« Te tahi atu ā taime ’e ’o Max », Hoa, Māti 2024, 42.
Pāpa’ihia e ’outou
Te tahi atu ā taime ’e ’o Max
I te hō’ē taime, ’ua haere au e pūhapa i te pae tahatai ’e tō’u ’utuāfare, te tahi mau hoa ’e tā’u ’ūrī ’o Max. ’Ua ’au mātou ’e ’ua ha’uti i te mahana tā’āto’a. I muri iho, ’ua māta’ita’i mātou i te ha’apa’a’inara’a ahitiri i te pōirira’a. E taime fa’ahiahia roa nō mātou pā’āto’a.
I te otira’a te ha’apa’a’inara’a ahitiri, ’ua ’imi au ia Max. Tēra rā ’ua haere ’ē ʼoia ! ’Ua ri’ari’a vau ’e ’ua tuō ē ’ua mo’e ’o Max. ’A tahe noa ai tō’u roimata, ’ua ’imi pā’āto’a mātou iāna nā roto i te uru rā’au. ’Ua tae mai te hō’ē reo iti ha’iha’i e parau mai ra iā’u ’ia pure, nō reira ’ua nā reira vau. ’Ua maemae roa tō’u tino tā’āto’a mai te nūi, ’e ’ua ri’ari’a vau nō Max.
’Aita ’oia i ’itehia mai ia mātou, nō reira ’ua ho’i atu mātou i tō mātou fare ’ie. ’Ua tāmau noa vau i te pure i roto i tō’u upo’o, ’ua ha’amata rā vau i te ’ere i te tīa’ira’a. ’Ua ta’i au nō te fa’ata’oto iā’u.
Tau hora i muri mai, ’ua fa’aara mai tō’u nā metua iā’u. Tē pārahi ra Max i pīha’i iho noa iā’u ! ’Ua fa’aro’o tō’u nā metua i te ta’i o te fifi ’arapo’a ’o Max i rāpae’au i tō mātou fare ’ie. ’Ua tāpe’a pāpū maita’i vau iāna ’e ’ua ha’amāuruuru marū noa i te Atua nō te pāhonora’a i tā’u mau pure.
E toru matahiti i muri mai, ’ua pēpē te tua ’o Max ’e ’ua māuiui roa ’oia. ’Aita e nehenehe e fa’aora iāna, nō reira ’ua aroha atu mātou iāna. ’Ua tāmāhanahana te Metua i te ao ra iā’u ’e ’ua hōro’a mai iā’u te hau. ’Ua fa’aha’amana’o mai te Vārua Maita’i iā’u ē, ’ua fātata ’o Max i te mo’e ia mātou a toru matahiti i teienei, ’ua tauturu rā te Atua ia mātou ’ia ’itehia mai ’oia. ’Ua māuruuru roa vau i tōna hōro’a mai ia mātou i te tahi atu ā taime nō te here ia Max.
’Ua ’ite au e pāhono te Atua i te mau pure ’e e hōro’a mai i te tāmāhanahanara’a i roto i te mau tāmatara’a. Nō te mau ta’ata ato’a te tāra’ehara a Iesu Mesia. ’Ua māuruuru rahi roa vau nō te ’ohipa tā Iesu Mesia ’e tā te Metua i te ao ra i rave nō tō’u ’utuāfare ’e nō’u.
Fa’ahōho’ara’a nā Camarie Brunson