« Te ’ōfa’i vare’au ’ana’ana », Hoa, Māti 2024, 10–11.
Te ’ōfa’i vare’au ’ana’ana
Mai te peu e fa’a’ite ’oia i te parau mau, e riri ānei pāpā iāna ?
’Ua tupu teie ’ā’amu i te fenua Holane.
’Ua tātara Marie i tāna ’āfata pirū nō te hi’ohi’o i tāna mau ’ōfa’i iti nehenehe. ’Ua rave hō’ē-hō’ē mai ’oia i roto i tōna rima. Te mea ’ūte’ute, i muri iho te matie, i muri iho te ’uo’uo teatea.
Pātōtō mai ra māmā’ū i te ’ōpani piha tā’otora’a. « ’Ua ineine nō te haere ? »
« ’Ē ! » Tu’u māite iho ra Marie i te mau ’ōfa’i i roto i tāna ’āfata.
Tē ’āfa’i ra māmā’u ia Marie i te fare vaira’a buka. ’Eiaha noa nō te māta’ita’i i te mau buka. Tē vai ra i reira te hō’ē fa’a’ite’itera’a ta’a ’ē nō te mau ’ōfa’i ! E ’oa’oa rahi tō Marie.
I te taera’a tō rāua pere’o’o utara’a ta’ata i te fare vaira’a buka, tomo atu ra Marie ’e ’o māmā’ū i roto. ’Ite atu ra rāua i te mau ’aira’amā’a ’e te mau ’aira’amā’a o te mau ’ōfa’i nehenehe. Vetahi e mea ’ana’ana ’e te mānina. E hōho’a fa’ahiahia mau tō te tahi.
« ’A hi’o na i teie ! » Fa’atoro a’era māmā’u te rima i ni’a i te hō’ē terehē rahi. Tē vai ra te mau fao iti nīnamu e fāura ra nā te mau vāhi ato’a.
Te tahi atu ’aira’amā’a tē vai e rave rahi ’ōfa’i iti menemene. ’Ua hi’o Marie i te mau ’ū ato’a. I te hōpe’a roa, tē vai ra hō’ē ’ōfa’i vare’au, mea na’ina’i, te ’ana’ana ’e te mānina.
’Aita tā’u e ’ōfa’i vare’au, mana’o a’e ra Marie. E tano maita’i te reira nō tāna ha’aputura’a ’ōfa’i.
Hi’o a’era Marie ati a’e iāna. Tei te tahi atu ’aira’ama’a o māmā’ū. ’Aita e ta’ata ’ē nā pīha’i iho mai. E’ita roa teie ’ōfa’i iti e ma’iri nō te hō’ē ta’ata, e ’ere ānei ?
’Ohi mai ra Marie i te ’ōfa’i ’e tu’u atu ra i roto i tōna putē.
I te reira pō, ma te ’ōfa’i vare’au pāruruhia i roto i tāna ’āfata piru, haere atu ra Marie i ni’a i te ro’i.
« ’Ua ineine ānei nō te tai’ora’a te ’ā’amu ? » Pārahi mai ra pāpā i ni’a i te ro’i ’e hōhora a’era te ve’a Hoa.
Mohi atu ra Marie i roto i tōna ahu ta’oto ’e fa’aro’o atu ra. Tē fa’ati’a ra te ’ā’amu nō te hō’ē tamaiti tei tātarahapa i muri a’e i tōna ravera’a i te mā’itira’a ’ino.
’A tai’o noa ai pāpā, e au ra ia Marie te tāviriviri ra tōna ’ōpū. Huri a’era ’oia i te tahi pae ’e fa’ahuri atu ra i tōna tūru’a. Terā rā, tē ’ite ra ’oia iāna e ’ere i te mea maita’i. ’E ’aita i nehenehe iāna e fa’aea i te feruri i te ’ōfa’i vare’au.
Fa’aoti a’era pāpā i te ’ā’amu. « Mea maita’i ’oe ? »
’Aita Marie i ’ite e nāhea rā. Mai te peu e fa’a’ite ’oia ia pāpā, e riro pāpā i te riri mai.
Pēnei a’e e ’ite ’oia nāhea i te tauturu iāna.
Ne’e marū atu ra Marie i rāpae i te ro’i ’e tātara mai ra i te ’ōfa’i vare’au i tāna ’āfata. « ’Ua rave mai au i teie mea i te fare vaira’a buka i teie mahana ». ’Ua tahe te roimata o Marie. « Tē tātarahapa maita’i nei au ».
Tauahi iho ra pāpā iāna. « E mea maita’i roa ’ia fa’a’ite mai iā’u i te parau mau.« »Tē ha’apeu nei au nō tō ’oe itoito ’ia vai parauti’a noa ».
Ha’amata iho ra te ’ōpū o Marie i te maita’i mai. ’Aita pāpā i riri mai !
« ’E maoti Iesu, e nehenehe tātou e tātarahapa. Mai te au i te ’ā’amu », ’ua parau pāpā. « Nō te aha e’ita tāua e nehenehe e fa’aho’i i te ’ōfa’i i te fare vaira’a buka ? »
Tāpiri a’era Marie i te mata. « ’Aita ! E riri mai rātou »
Tu’u atu ra pāpā i te rima i ni’a i te tapono o Marie. « E riri ri’i paha rātou. Tē mana’o nei rā vau ē, e oa’oa rātou ’ia fa’aho’i atu ’oe i te reira. ’E e ’ite ato’a ’oe i te maita’i i roto ia ’oe ».
Huti māite iho ra Marie i te aho ’e ’ua fa’ari’i. « Nā reira ».
Rave mai ra Marie i te hō’ē ’api parau ’e ha’amata iho ra i te pāpa’i i te hō’ē rata. « Tē tātarahapa nei au i te ravera’a i te reira », ’ua pāpa’i ’oia. « ’Ahani pa’i au ’aita i nā reira. Tē hina’aro nei au e fa’a’āfaro i te mau mea ato’a ».
Tu’u atu ra ’oia i te rata i roto i te vihirata. I muri iho ’ua tu’u ato’a i te ’ōfa’i vare’au i roto.
« E ho’i fa’ahou mai tāua i ni’a i te reira ’ohipa ananahi », ’ua parau pāpā. « E aha tō ’oe huru i teienei ? »
« Maita’i a’e », ’ua parau Marie. « Tē vai nei hō’ē ’ohipa e toe ra iā’u e rave ».
Tūturi iho ra Marie i pīha’i iho i tōna ro’i ’e pure atu ra. « Tē tātarahapa nei au i te ravera’a i te ’ōfa’i », ’ua parau ’oia. « E’ita roa vau e ’eiā fa’ahou. Māuruuru i te tauturura’a mai iā’u ’ia vai itoito ’e ’ia vai ha’avare ’ore ».
I tōna ho’ira’a e ta’oto, ’ua ’ite Marie i te hau. Ananahi e fa’a’āfaro ’oia i te mau mea ato’a. ’E ’ua ’ite ’oia ē, e tauturu mai te Metua i te ao ra ’e ’o Iesu iāna. Maoti rāua, e maita’i te mau mea ato’a.
Fa’ahōho’ara’a nā Katie Rewse