Te tahi ’ohipa e rave nō te Mai, pe’e mai

Nō te pō ’utuāfare ’aore rā te ’imira’a pāpa’ira’a mo’a—’aore rā nō te ’ārearea noa !

26 nō Fepuare–3 nō Māti

Mau hiero ’api parau

Nō te 2 Nephi 11–19

’Ua ha’api’i Isaia ē, e mau vāhi ta’a ’ē te mau hiero i reira tātou e ha’api’i mai ai nō ni’a i te Metua i te ao ra ’e ia Iesu Mesia (hi’o 2 Nephi 12:3). ’A hāmani i tā ’outou iho hiero ! Tūfetu i te hō’ē ’api parau e toru tuha’a. Tāpū i te hō’ē hope’ara’a nā te porotoru. Tātara i te tūfetura’a ’e e pāpa’i hōho’a ia ’outou iho i rōpū.

Nō te mau tamari’i ’āpī a’e : ’A hi’o ’āmui i te hō’ē hōho’a nō te hiero. ’A parau i te huru ’outou e nehenehe ai e putapū i te here i roto i te fare o te Atua, mai tō ’outou iho fare.

4–10 nō Māti

Hīmene i te mau ’itera’a pāpū

Nō te 2 Nephi 20–25

’Ua fa’a’ite Isaia i tōna ’itera’a pāpū nō Iesu Mesia. ’Ua parau oia ē, ’o Iesu tōna pūai ’e tāna hīmene (hi’o 2 Nephi 22:2). E aha te mau hīmene nō ni’a ia Iesu tā ’outou e au roa ? ’A parau nō te aha ’outou e au ai i te reira. I muri iho ’a hīmene ’āmui i te reira !

Nō te mau tamari’i ’āpī a’e : Hīmene ’āmui « Raconte-moi les histoires de Jésus » (Chants pour les enfants, 36). ’A ani i tā ’outou tamari’i ’ia fa’a’ite mai i te hō’ē hōho’a nō Iesu i te mau taime ato’a, e fa’ahitihia ai ’oia i roto i te hīmene.

11–17 nō Māti

Te fa’ati’ara’a ’ā’amu te a’o nā ni’a i te a’o

Nō te 2 Nephi 26–30

E tauturu te Metua i te ao ra ia tātou ’ia ha’api’i mai « te a’o nā ni’a iho i te a’o », ’aore rā, te tahi vāhi iti i te taime hō’ē (2 Nephi 28:30). ’A fa’ati’a ’āmui i te hō’ē ’ā’amu pāpa’ira’a mo’a au-roa-hia, te vāhi iti i te taime hō’ē ! E fa’a’ohu te ta’ata hō’ē i muri mai i te tahi nō te tai’o i te hō’ē pereota o te ’ā’amu, ē tae roa i te otira’a te ’ā’amu.

Nō te mau tamari’i ’āpī a’e : E tauturu te Metua i te ao ra ia tātou ’ia ha’api’i mai nō ni’a ia Iesu Mesia. ’A huri i te ’api 48 ’e ’a fa’a’ū i te hō’ē tuha’a o te hōho’a i te taime hō’ē.

18–24 nō Māti

Te mau ta’ahira’a nō te pe’e ia Iesu

Nō te 2 Nephi 31–33

’Ua ha’api’i Nephi ē, e pe’e tātou ia Iesu Mesia ’ia vai ana’e tō tātou fa’aro’o iāna, ’ia tātarahapa, ’ia bāpetizohia, ’ia fāri’i i te hōro’a o te Vārua Maita’i, ’e ’ia tāpe’a māite ē tae noa atu i te hope’a (hi’o 2 Nephi 31). ’A pāpa’i i te ta’ahira’a tāta’itahi i ni’a i te ’api parau ta’a ’ē, i muri iho ’a hōhora te reira i ni’a i te tahua. E tāpiri te hō’ē ta’ata i tōna mata ’e e tai’o e tae roa i te 10, ’āre’a rā te tahi pu’era’a e ti’a ïa rātou i ni’a i te hō’ē ’api parau. I muri iho e parau te ta’ata tai’o i te hō’ē o te mau ta’ahira’a nō te pe’e ia Iesu. Terā ta’ata tei ti’a i ni’a i te ’api parau, e tai’o ’oia i muri iho.

Nō te mau tamari’i ’āpī a’e : ’Ia vai ana’e tō tātou fa’aro’o ia Iesu Mesia, e pe’e ïa tātou i te mea tāna i parau. ’A hāmani i te hō’ē rēni ’e ’a hāhaere ai. Te ta’ata i mua ’o ’oia te ta’ata fa’atere. E tīpe’e te ta’ata tāta’itahi i te haerera’a a te ta’ata fa’atere. ’A fa’a’ohu nō te riro mai ’ei ta’ata fa’atere !

25–31 nō Māti

Te mau riri nō Pāsa

Nō te Pāsa

Maoti Iesu Mesia, e ora fa’ahou mai tātou i muri a’e i tō tātou pohera’a (hi’o Alama 40:22–25). ’A hāmani i te mau riri pāpie nō te Pāsa i te ’api 17. ’A tu’u i tā ’outou mau riri i te vāhi i reira tō ’outou ’utuāfare e nehenehe ai e ’ite i te reira, nō te tauturu ia ’outou ’ia ha’amana’o i te Fa’aora i teie hepetoma.

Nō te mau tamari’i ’āpī a’e : ’A tai’o nō ni’a i te Pāsa i te ’api 46. ’A ani i tā ’outou mau tamari’i ’ia fa’atoro i ni’a i te hōho’a tāta’itahi ’o Iesu, ’a tai’o ai ’outou.

Fa’ahōho’ara’a nā Katy Dockrill