Tē ora nei Iesu Mesia

Nā te peresideni Henry B. Eyring

Tauturu piti i roto i te Peresidenira’a Mātāmua

Fa’atanohia mai roto mai i te a’ora’a « Tōna Vārua ’ia vai i pīha’i iho ia ’outou », Liahona, Mē 2018, 86–89 ;’e « Ua ti’afaahou oia », Liahona, ’Ēperēra 2013, 4–5.

E tauturu teie tau o te matahiti ia tātou ’ia ha’amana’o tātou i te tūsia o te Fa’aora ’e i tōna ti’afa’ahoura’a mai te mēnema mai.

I te hō’ē mahana, tē ti’a ra māua tā’u vahine i mua i te hō’ē mēnema i Ierusalema. I roto mai, ’ua ’ite atu māua i te hō’ē pārahira’a ’ōfa’i tei fa’aturuhia i ni’a i te papa’i.

’Ua puta mai rā te tahi atu hōho’a i tō’u vaerua. ’Ua feruri au ia Maria i te mēnema ta’ata ’ore. Tē ta’i ra ’oia nō te mea ’ua pohe te Fa’aora. ’Aita ’oia i ’ite tei hea tōna tino.

Nō reira, « ’ua fāriu ti’a atu ra ’oia i muri, ’ite atu ra ’oia ia Iesu i te ti’a-noa-ra’a, ’aita rā ’oia i ’ite ē ’o Iesu ». (Ioane 20:14). ’Ua mana’o Maria ē ’o ’oia te ta’ata tāmā ’āua.

« ’Ua parau mai ra Iesu iāna, e Maria » (Ioane 20:16). I teienei, ’ua ’ite atu Maria iāna. ’Ua ’ite Maria ē, ’ua ti’afa’ahou mai ’oia.

Nō te mea ’ua upo’oti’a Iesu Mesia i ni’a i te pohe, e ti’afa’ahou mai te mau tamari’i pā’āto’a a te Metua i te ao ra i roto i te hō’ē tino ’o tē ’ore roa e pohe.

Tē ha’amāuruuru nei au i tō tātou Metua i te ao ra nō te hōro’a ’o tāna Tamaiti here. Tē māuruuru rahi nei au ’ia ’ite ē, ’ua fa’atusia ’oia nō tā tātou mau hara ’e ’ua ti’a mai nā roto i te ti’afa’ahoura’a. Tē fa’a’ite pāpū nei au ē, ’o Iesu te Mesia tei ti’afa’ahou mai, tō tātou Fa’aora ’e tō tātou hi’ora’a maita’i roa a’e.

Huira nō te ’ā’amu nō Pāsa

Tāpūpū i te mau menemene ’e ’a tu’u atu i te menemene mātāmua i ni’a a’e i te tahi. ’A fa’a’āpo’o i rōpū ’e ’a tāpe’a maita’i ia rāua ma te tu’u i te hō’ē pine. I muri iho, ’a fa’a’ohu i te menemene i ni’a roa nō te fa’ati’a i te ā’amu nō Pāsa.

Te ’ā’amu nō Pāsa

Haere mai ra Iesu i Ierusalema i te sābati o te ’āma’a tāmara (hi’o Mareko 11:7–11).
’Ua hōro’a Iesu i tāna mau pipi te ’ōro’a mo’a (hi’o Mataio 26:26–28).
’Ua pure Iesu i roto i te ō nō Gētesemāne (hi’o Mareko 14:32–36).
’Ua pohe Iesu nō tātou i ni’a i te sātauro (hi’o hi’o Luka 23:46).
’Ua vai noa tōna tino i roto i te hō’ē mēnema e toru mahana (hi’o Mataio 27:59–64).
’Ua ora fa’ahou mai ’oia. ’E tē ora nei ’oia i teie mahana. (Hi’o Mataio 28:6–9.)