“Ngaahi Kaungāmeʻa ʻOku Muimui ʻia Sīsuú,” Ko e Kaumeʻá, Fēpueli 2024, 14–15.
Ngaahi Kaungāmeʻa ʻOku Muimui ʻia Sīsuú
Naʻe ʻikai ke ʻamanaki ʻa Sela ki he fehuʻi ʻa Keití.
Naʻe hoko ʻa e talanoá ni ʻi ʻAositelēlia.
“ʻAlu ā Sela ē! ʻOku ou ʻilo te ke sai pē he ʻahó ni,” Ko e lea ange ia ʻa Mamí.
Naʻe hifo fakavave ʻa Sela mei he kaá. “Mālō!”
Naʻe loto ʻa Sela ke fakaafeʻi mai he ʻahó ni hono ngaahi kaungāmeʻá ki hono papitaisó. Naʻe tokoni ange ʻa Mami ke na akoako hono fakaafeʻi kinautolu ʻi heʻena fononga atu ki he akó.
Naʻe lue hopohopo atu pē ʻa Sela ki he ongo matapā lalahi ʻi hono lokiakó. Naʻá ne ako ʻi ha ʻapiako faka-Kalisitiane. ʻA ia naʻa nau ako fakataha kotoa ai ʻo kau kia Sīsū Kalaisi neongo ne nau kau ki ha ngaahi siasi kehekehe. Naʻe hiki heʻene faiakó ha ngaahi hingoa kehekehe ʻo Sīsū ʻi he matapā ki he lokiakó. ʻOku ʻasi ai ha ngaahi meʻa hangē ko e “Tokotaha Ngāue Mana” mo e “Ko Hoku ʻOtua.” ʻI he ʻaho ní, naʻe fakatokangaʻi ʻe Sela ʻa e fakalea ʻoku pehē “Tokotaha Tauhi Palōmesi.”
Naʻe malimali fiefia ʻa Sela. ʻI he taimi ʻe papitaiso ai iá, te ne hoko foki mo ia ko ha taha ʻoku tauhi ʻene palōmesí!
ʻI he taimi maʻu meʻatokoni hoʻataá, naʻe tangutu ʻa Sela ʻi he tafaʻaki ʻo Keiti mo Sení ʻi he sitepú ʻi tuʻa ʻi he lokiakó. ʻI heʻenau maʻu meʻatokoní, naʻe fakakaukau ʻa Sela ko ha taimi lelei ʻeni ke fai ai ʻa e meʻa naʻá ne akoakó.
Naʻe fakamānava lōloa ʻa Sela. “ʻOku vavé ni haʻaku papitaiso. Te mo fie ō mai ki ai?”
“Ka ko e hā ʻokú ke papitaiso ai he taimi ní?” Ko e fehuʻi ange ia ʻa Keití.
Naʻe feinga ʻa Sela ke manatuʻi ʻa e ngaahi meʻa naʻá na ako mo Mamí. “Koeʻuhí he ʻoku ou loto ke fai ha fuakava. Ko e fuakavá ko ha palōmesi ia mo e ʻOtuá. ʻI he hili hoku papitaisó, te u maʻu leva ʻa e meʻafoaki ʻo e Laumālie Māʻoniʻoní.
Naʻe ala atu ʻa Keiti ki heʻene sanuisí. “Naʻe papitaiso au ʻi heʻeku kei pēpeé.”
Naʻe pehē atu mo Seni, “Mo au foki. ʻOku ou pehē ʻe au naʻe papitaiso ʻa e tokotaha kotoa pē ʻi heʻenau kei pēpeé.”
Naʻe ongoʻi puputuʻu ʻa Sela. Naʻe ʻikai ke ne ʻiloʻi ʻa e meʻa ke ne lea ʻakí.
ʻI he tuku ʻa e akó, naʻe talaange ʻe Sela kia Mami ʻa e meʻa naʻe hokó. “Ko e hā naʻe papitaiso ai ʻa Keiti mo Seni ʻi heʻena kei pēpeé?”
