“Ko Hoku Kaungāmeʻa Foʻoú,” Ko e Kaumeʻá, Fēpueli 2024, 39.
Fānaú mo e Toʻu Tupú
Ko Hoku Kaungāmeʻa Foʻoú
ʻI he taʻu kuo ʻosí, ne u fokotuʻu ai ha taumuʻa ki he polokalama Fānaú mo e Toʻu Tupú ke maʻu ha ngaahi kaungāmeʻa foʻou. Naʻe faingataʻa koeʻuhí he kuó u ʻosi maheni mo e tokotaha kotoa pē ʻi heʻeku kalasí talu mei he ako tokamuʻá. Ka ʻi he kalasi nima ʻo e taʻu ní, ne u kau ki ha polokalama naʻe ui ko e “Kaungāmeʻa Fakatoʻú.” ʻI he Kaungāmeʻa Fakatoʻú, ʻoku ngāue ʻa e kalasi nimá mo e fānau iiki ange ʻoku ʻi ai haʻanau ngaahi faingataʻaʻia pe tuai fakaakó.
ʻI he ʻuluaki ʻaho ʻo e Kaungāmeʻa Fakatoʻú, naʻá ku hoa ai mo ha kiʻi tamasiʻi ko Kata.* Naʻe ʻikai ke ne faʻa lea, ka naʻe loto ia ʻi he taimi pē ko iá ke vaʻinga ʻi he fanga kiʻi sikutá (scooter). Naʻá ku heka ʻi ha sikuta, pea kamata ke ne tuli holo au. Naʻá ku kiʻi lele takai peá u kiʻi tuʻu ke ne aʻu mai ʻo puke au. ʻI he hokosia ʻa e taimi ke u ʻalu aí, ko e meʻa pē naʻá ku fiemaʻú ke u foki ki he fale vaʻingá ʻo vaʻinga mo Kata.
ʻI he toe hokosia ʻa e taimi ki he Kaungāmeʻa Fakatoʻú, naʻá ku lue ki he fale vaʻingá. Naʻe kamata ke punopuna ʻa Kata ʻi heʻene sio mai kiate aú. Naʻe mahuʻinga ʻaupito ʻa e momeniti ko iá kiate au. Naʻe mahino ko hono kaungāmeʻa au pea ko hoku kaungāmeʻa ia.
Naʻe pehē ʻe he Tuʻi ko Penisimaní ʻi he Tohi ʻa Molomoná, ko e taimi ʻoku tau tauhi ai ki he niʻihi kehé, ʻoku tau tauhi ai ki hotau Fakamoʻuí. ʻI he tohi ʻa Mōsaia 2:17 ʻoku pehē ai, “Pea vakai, ʻoku ou fakahā kiate kimoutolu ʻa e ngaahi meʻá ni koeʻuhi ke mou ʻiloʻi ʻa e potó; koeʻuhí ke mou ʻiloʻi ʻo ka mou ka ʻi he tauhi ʻo homou kāingá, ʻoku mou ʻi he tauhi pē ʻo homou ʻOtuá.”
ʻOku ou ongoʻi fiefia moʻoni ʻi he taimi ʻoku ou tokoni ai kia Katá. Ka ʻoku ou toe ongoʻi fiefia ange ʻi heʻeku fakakaukau ko e taimi kotoa pē ʻoku ou tokoni ai kia Katá, ʻoku ou tokoni ai kia Sīsū. ʻOku ou fakamālō ki hono tokoniʻi kitautolu ʻe he polokalama ʻa e Fānaú mo e Toʻu Tupú ke tau fokotuʻu mo ngāueʻi ʻa e ngaahi taumuʻá, pea ʻoku tau maʻu ʻa e ngaahi tāpuaki mei hono fai ʻo e ngaahi taumuʻa ko iá—ʻo hangē ko hono kumi ha ngaahi kaungāmeʻa foʻoú!
Tā fakatātā ʻa Miguel Sanchez