“ʻOku ʻIlo ʻe ʻAna ʻa Hono Mahuʻingá,” Ko e Kaumeʻá, Fēpueli 2024, 40–41.
ʻOku ʻIlo ʻe ʻAna ʻa Hono Mahuʻingá
Ko e hā naʻe pau ai ke fuʻu haohaoa maʻu ai pē ʻa Milá?
Naʻe hoko ʻa e talanoá ni ʻi Kānata.
“Mamá, mateʻi mai pe ko e hā?” Ko e lea ia ʻa Mila, ko e taʻokete ʻo ʻAná. Naʻá ne pukepuke hake ʻene lipooti kaati mei he akó. “ʻOku A kotoa ʻeku ngaahi kalasí!”
Naʻe fakahilaʻi ʻe ʻAna hono matá. Ko e hā naʻe pau ai ke fuʻu haohaoa maʻu pē ʻa Milá?
Naʻe pehē ange ʻe Mamá, “Tōatu ʻaupito ia. ʻOku ou laukau ʻaki koe.” Naʻá ne tafoki hake kia ʻAna. “Ka ʻoku fēfē hoʻo māká ʻoʻou?”
Naʻe mono atu ʻe ʻAna ʻene lipooti kātí kia Mamá. Naʻe sio pē ʻa ʻAna ki lalo mo pehē ange, “ʻOku sai pē.” Naʻe feinga mālohi ʻa ʻAna ʻi he akó. Ka naʻe ʻikai ke lelei ʻene ngaahi māká ʻo hangē ko Milá.
Naʻe pehē ange ʻe Mamá, “ʻOku ou laukau ʻaki mo koe foki.” Naʻá ne fāʻofua kia ʻAna.
Mahalo ko ʻene ʻai pē ke u ongoʻi fiemālie ange, ko e anga ia ʻa e fakakaukau ʻa ʻAná. Naʻe poto ange maʻu pē ʻa Mila ʻiate ia.
Ka naʻe ʻikai ko e akó pē naʻe sai ange ai ʻa Mila ʻia ʻAná. Naʻá ne lelei ange ʻi he meʻa kotoa pē. Naʻe tokolahi ange hono ngaahi kaungāmeʻá. Naʻe fakaʻofoʻofa ange hono louʻulú. Naʻá ne lelei ange ʻi he sipotí. Naʻe saiʻia ʻa e taha kotoa ʻia Mila.
Naʻe feinga ʻa e ongomātuʻa ʻa ʻAná ke tokoni.
Naʻe faʻa pehē ange ʻa Papi, “ʻOkú ke fuʻu mahuʻinga ʻaupito, ʻAna.”
Naʻe faʻa pehē ange ʻa Mamá, “ʻOkú ke talavou mo poto.”
Ka naʻe ʻikai ke ongoʻi ia ʻe ʻAna ʻokú ne mahuʻinga pe talavou pe poto. ʻI hono fakafehoanaki ia kia Milá.
Naʻe ʻi ai ha ʻaho ʻe taha naʻe fai ai ha veimau ʻa ʻAna mo Mila. Naʻe ngulungulu pē ʻa ʻAna mo pehē ange, “Hangē te ke toe mālohi pē.”
Naʻe ʻeke ange leva ʻe Mila. “Te ke loto ke ʻai ha vaʻinga kehe? Te ta lava ʻo ʻalu ki tuʻa. ʻOku ou tui te ke mālohi ʻiate au he soká!”
“ʻIkai!” Naʻe lea fakaʻita ange ʻa ʻAna. “ʻOku ou pāhia au he foʻí, pea ʻoku ou foʻi au ʻi hoʻo laka maʻu pē ʻiate aú.” Naʻá ne ongoʻi hangē ʻoku lili ha fuʻu vai vela ʻiate iá.
Naʻe fuʻu ʻohovale lahi ʻa Mila. “ʻOku ou kole fakamolemole atu—”
Naʻe tafoki ʻa ʻAna ʻo lele ki hono lokí ʻoku teʻeki ai ke ʻosi atu ʻa e lea ʻa Milá. Naʻá ne haʻaki mai e matapaá, mo pehē mai, “He ʻikai pē te u teitei haohaoa au ʻo hangē ko koé!”
Naʻe tokoto ʻa ʻAna ʻi hono mohengá ʻo foʻohifo he piló. Naʻá ne ongoʻi ʻita ʻaupito!
Naʻá ne mihiʻi fakamānavaloloa ʻene mānavá. ʻI he taimi naʻe fiemālie ai ʻa ʻAná, naʻá ne tūʻulutui leva ʻo fai haʻane lotu. Naʻá ne lotu ʻo pehē, “ʻE Tamai Hēvani, kātaki ʻo tokoniʻi au. ʻOku ou meheka maʻu pē kia Mila.” Naʻe leʻo siʻi pē hono leʻó. “ʻOku ou ongoʻi he ʻikai pē ke u teitei lelei feʻunga au. ʻOkú Ke ʻofa moʻoni ʻiate au?”
Naʻe mafola atu ha ongo māfana mei he ʻulu ʻo ʻAná ki hono loulouhiʻi vaʻé. Naʻá ne maʻu leva ha foʻi fakakaukau. Naʻe ʻofa ʻa e Tamai Hēvaní ʻi he kakaí koeʻuhí he ko ʻEne fānau ʻa kinautolu. ʻO ʻikai koeʻuhí ko e lelei tahá ʻa kinautolu. Mahalo naʻe ʻikai ke fiemaʻu ia ke lelei ange ʻa ʻAna ʻi ha taha kae toki ʻofaʻi ia. Naʻe ʻofaʻi pē ia ʻi he taimí ni.
Naʻe kei tūʻulutui pē ʻa ʻAna. Naʻe ʻikai ke ne loto ke mole atu ʻa e ongo fakaʻofoʻofa ko iá. Naʻe ʻofa moʻoni ʻa e Tamai Hēvaní—ʻiate ia.
Naʻe fai mai ha kiʻi tukituki leʻo siʻi ʻi he matapaá. Ko Mamá ia. Naʻá ne tangutu ʻi he veʻe mohenga ʻo ʻAná. “Naʻá ku fanongo naʻá ke loto mamahi.”
Naʻe kamokamo pē ʻa ʻAna. “ʻIo. Ka ʻoku ou fiemālie ange ʻi he taimí ni. ʻOku ou ʻiloʻi ʻoku ʻikai totonu ke u ʻita kia Mila ʻi heʻene maʻu ha maaka leleí pe ikuná. Ka naʻe fai haʻaku lotu, ʻa ia naʻe tokoni lahi.”
Naʻe puke mai ʻe Mamá ʻa ʻAna. “Ko e hā ʻa e ongo naʻá ke maʻu ʻi hoʻo lotú?”
Naʻe pehē ange ʻe ʻAna, “Ongoʻi fiemālie. Naʻá ku ongoʻi naʻá ku mahuʻinga lahi ki he Tamai Hēvaní.”
Naʻe fusiʻi mai ʻe Mamá ʻa Ana ke ofi ange. “Naʻá ke fuʻu mahuʻinga maʻu pē—ki he Tamai Hēvaní pea mo kimaua. Ka ʻoku ou fiefia he ʻokú ke ʻiloʻi ia ʻi he taimí ni.”
“Mo au pē foki. Te u ʻalu ʻo kole fakamolemole kia Mila ʻi heʻeku kaikaila ange kiate iá.” Naʻe malimali ʻa ʻAna. “Mo ʻeke ange pe ʻoku fie vaʻinga soka!”
Ngaahi tā fakatātā ʻa Marina Martin