani le manatuaina e faapea o le a iai pea le Agaga Paia iina mo au!

Ata na tusia e Annabel Tempest