Ko ʻEku Fuofua ʻAukaí

Fai ʻe Emma G., taʻu 7, Lainileni-Palatineiti, Siamane

Hili ha uike ʻe taha mei he Kilisimasí, naʻe talanoa mai ʻeku fineʻeikí mo e tangataʻeikí kau ki he fuofua ʻaukaí. Naʻe fakamatalaʻi mai ʻe heʻeku tangataʻeikí ʻoku mau ʻaukai ke kole ha tokoni makehe mei he Tamai Hēvaní pe ko hono fakahā kiate Ia ʻoku mau houngaʻia lahi ʻaupito. Naʻá ku fakakaukau ke u ʻaukai maʻa hoku kiʻi tuongaʻane ʻoku kei pēpeé ke ne ongoʻi fiemālie ange koeʻuhí he naʻe kamata ke ʻasi mai hono nifó pea naʻe fuʻu mamahi.

ʻI he pō kimuʻa he Sāpate ʻaukaí, naʻe tokoni mai ʻeku tangataʻeikí ke kamata ʻeku ʻaukaí. ʻI he kamatá naʻá ku manavasiʻi, ka naʻá ne tokoniʻi ke u ʻilo ʻa e meʻa ke lea ʻakí ʻi heʻeku lotú. Naʻe talamai ʻe heʻeku tangataʻeikí ke u tokanga ki he ongo ʻoku ou maʻu lolotonga ʻeku ʻaukaí. Kimuʻa peá u mohé, naʻá ku ongoʻi fiefia ʻaupito.

ʻI he pongipongi hono hokó, naʻe kamata ke u fiekaia. Ka naʻá ku palōmesi he ʻikai ke u kai, ko ia naʻá ku tauhi ʻeku palōmesí ki he lelei taha ne u lavá. Naʻá ku feinga mālohi ʻaupito ke ʻoua naʻá ku hanu. Pea naʻá ku fai ha ngaahi ʻekitivitī ke tokoniʻi au ke u ako kia Sīsū koeʻuhí ke ʻoua naʻá ku fakakaukau pē ki he meʻakaí. Naʻá ku ʻaukai fakataha mo ʻeku tangataʻeikí, pea naʻe tokoni lahi ia.

Kimui ange aí, naʻá ku fuʻu fiekaia pea loto ke vete ʻeku ʻaukaí kimuʻa ʻi he taimi ne u palani ki aí. Naʻá ku ongoʻi loto-mamahi, ka naʻe talamai ʻe heʻeku ongomātuʻá ʻoku finangalo ʻa e Tamai Hēvaní ke mau feinga pē. ʻOku ou ʻilo ʻokú Ne ʻofa ʻiate kitautolu pea ʻokú Ne fiefia ʻi heʻeku feingá.