“Ngaahi Kaungamēʻa Moʻoni?” Ko e Kaumeʻá, Fēpueli 2024, 36–37.
Ngaahi Kaungamēʻa Moʻoni?
Naʻe ʻikai ke loto ʻa Henelī ke ne toe tuenoa.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe talaange ʻe Teuleni kia Henelī, “ʻEi, haʻu ʻo sio heni. ʻOku fakaoli!”
Naʻe manavasiʻi ʻa Henelī. Ko ha toe foʻi vitiō ē ʻe taha.
Naʻá ne tangutu ʻi he tafaʻaki ʻo Teuleni mo Tuleikí ʻi he sea moluú. Naʻa nau kakata ʻi he foʻi vitioó, ka naʻe loto ʻa Henelī ia ke pulia hifo he sea fakamoluú ke ʻoua ʻe fanongo ki he ngaahi lea koví.
ʻI he ʻosi pē ʻa e foʻi vitioó, naʻe puna hake ʻa Henelī. “Tau ō ki tuʻa ʻo heka pasikala.”
Naʻe pehē ange ʻe Tuleiki, “ʻAnai.” Naʻe toutou sio pē ʻa Teuleni ki heʻene telefoní.
Naʻe māpuhoi pē ʻa Henelī mo tangutu ki lalo kae huluʻi ʻe Teuleni ha foʻi vitiō ʻe taha.
ʻI he taimi naʻe ʻaka pasikala ai ʻa Henelī ki hono ʻapí, naʻá ne fakakaukau ki he ngaahi taimi naʻá ne faʻa ongoʻi taʻefiemālie ai he fakataha mo Teuleni mo Tuleikí. Hangē ko e ngaahi hua kovi naʻá na fai he ʻapiakó. Pe kaihaʻa ʻāpele mei he fuʻu ʻāpele ʻo Misa Kāsiá.
Mahalo naʻa ʻoku sai ke u talanoa kia Mami, ko e fakakaukau ia ʻa Henelií. Kae fēfē kapau te ne talamai he ʻikai ke u toe ʻalu kia Teuleni mo Tuleiki? Pea te ne toe toko taha pē. Toe hoko pē ʻa e meʻa tatau.
Naʻe fokotuʻutuʻu ʻe Mami ʻa e tēpilé ʻi he taimi naʻe hū atu ai ʻa Henelī ki lotó. Naʻá ne fehuʻi mai, “Hei, naʻe fēfē ho ʻahó?”
Naʻe fakamāhiki pē ʻe Henelī hono ongo umá. Naʻá na tangutu hifo ke maʻu ʻa e meʻatokoni efiafí, pea naʻe fai ʻe Mami ha lotu. Naʻe heu pē ʻe Henelī ʻene supoó ka naʻe ʻikai ke ne kai.
“Naʻe ʻi ai ha meʻa naʻe hoko ʻi he ʻapi ʻo Teulení he ʻahó ni?” Ko e fehuʻi ange ia ʻa Mamí.
Naʻe ongoʻi mafasia fakaeloto ʻa Henelī. Naʻe ʻikai ke ne loto ke tala ʻa e meʻa kotoa pē fekauʻaki mo Teuleni mo Tuleikí. Kae mahalo te ne talange pē ha kiʻi meʻa siʻisiʻi. “Ko ʻemau meʻa pē ʻoku faí ko e sio vitiō. ʻOku ou fie heka pasikala, ka ʻoku ʻikai maʻu mai pē ʻa Teuleni ia mo Tuleiki.
Naʻá ne fehuʻi ange, “ʻOku ʻi ai ha meʻa kovi ʻi he ngaahi vitioó?”
Naʻe vave ʻa e tā ʻa e mafu ʻo Henelií. ʻOku totonu nai ke ne tala ki ai? Naʻe ʻikai ke ne lava ʻo tala ʻa e ngaahi lea koví. He ʻikai ke ne toe lava ʻo nofo toko taha pē. “ʻOku ʻikai ke u ongoʻi ʻoku ou fie talanoa he taimí ni.”
Naʻe mihi fakamānava loloa ʻa Mami. “ʻOku ou ʻiloʻi ko e meʻa faingataʻa ʻa e hiki mai ki hení. Naʻá ke fiefia ʻaupito ʻi he taimi naʻá ke kaungāmeʻa ai mo Teuleni mo Tuleikí. Ka ʻoku ou fakatauange he ʻikai ke na fakamālohiʻi koe ke ke fai pe mamata ʻi ha meʻa ʻoku kovi. ʻOku tokoni ʻa e ngaahi kaungāmeʻa moʻoní ke ke fai ʻa e meʻa ʻoku totonú.”
Naʻe sio pē ʻa Henelī ki lalo. “Ko Teuleni mo Tuleiki ʻa hoku ongo kaungāmeʻa moʻoní.”
“Kapau ko ia, te na fakaʻapaʻapaʻi hoʻo ngaahi filí. ʻO aʻu ki he taimi ʻokú ke ʻikai aí.”
ʻI he ʻaho hono hokó ʻi he ʻapi ʻo Teulení, naʻe nofo pē ʻi he ʻatamai ʻo Henelií ʻa e kupuʻi lea ko e “kaungāmeʻa moʻoní.”
Naʻe pehē ange ʻe Teuleni, “Sio ki he foʻi vitiō foʻou ko ʻení.”
Naʻe pehē ange ʻe Henelī, “ʻIkai.
Naʻe sio fakamamaʻu atu ʻa Teuleni mo Tuleiki kiate ia.
Naʻá ne lea leʻolahi atu ʻi he taimi ko ʻení, “He ʻikai ke u toe sio vitiō au. ʻOku ʻikai ke u saiʻia ʻi he ongo ʻoku ou maʻu mei aí.”
Naʻe pehē ange ʻe Tuleiki, “ʻOua te ke hangē ha pēpeé.”
Naʻe kakata ʻa Teuleni mo Tuleiki. Naʻá na kamata manukiʻi ʻa Henelī he faʻa kula hono matá heʻena faʻa ʻai ke ne sio ʻi ha ngaahi foʻi vitiō pe fai ha ngaahi hua ʻi he ʻapiakó.
Ko e meʻa nai ʻeni ʻe fai ʻe he ngaahi kaungāmeʻa moʻoní? Ko e fakakaukau ia ʻa Henelií.
Naʻá ne tuʻu hake mei he sea fakamoluú. “Te u ʻalu au ʻo heka pasikala. Te mo lava ʻo haʻu kapau ʻokú mo loto ki ai.”
Naʻe pehē ange ʻe Teuleni, “ʻIkai. Te ma nofo pē kimaua ʻi heni.”
Naʻe lue toko taha pē ʻa Henelī ki tuʻa. ʻI he taimi pē naʻe mapuni ai ʻa e matapaá, naʻá ne fakatokangaʻi kuo mole atu ʻa e ongoʻi tailiilí. Naʻá ne ongoʻi maʻamaʻa mo nonga.
Naʻá ne toe fakatokangaʻi leva mo ha meʻa ʻe taha. ʻOku ʻikai ke ne tuenoa. Naʻe ʻiate ia ʻa e Laumālie Māʻoniʻoní. Ka naʻe kei loto mamahi pē ʻa Henelī ʻia Teuleni mo Tuleiki. Ka naʻe fakahā ange ʻe he Laumālie Māʻoniʻoní kiate ia, naʻá ne fai ʻa e fili ʻoku totonú. Naʻá ne malimali pē mo heka heʻene pasikalá ʻo foki ki ʻapi.
ʻŪ tā fakatātā ʻa Matt Smith