« Hō’ē hi’ora’a maita’i », Hoa, Māti 2024, 32.
Te hoa i te hoa
Hō’ē hi’ora’a maita’i
Nō roto mai i te hō’ē uiuira’a ’e ’o Haley Yancey.
E ’ere au i te melo nō te ’Ēkālesia i tō’u tamari’ira’a. I tō’u roa rirora’a ’ei ta’ata pa’ari ’e ’ei ta’ata putu faufa’a i bāpetizohia ai au.
E ta’ata putu faufa’a ato’a tō’u metua tāne. ’Ua pe’ape’a roa ’oia i tō’u tomora’a mai i roto i te ’Ēkālesia. ’Ua parau ’oia : « E’ita ’oe e inu fa’ahou i te ’ava. E mea fifi roa i roto i te mau rurura’a i reira te mau ta’ata ato’a e inu ’āmui ai ».
’Aita rā vau i ha’ape’ape’a. ’Ua fa’aoti au ē, ’ia hōro’a ana’e mai te hō’ē ta’ata i te inu ’ava nā’u, e parau atu vau : « ’Aita, māuruuru ». I muri iho, e poro’i au i te tahi atu inu.
’Ua ma’iri te mau matahiti, ’e ’ua nā reira vau e rave rahi taime. I muri a’e i te hō’ē taime, ’ua ’ite a’era tō’u mau hoa ’ohipa. Mai te mea e hōro’ahia mai te inu ’ava nā’u, e parau mai rātou : « ’Aita ’o Mathias e inu. ’A hōpoi mai i te tahi atu inu nāna ». ’Ua fa’aea rahi ato’a te tahi o rātou i te poro’i i te ’ava. « ’Aita ato’a vau e hina’aro », ’ua parau rātou.
I te hō’ē taime, ’ua haere mai te tahi mau rātere i te hō’ē rurura’a. ’O rātou ana’e tē inu ra i te ’ava.
’Ua ui mai rātou iā’u : « Nō te aha ’aita te ta’ata e inu ra i te ’ava ? E mau melo ānei rātou pā’āto’a nō tā ’oe ’ēkālesia ? »
« ’Aita », ’ua parau atu vau.
’Aita vau i poro i tō’u mau hoa ’ohipa i te Parau Pa’ari. ’Ua vai pāpū noa vau i roto i tō’u mau ti’aturira’a, ’e ’ua ’ite rātou i tō’u hi’ora’a.
E nehenehe ato’a ’outou e riro ʼei hi’ora’a maita’i. E ’ite mai te mau ta’ata ’ia mā’iti ana’e ’outou i te mea maita’i. E nehenehe ’outou e tauturu noa ia rātou ma te orara’a i te ’evanelia.
Fa’ahōho’ara’a nā Matt Smith