“Ko e ʻAho Mātuʻaki Kovi ʻo Tomí,” Ko e Kaumeʻa, Fēpueli 2024, 4–5.
Ko e ʻAho Mātuʻaki Kovi ʻo Tomí
Naʻe pehē ange ʻe Tomi, “Te u tangutu pē ʻi heni ke ʻoua naʻa toe hoko ha meʻa ʻoku kovi.”
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe māpuhoi pē ʻa Tomi ʻi heʻene tangutu ʻi he sitepu ʻi muʻa ʻo honau ʻapí. He toki ʻaho kovi moʻoni!
ʻI he pongipongi ko iá, naʻe mahua ʻene meʻatokoni pongipongí ʻi hono valá. Naʻe fuʻu siʻisiʻi ʻa e talausese maʻa ia naʻá ne maʻu haké. Naʻá ne tōmui ki he akó. Naʻe tauteaʻi ia ʻe heʻene faiakó ke nofo ʻi loto ʻi he taimi vaʻinga koeʻuhí he naʻe ngalo ʻene tohí. Pea ʻi heʻene foki ki ʻapi mei he akó, naʻá ne humu ʻi he lueʻanga he veʻehalá ʻo lavea hono tuí. Pea ʻi heʻene hū ki tuʻa ke vaʻingá, naʻe molū ʻa e vaʻe ʻo ʻene pasikalá. Kuo fehalaaki e meʻa kotoa!
Naʻe pehē ange ʻe Tomi, “Te u tangutu pē ʻi heni ke ʻoua naʻa toe hoko ha meʻa ʻoku kovi.” Ka ʻi he fuoloa ange ʻene tangutú ko e ʻalu ia ke toe kovi ange ʻa e meʻa naʻá ne ongoʻí.
Pea fanongo atu ʻa Tomi ki ha meʻa ʻoku pakakihi ofi mai. Naʻá ne sio hake ʻo vakai atu kia Misa Sionisoni ʻokú ne tafi mai e ʻū lauʻiʻakau ʻi hono ʻapí. Ko Misa Sionisoní naʻe nofo toko taha pē ʻi he ʻapi hoko maí.
Naʻe ʻikai ke teitei saiʻia ʻa Tomi ʻi hono tafi ʻo e ʻū lauʻiʻakaú. Naʻá ne siofi ʻa Misa Sionisoni ʻokú ne feinga ke tānaki ʻa e ʻū laʻiʻakaú ʻo faʻo kinautolu ki ha fuʻu tangai lahi. Ka naʻe siʻisiʻi pē ʻa e ngaahi lauʻiʻakau naʻe lava ke faʻo ki lotó. Naʻe toutou ngangana pē ʻa e ngaahi laʻiʻakaú ki he kelekelé.
Ko Misa Sionisoni ʻi he sio ki ai ʻa Tomí, ʻokú ne faingataʻaʻia ʻaupito. ʻI he taimi naʻe tafi ai ʻe Teti e ʻū lauʻiʻakaú, naʻe tokoni ʻa Tomi kiate ia ʻi hono puke hake ʻa e tangaí. ʻE faingataʻa ʻaupito ke fai pē ʻe ha toko taha ʻa e ngāue ko iá.
Ko e hā ʻoku ʻikai ke tokoni ai ha taha kiate iá? Naʻe fifili ʻa Tomi.
Naʻe fakatokangaʻi hake leva ʻe Tomi ha meʻa. Te ne lava ʻo tokoni!
Naʻe tuʻu vave hake ʻa Tomi mei he sitepú ʻo lue atu kia Misa Sionisoni. “Te u lava ʻo pukepuke hake ʻa e tangaí kiate koe.”
Naʻe pehē ange ʻe Misa Sionisoni, “Mālō ʻaupito. ʻOku ʻikai ke toe lava ʻo mapelu hoku tuʻá ʻo hangē ko e meʻa naʻe anga ki aí.”
Naʻe puke hake ʻe Tomi ʻa e tangaí mo tokoni ki hono faʻo ʻo e tangai hokó. Naʻá ne toʻo mai leva ha taufale ʻo tokoni ki hono tafi e toenga ʻo e ʻū laʻiʻakaú.
ʻI heʻena ngāue fakatahá, naʻe fai ʻe Misa Sionisoni ha ngaahi talanoa fakakata mo fakaoli. Naʻe kata pē ʻa Tomi ʻo aʻu ki he langa hono keté. Naʻe vave pē ʻa e ngalo atu e mahua ʻene meʻatokoni pongipongí, ʻikai ke maʻu hano taimi vaʻingá, mo e lavea hono tuí.
ʻI he taimi naʻe ui ange ai ʻa Mami ki he maʻu meʻatokoni efiafí, naʻe fakatokangaʻi hake ʻe Tomi kuo ʻosi kotoa ʻa e ʻapí heʻena tafi. Pea naʻe fakafiefia ia!
Naʻe pehē ange ʻe Misa Sionisoni. “Fakamālō atu ki hoʻo tokoní.”
“ʻIkai ha palopalema.” Naʻe taʻataʻalo atu ʻa Tomi. “Ta toki sio ʻamui ange!”
Naʻe hū atu ʻa Tomi ki hono falé ʻo tangutu ʻi he tēpile kaí ʻi he tafaʻaki ʻo e Tetí.
Naʻe ʻeke ange ʻe Teti. “Naʻe fēfē ho ʻahó?”
Naʻe malilmali fiefia ʻa Tomi. “Naʻe hoko ia ko e ʻaho lelei tahá!”
Ngaahi tā fakatātā ʻa Julia Bereciartu