« Te moa ufa ’e te mau fanau’a moa », Hoa, Māti 2024, 4–5.
Te moa ufa ’e te mau fanau’a moa
« ’Ua parau Iesu Mesia i te reira i roto i te mau pāpa’ira’a mo’a », parau a’era pāpā.
’Ua tupu teie ’ā’amu i te fenua Marite.
Tē hi’ohi’o ra e pae fanau’a moa veuveu re’are’a ia Clara. Pīp, pīp, pīp !
I te mau tau fa’atupura’a rā’au, e ho’o mai te ’utuāfare ’o Clara i te mau fanau’a moa nō te fa’a’amu. I teie mahana, ’ua tauturu atu Clara ia pāpā i te fa’aho’ira’a i te reira i te fare, nō te ora ’e te tahi atu mau moa ufa.
Te purūmu tā rāua e tere ra e mea ’āpo’opo’o ïa. Tē tāpe’a ra rā Clara i te ’āfata o te fanau’a moa i ni’a i tōna turi ’āvae. Tē ’ōmiri mārū noa ra ’oia i te hō’ē ma tōna manimani rima. ’Auē te marū ē !
I te ho’ira’a Clara ’e ’o pāpā i te fare, ’ua haere atu rāua i te ’āua moa i muri. Te ’āua moa ’o te hō’ē ïa fare maeha’a i reira te mau moa ufa e ora ai ’e e hāmani ai i tō rātou ’ōfa’ara’a.
« I teihea moa ufa e tu’u atu ai i teie mau fanau’a moa ?» Ui a’e ra pāpā.
’Ua hiʼo ha’ati a’era Clara. Tē tietie ra te hō’ē moa ufa i te ’āretu i roto i te hō’ē ha’apu’era’a repo. E tano maita’i te ’āretu tei vauvauhia ’ei ’ōfa’ara’a nō te mau fanau’a moa ’āpī. Pēnei a’e e riro mai ’oia ’ei metua vahine moa ufa maita’i.
« Terā » ’ua parau Clara ma te toro te rima i ni’a i te moa ufa.
’Ua tātara marū mai ra pāpā i te hō’ē fanau’a moa i te ’āfata ’e ’ua tu’u atu i pīha’i iho i te moa ufa. ’Ua hi’o a’era te moa ufa i te fanau’a moa. Pei a’era te moa ufa i tōna pererau ’e mo’e ’oi’oi atu ra te fanau’a moa !
« Tei hea atu ra ho’i ?« »Mea maita’i ānei te fanau’a moa ? » Ui a’era Clara.
Tā’iri’iri ihora pāpā i te upo’o. « ’A hi’o mai ! »
Faura a’era te fanau’a moa i tōna upo’o mai raro a’e mai i te pererau o te moa ufa.
« Nō te aha te moa ufa i nā reira ai ? » Ui mai ra Clara.
« Nō te pāruru i te fanau’a moa », ’ua parau pāpā. « E tu’u ’oia i te fanau’a moa i raro a’e i tōna pererau nō te pāruru ’e nō te tāmāhanahana ».
’Ua tauturu atu Clara ia pāpā i te tu’u atu i te tahi atu mau fanau’a moa i tō rātou ra māmā ’āpī. Pei a’e ra te moa i tōna pererau nō te ha’aputuputu ia rātou pā’āto’a.
« ’Ua ’ite ’oe, ’ua parau Iesu Mesia nō te reira i roto i te mau pāpa’ira’a mo’a ? » parau a’e ra pāpā.
« E parau mau ? » Ui mai ra Clara. « E aha tāna i parau ? »
« E fa’a’ite atu vau ia ’oe ».
Haere atu ra Clara ’e ’o pāpā i roto i te fare. Rave mai ra pāpā i tāna mau pāpa’ira’a mo’a. I muri iho, ha’amata a’era i te tai’o.
« E rave rahi tō’u ha’aputuputura’a ia ’outou mai te moa e ha’aputuputu i tōna mau fanau’a i raro a’e i tōna nā pererau, mai te mea e tātarahapa ’outou ’e e fāriu mai iā’u nei ma te ’ā’au hina’aro mau ».*
’Ua feruri Clara i te fanau’a moa tāta’itahi i raro a’e i te pererau o te moa ufa. « Nō reira, e ha’aputuputu ato’a ïa Iesu ia tātou mai te moa ufa tei ’āfa’i mai i te mau fanau’a moa i raro a’e i tōna pererau ? », ui atu ra Clara.
« Te reira iho ā », pāhono mai ra pāpā. « E pāruru ’oia ia tātou mai te moa ufa e pāruru i tāna mau fanau’a moa. Terā rā, e pāruru ’oia ia tātou hau atu i te to’eto’e. ’Ua ’ite ’oia ’ia pēpē ana’e tātou, ’ia ma’ihia, ’aore rā ’ia ’oto. E hōro’a mai ’oia ia tātou te hau ’e te tāmahanahana. E aupuru ’oia ia tātou ».
I te po’ipo’i a’e, ’ua fa’a’amu Clara i te moa ufa ’e i tāna mau fanau’a moa ’āpī. ’Ua ha’aferuri te reira iāna i te pāpa’ira’a mo’a tei tai’ohia e pāpā. ’Ua ’ata’ata ’oia ma te ferurira’a ia Iesu. ’Ua ’ite ’oia ē, ’ua here Iesu iāna ’e ’ua aupuru iāna, mai te moa ufa tei aupura i tāna mau fanau’a.
Fa’ahōho’ara’a nā Assia Ieradi