« Mau tōpata nō te fa’aro’o », Hoa, Māti 2024, mau ’api 30–31.
Mau tōpata nō te fa’aro’o
E fifi tō Iakoba—e vare’a-noa-hia ’oia i te ta’oto !
’Ua tupu teie ’ā’amu i Peresīria.
« Iakoba, ’ua ’ite ’oe i te pāhonora’a ? » Ui a’era ’o Lelis vahine.
’Ua ’ara’ara a’e ra te mata ’o Iakoba ’e amo ihora i tōna upo’o i ni’a a’e i te ’iri ’ohipara’a. ’Ua hi’o atu tōna mau hoa ato’a o te piha ha’api’ira’a iāna. ’Ua hi’o atu ato’a tāna ’orometua iāna. ’Ua ’ite atu ’oia i tōna pāpāri’a i te ahura’a. ’Ua vare’a fa’ahou ’oia i te ta’oto i roto i te piha ha’api’ira’a !
« Tē tātarahapa nei au e te ’orometua. Lelis », ’ua parau ’oia. « E nehenehe ānei ’oe e ui fa’ahou i te uira’a ? »
« ’Oia mau. ’A fa’aea rā i te ta’oto i roto i te piha ha’api’ira’a ».
’Ua fa’ahe’e a’era ’oia i ni’a i tōna pārahira’a. « ’Ē, m’dam ».
’Ua tae mai Iakoba i roto i tāna fare ha’api’ira’a ’āpī, tau hepetoma noa i ma’iri a’enei. Mea au roa nāna ’ia ha’api’i mai, ’e e mea maita’i roa tōna mau hoa ha’api’ira’a. Tē vai ra rā hō’ē fifi—e vare’a-noa-hia ’oia i te ta’oto ! E mea ātea roa tāna fare ha’api’ira’a ’āpī, nō reira e ti’a iāna ’ia ’ara ’oi’oi roa ’ia tae ’oia i reira i te hora.
I te ha’amatara’a, e mea ’ōhie ’ia rōtahi i roto i te piha ha’api’ira’a. ’Ua riro mai rā i te fifi roa mai. I te tahi taime, nō tōna rohirohi rahi, e vare’ahia Iakoba i te ta’oto.
I te mahana i muri iho, ’ua ani te ti’a fa’atere nō te fare ha’api’ira’a ia Iakoba ’e tōna nā metua, ’ia fārerei iāna. ’Ua ’ata’ata ’oia ’e ’ua fāri’i poupou ia rātou i roto i tāna piha tōro’a.
« Tē ’oa’oa nei au tei i’ō nei ’outou », tāna ïa parau. « E pīahi maita’i roa ’o Iakoba. Terā rā ’ua parau tāna ’orometua ha’api’i ē, ’aita ’oia e ’ana’anatae ra i tāna mau ha’api’ira’a. I te tahi taime, ’aita ’oia e rōtahi ra, ’e e au ra ’ua rohirohi roa ’oia. Mea maita’i ānei ’oia ? »
’Ua tā’iri’iri tōna metua vahine i te upo’o. « ’Ua rave itoito Iakoba i te ’ohipa nō te haere mai i teie fare ha’api’ira’a, terā rā e mea ātea roa i tō mātou fare. Tītauhia iāna ’ia ara ’oi’oi i te mau mahana ato’a. Nō reira, e vare’ahia ’oia i te ta’oto i roto i tāna mau ha’api’ira’a i te po’ipo’i ».
« E pa’i, ’o te reira noa ? » te parau ïa a te ti’a fa’atere. « E ti’a ia ’oe e tāmata i te tōpata taofe ! ’A tu’u i te tahi mau tōpata taofe pūai i roto i te inu a Iakoba i te mau po’ipo’i ato’a. E fa’avai ara noa te reira iāna ».
Fa’atu’etu’e ihora Iakoba i tōna mata. « ’Aita roa tō mātou ’utuāfare e inu nei i te taofe, e m’dam ».
E huru pe’ape’a ri’i tō te ti’a fa’atere. « E mea fifi roa nō ’oe ’ia ha’api’i mai, mai te peu e vare’ahia ’oe i te tā’oto. E ti’a ia ’oe ’ia feruri i te reira ».
I tō rātou fa’aru’era’a i te piha tōro’a a te ti’a fa’atere, ’ua pe’ape’a te mana’o ’o Iakoba. ’Ua hina’aro ’oia e rave maita’i a’e i te fare ha’api’ira’a, ’ua hina’aro ato’a rā ’oia e pe’e i te mau fa’auera’a.
I taua pō ra, ’ua tai’o tōna ’utuāfare nō ni’a i te Parau Pa’ari i roto i te mau pāpa’ira’a mo’a.
I te taera’a i te taime nō Iakoba, ’ua tai’o ’oia, « ’e te feiā mo’a ato’a ’o tē ha’amana’o i te ha’apa’o ’e i te rave i teie mau mea i parauhia nei … e ’itea ho’i ia rātou te pa’ari ’e te mau tao’a rahi nō te ’ite. ’E e horo ho’i ’e e ’ore roa e paruparu, ’e e haere ’e e ore roa e rohirohi ».*
I muri iho, ’ua tupu mai te hō’ē mana’o i roto iāna !
’Ua ti’a mai ra ’oia mai ni’a mai i tōna parahira’a. « ’Eiaha i te mau tōpata taofe, e fa’a’ohipa vau i te mau tōpata o te fa’aro’o ! »
« E aha te aura’a tā ’oe e parau ra ? » ui a’era tōna metua tāne.
’Ua ’ata ’o Iakoba. « I te mau po’ipo’i ato’a hou te tāmā’ara’a i te po’ipo’i, e nehenehe tātou e pure ’e e ani i te Metua i te ao ra ’ia ha’amaita’i mai iā’u ’ia ’ore au e vare’a i te taoto. E riro tā tātou mau pure mai te mau tōpata nō te fa’aro’o ! »
’Ua ’ata ato’a ’o māmā ’e ’o pāpā. « E mana’o fa’ahiahia roa te reira ! » ’Ua parau pāpā.
I te po’ipo’i a’e, ’ua tūturi tō rātou ’utuāfare ’e ’ua pure rātou ’ia fāri’i Iakoba i te pūai nō te vai ara noa. ’Ua nā reira ato’a rātou i te mahana i muri iho. ’E i te mahana i muri iho. I te mau pō ato’a, e tāmata ato’a ’o Iakoba e haere ’oi’oi e ta’oto. ’E i te mau po’ipo’i ato’a, e fa’aro’o tō te ’utuāfare ’o Iakoba ē, e tauturu te Metua i te ao ra iāna.
I te roara’a o te tau, ’ua tupu te ’ohipa o tō rātou mau tōpata nō te fa’aro’o. ’Ua ti’a ia Iakoba ’ia rōtahi i te mahana tā’āto’a ! ’Ua pāhono mai te Atua i tā rātou mau pure. ’E ’ua ’ite Iakoba ē ’ua ’oa’oa te Atua iāna nō te pe’era’a i te Parau Pa’ari.
« ’Ua ineine nō te ha’api’ira’a, e Iakoba ? » ’Ua ui atu te ’orometua Lelis i te hō’ē po’ipo’i ’a tomo mai ai ’oia i roto i te piha ha’api’ira’a.
’Ua tā’iri’iri Iakoba i te upo’o ma te mata ’ata’ata rahi i ni’a i tōna hōho’a mata. E mau tōpata nō te fa’aro’o tāna hou te ha’api’ira’a. ’Ua ineine ’oia nō te mau mea ato’a !
Fa’ahōho’ara’a nā Raquel Martín