« E Pāsa e ’ore e mo’ehia », Hoa, Māti 2024, 14–15.
E Pāsa e ’ore e mo’ehia
’Ua putapū Jonas i te here o Iesu ’a hīmene ai ’oia.
’Ua tupu teie ’ā’amu i Firirane.
’Ua ’ata Jonas ’a arata’i ai ’oia i tōna mau taea’e i roto i te piha fa’afa’aeara’a nō te purera’a pō ’utuāfare. E nehenehe ā ’oia e hau’a i te noanoa o te māmoe ’eu monamona o te tāmā’ara’a i te pō o Pāsa. ’E e nehenehe ā ’oia e tāmata i te pasha monamona, tā rātou mā’a ri’i hope’a tumu nō Pāsa.
I muri a’e i tō te ’utuāfare pārahi-hau-ra’a mai, ’ua ti’a mai te tua’ane o Jonas, ’o Tristan.
« ’Ia maita’i i teie Pāsa ! » ’ua parau Tristan. ’Ua ha’amata ’oia i tā rātou purera’a pō ’utuāfare nā roto i te hō’ē hīmene ’e te pure. I muri mai, ’o te taime ïa nō tā rātou fa’anahora’a hīmenera’a ta’a ’ē. ’Ua fa’aineine te tā’āto’ara’a i te hō’ē hīmene nō ni’a ia Iesu Mesia.
E ha’uti Tristan i te tītā, ma te ha’apa’o maita’i i te fa’a’otora’a. I muri iho, e fa’ata’i tōna taea’e Einar i te piāna. E horohoro haere noa tōna manimani rima nā ni’a i te mau pitopito. ’Ua fa’ata’i ato’a māmā, ’o pāpā ’e te tahi atu mau taea’e ’o Jonas i te mau hīmene. ’Ua au roa Jonas i te fa’aro’ora’a i te pehe a tōna ’utuāfare.
’Ua tae te taime nō Jonas i teienei. Huti a’era ’oia i te aho ’e ha’amata iho ra i te hīmene.
« I te tahi taime ’ia hemahia vau ’ia mā’iti i te ’ino, e tāmata vau i te pe’e i te reo iti marū : ’A here i te tahi ’e te tahi mai tā Iesu i here ia ’oe ».*
’A hīmene ai Jonas, ’ua fa’a’īhia tōna ’ā’au i te here. ’Ua ’ī tōna mata i te roimata o te ’oa’oa. Mai te mea ra ē, tē parau mai ra te Vārua Maita’i ia Jonas ē, ’ua here tō tātou Metua i te ao ra ’e ’o Iesu iāna.
« Māuruuru i te tā’āto’ara’a i te fa’a’itera’a mai i tō ’outou mau tālēni », ’ua parau pāpā. Mau mai ra iāna te hō’ē hōho’a. Tē fa’a’ite ra te reira ia Iesu Mesia e tūturi ra ’e e pure ra i pīha’i iho i te hō’ē tumu rā’au. « ’O vai tei ’ite i te mea e tupu ra i ni’a i teie hōho’a ? »
’Āfa’i a’era Jonas i tōna rima i ni’a. « ’O Iesu e pure ra i Gēsetemāne ».
Fa’ari’i a’era pāpā ma te upo’o. « ’Ē. I reira ’oia i te putapūra’a i tō tātou mau māuiui ’e tō tātou mau ’oto ato’a ».
« ’Ua haere ’oia i te ’ō nō Gētesemāne hou ’oia ’a pohe ai », parau mai ra māmā. « I muri a’e i tōna pohera’a, ’ua ora fa’ahou mai ’oia. E tuha’a ana’e te reira nō tāna tāra’ehara. ’Ua rave Iesu i teie mau mea ato’a nō tōna here ia tātou ».
Fa’atere a’era māmā i te hō’ē video nō ni’a i te Pāsa mātāmua. I te hopera’a te video, ’ua fa’aea muhu ’ore noa te tā’āto’ara’a e hō’ē minuti te roa. ’Ua putapū fa’ahou iho ra Jonas i te here o te Metua i te ao ra ’e o Iesu Mesia.
« ’Ua tae ānei i te taime nō tā tātou fa’a’oa’oara’a ? » ’ui mai ra Jonas.
Ti’a mai ra māmā i ni’a mai tōna pārahira’a ’e haere atu ra i te ’āfata tauiha’a. « ’Ē ! Jonas, e tauturu mai na ? »
Tātara mai ra Jonas ’e ’o māmā i te tāpiri, te mau pā’oti ’e te hō’ē pu’e ve’a a te ’Ēkālesia. Vauvau a’era i ni’a i te tahua. I muri iho, hōro’a mai ra māmā i te tā’āto’ara’a tā rātou buka ’ā’amu ta’a ’ē nō Pāsa. « E hāmani ana’e i te hō’ē hōho’a anoihi nō Iesu i roto i tā tātou buka ’ā’amu nō Pāsa ».
Pārahi iho ra Jonas i ni’a i te tahua ’e ’īriti a’e ra i tāna buka pāpa’i.
Rave mai ra pāpā i te tuira nō te pāpa’i i roto i tāna buka ’ā’amu. « I pīha’i iho i tā ’outou mau hōho’a, e nehenehe ’outou e pāpa’i i te mea tā ’outou e rave nō te pe’e i tō tātou Metua i te ao ra ’e ia Iesu, nō te riro hau atu ā mai ia rāua te huru ».
Hurihuri a’era Jonas i te mau ’api o te hō’ē o te mau ve’a. ’Ua ’itehia mai iāna te hō’ē hōho’a nō Iesu Mesia e ’ata’ata ra.
’Ua tāpūpū Jonas i te hōho’a, tāpiri ihora i rōpū i te ’api o tāna buka ’ā’amu. ’Ua feruri ’oia i te here rahi ’o tāna i putapū nō ’ō mai i te Fa’aora ra. I muri iho, ’ua pāpa’i ’oia : « E pe’e au i te Metua i te ao ra ’e ia Iesu nā roto i te fa’aro’ora’a ia pāpā ’e ia māmā ’e e tauturu ’ia rave i te ’ohipa i te fare ».« »’Ua here rahi atu ā vau i tō’u mau taea’e ». ’Ua fa’a’ite atu ’oia i te reira ia māmā. ’Ua tai’o māmā i te mea tāna i pāpa’i ’e ’ua ’ata’ata.
E ha’amana’o maoro ā Jonas i teie Pāsa. ’Ua putapū ’oia i te here o Iesu Mesia ’a hīmene ai ’oia ’e ’a ha’api’i mai ai nō ni’a iāna. ’E ’ua putapū ’oia i te here o Iesu, ’a tamata ai ’oia i te riro mai iāna te huru.
’Ua here mau te Metua i te ao ra ’e ’o Iesu Mesia ia Jonas. ’E ’ua here ato’a Jonas ia rāua.
Fa’ahōho’ara’a nā Steliyana Doneva