“Tuʻu Mālohi Fakataha,” Ko e Kaumeʻá, Fēpueli 2024, 32.
Kaumeʻa ki he Kaumeʻa
Tuʻu Mālohi Fakataha
Mei ha ʻinitaviu mo Taiana ʻEvelini Nilasoni mo ʻOlivia Kitamani.
Tā fakatātā ʻa Ola Szpunar
Naʻá ku nofo ʻi Siapani ʻi heʻeku tupu haké. Naʻe kau hoku fāmilí ki he tui fakalotu faka-Putá, ʻo hangē ko e ngaahi fāmili tokolahi ʻi ai. Naʻe ʻi ai ha ʻaho ne u feʻiloaki ai mo e ongo faifekau ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻá ku maʻu ha ongo makehe fekauʻaki mo kinaua. Naʻá ku loto ke u hangē ko kinauá.
ʻI heʻeku kau ki he Siasí, ko e toko taha pē ʻi hoku ʻapiakó naʻe hoko ko ha mēmipa ʻo e Siasí. Naʻe faingataʻa ʻa e hoko ko ha mēmipa pē ʻe taha ʻo e siasí ʻi he ʻapiakó. Naʻe fai ʻe ha niʻihi ʻo hoku ngaahi kaungāmeʻa ʻi he ʻapiakó ha ngaahi fili hala, pea naʻa nau loto ke u fai ʻa e meʻa tatau. Naʻá ku faingataʻaʻia ke fili ki he totonú.
Naʻe ʻikai ke u toe ʻalu ki he lotú ʻi ha māhina ʻe fā. Ka ʻi he Sāpate kotoa pē, naʻe tā mai hoku ngaahi kaungāmeʻa mei he lotú ʻo ʻeke mai, “ʻOkú ke fēfē hake?” Naʻe tokoni ia kiate au. Naʻá ku maʻu ha ongo mālohi ʻi ha pongipongi ʻe taha. Naʻá ku ‘iloʻi naʻe fiemaʻu ke u ʻalu ki he lotú ʻi he ʻaho ko iá. Naʻá ku fai leva ia. Talu mei he ʻaho ko iá, mo ʻeku maʻulotu maʻu pē. Naʻá ku fakapapauʻi ke u nofo ʻi he hala ʻo e fuakavá.
ʻI he taimi ʻokú ke nofo ai ʻi ha feituʻu ʻoku ʻikai ke tokolahi ai ʻa e kāingalotu ʻo e Siasí, ʻe lava ke ke ongoʻi tuenoa. ʻE lava ke faingataʻa hono maʻu ha ngaahi kaungāmeʻa leleí. ʻE lava ʻe he ongoʻi tuenoá ʻo ʻai ke faingataʻa hono moʻui ʻaki ʻa e ongoongoleleí. Ka te ke lava ʻo maʻu haʻo fakamoʻoni pē ʻaʻau ke tokoniʻi koe ke ke tuʻu maʻu. Kuó u ʻiloʻi foki ʻoku tokoni lahi ha ʻi ai haʻo ngaahi kaungāmeʻa ʻi he siasí ke tokoniʻi koe.
Kapau ʻokú ke ongoʻi tuenoa, tukutaha ʻa hoʻo tokangá ʻi he muimui kia Sīsū Kalaisí. Hokohoko atu hono ako ʻo e folofolá, fai ʻa e lotú, mo e ʻalu ki he lotú. ʻE holo hoʻo ongoʻi tuenoá koeʻuhí he ʻoku ʻiate koe ʻa e ʻOtuá.