Naʻe tangutu ʻa Mami ʻi hono tafaʻakí. “ʻOku kehe ʻa e meʻa ia ʻoku fai ʻe he ngaahi siasi kehé. ʻI ha ngaahi siasi ʻe niʻihi, ʻoku papitaiso ʻa e fanga kiʻi pēpeé ʻi hano afuhi kinautolu ʻaki ʻa e vaí. Ka ʻoku tau tui ko e taimi ʻoku tau papitaiso aí, ʻoku tau fai ha fuakava toputapu. Pea ʻoku fiemaʻu ke tau lahi feʻunga ke mahino kiate kitautolu ʻa e ngaahi palōmesi ʻoku tau faí.”
Naʻe fakakaukau ʻa Sela ki he ngaahi meʻa kehe naʻá ne fakatokangaʻi ʻi he akó. Naʻe lahi ʻa e ngaahi founga kehekehe naʻe lotu ai hono ngaahi kaungāmeʻá mei he meʻa naʻá ne anga ki aí.
Naʻe fāʻofua ki ai ʻa Mami. “Naʻá ke fai ha ngāue lelei ʻi he ʻahó ni.”
Naʻe ongoʻi fiefia ange ʻa Sela. Naʻe ʻikai ke ne ʻilo ʻa e founga ke tali ʻaki ʻa e ngaahi fehuʻi ʻa hono kaungāmeʻá, ka naʻá ne fai pē hono lelei tahá. Naʻá ne kei loto pē ke fakaafeʻi kinaua ki hono papitaisó.
ʻI he ʻaho hono hokó, naʻe lue fakataha ʻa Sela mo Keiti ki he kalasí. Naʻe tō ha meʻa meia Keiti, pea toʻo hake ia ʻe Sela. Ko ha kahoa naʻe ʻi ai ha foʻi kolosi.
“Mālō!” Naʻe toʻo hake ʻe Keiti ʻa e foʻi kahoá. “Te u fuʻu loto-mamahi kapau ʻe mole ʻeni meiate au. ʻOkú ne fakamanatu mai ʻa Sīsū kiate au.”
Naʻe malimali ʻa Sela mo fakaʻaliʻali hake hono foʻi mama FKT. “ʻOku fakamanatu mai foki ʻe he meʻá ni ʻa Sīsū kiate au! ʻOku ʻuhinga ia ke ʻfili ki he totonú.ʼ ʻOkú ne fakamanatu mai ke u fai ʻa e ngaahi meʻa naʻe mei fai ʻe Sīsuú.”
Naʻe pehē ange ʻe Keiti, “ʻOku ou saiʻia he meʻa ko iá.”
Naʻe aʻu atu ʻa Sela mo Keiti ki he matapā hona lokiakó. Naʻe tuhu ʻa Keiti ki he huafa ʻo Sīsuú ʻi he matapā naʻe pehē “Tokotaha ʻOkú Ne Fakafaingofuaʻi ʻa e Halá.”
“Ko e meʻa ena ʻoku ou saiʻia taha aí!” Ko Keiti ange ia.
“ʻOku ou saiʻia foki mo au ʻi ai.”
Naʻe maʻu ʻe Sela ha ongoʻi fiefia moʻoni. Naʻe talaange ʻe heʻene faiakó ʻoku ʻuhinga ʻa e “Tokotaha ʻOkú Ne Fakafaingofuaʻi ʻa e Halá” kia Sīsū ʻi Heʻene ʻomi ʻa e founga ki he ngaahi meʻa ʻe hokó. Naʻe ʻomi ʻe Sīsū ha founga ke fakakaungāmeʻa ai ʻa Sela ki ha fānau mei ha ngaahi siasi kehekehe lahi! Naʻe ʻi ai ha ngaahi meʻa naʻa nau faikehekehe ai, ka naʻe ʻi ai ha meʻa ʻe taha naʻa nau faitatau ai. Naʻa nau ʻofa kotoa pē ʻia Sīsū mo loto ke muimui ʻiate Ia. Naʻe ʻiloʻi ʻe Sela naʻe fiefia ai ʻa Sīsū.
Ngaahi tā fakatātaá ʻa Violet Lemay