« E tāu’aparaura’a ’e ’o Will nō ni’a i te tauturura’a i te mau tītīhoria », Hoa, Māti 2024, 40–41.
E tāu’aparaura’a ’e ’o Will nō ni’a i te tauturura’a i te mau tītīhoria
Nō Pennsylvanie mai o Will, i Marite. ’Ua ui mātou iāna i te tahi mau uira’a nō ni’a i te hō’ē ’ōpuara’a ’o tāna i rave nō te tauturu ia vetahi ’ē.
’A fa’ati’a mai ia mātou i te parau nō ’oe.
E 11 matahiti tō’u. Mea au nā’u i te tu’e i te popo ’e te hui’ete, te hāmani i te mau faraoa monamona, te ’au, te fa’ahe’e ’e te fa’ahe’e nā ni’a i tō’u mau tia’a huira. E ha’uti ato’a vau i te piāna ’e te fīra. Tā’u ’ū au roa o te nīnamu moana ïa ’e tā’u mā’a au roa ’o te huero moa ïa (ha’aperehūhia, farai, tunu pape—e mea au pauroa nā’u !). ’Ia pa’ari ana’e au, e hina’aro vau ’ia riro ’ei taote mai tō’u pāpā.
E aha te mea i te fa’atupu i te mana’o e tauturu ?
’Ua fa’aro’o vau ē, e rave rahi ’utuāfare nō te tahi atu fenua e horo ’ē ra nō te pāruru ia rātou. ’Ua haere ra te tahi pae o rātou i te hō’ē fenua tāpiri mai. I te reira taime, ’ua feruri au « nāhea vau e nehenehe ai e tauturu ia rātou ? »
’Ua pure au nō te ’ite nāhea vau e nehenehe ai e tauturu. I muri iho, ’ua fāri’i tō’u māmā i te hō’ē rata uira a te Sōtaiete Tauturu o te titi. Tē ani ra rātou i te mau ta’ata ’ia hōro’a i te mau tao’a nō te hōro’a i te mau ’utuāfare tītīhoria. ’Ua ’ite au ’ua pāhonohia tā’u pure !
Mea nāhea tō ’oe tauturura’a ?
E mea au nā’u te tunu i te mā’a (tā’u mā’a ’aravihi roa ’o te faraoa monamona ïa) nō reira, ’ua fa’aoti au e ho’o i te mau faraoa monamona nō te fāri’i i te moni nō teie mau ’utuāfare. ’Ua hāmani au i te mau ’api fa’atīani ’e ’ua tere au nā ni’a i tō’u tia’a huira, nā roto i te vāhi fa’aeara’a nō te ’ōpere i te reira. ’Ua haere ato’a mai tā’u ’ūrī, ’o Coco.
E rave rahi o tō’u mau ta’ata tāpiri mai tei ’ana’anatae roa i te ho’o mai i tā’u mau faraoa monamona. ’E te moni i noa’a mai iā’u, ’ua ho’o mai au i te mau pāni ’e te mau farai pāni nō te hōro’a.
E aha te mana’o i tae mai ?
E mana’o au maita’i tā’u i fāri’i, i te ’itera’a e nehenehe teie mau ’utuāfare e tunu i te mā’a ma te fa’a’ohipa i te mau pāni ’e te mau farai pāni. E nehenehe noa vau e feruri, e riro te hō’ē mā’a tei tunuhia i te fare ’ei tāmāhanahanara’a, tei roto ana’e ’outou i te hō’ē fenua ’āpī.
’Ua ha’api’i mai au i roto i te Paraimere ē « ’a tāvini ai ’outou i tō ’outou mau ta’ata tupu, tē tāvini ra ïa ’outou i tō ’outou Atua » (Mosia 2:17). ’Ua putapū vau i te here o te Metua i te ao ra nō’u ’e nō te mau ta’ata e haere mai nei i tō’u vaefenua.
E aha te a’o tā ’oe e hōro’a i te hō’ē ta’ata ’o tē hina’aro e tauturu ?
’A ’imi i te mau rāve’a nō te tāvini i roto i tā ’outou pāroita ’aore rā titi. E nehenehe ato’a ’outou e tauturu i te hō’ē pūhapara’a i tō ’outou vaefenua. Tē vai ra te mau rāve’a nō te tauturu i te mau ta’ata ato’a !
Fa’ahōho’ara’a nā Dave Williams