“Auauna Atu i le Faleteuoloa,” Uo, Iuni 2024, 4–5.
Auauna Atu i le Faleteuoloa
“E fesoasoani tagata uma o le Ekalesia i le tasi ma le isi, o lea e leai se tasi o i tatou e fiaai.”
O lenei tala sa tupu i le ISA.
Sa oso Dominic i totonu o le taavale ma fusi lona fusipau. “O fea ta te o i ai?” na ia fesili atu ai i lona Tina.
“O le a ta o e auauna atu i se tasi,” o le tala lea a Tina. “E manaomia e se aiga le fesoasoani i le mauaina o ni meaai.”
Sa la tietie atu i se fale tele efuefu. E leʻi oo muamua lava Dominic iina.
“O le a lenei nofoaga?” na ia fesili ai. “Sa ou faapea o le a ta o i le faleoloa e aumai ni meaai.”
Sa tapuni e Tina le faitotoa o le taavale. “Ua ta’ua o se faleteuoloa a epikopo. E pei lava o se faleoloa, sei vagana ai e te le tau totogia meaai iinei.”
Na faaatoatoa le pupula a Dominic. “E avefua mea uma?”
“O se mea lava faapena,” sa fai atu ai Tina. “A tatou anapopogi, e mafai ona tatou totogia se taulaga anapogi, e pei lava o le auala tatou te totogi ai le sefuluai. O lena tupe e fesoasoani e faatau ai meaai e alu i totonu o lenei faleteuoloa. Ma a le lava se tupe a se tasi mai le lotu, e mafai ona latou talosaga atu i le epikopo mo se fesoasoani ma sau iinei e avatu ai mea latou te manaomia. I nofoaga e leai se faleteuoloa, e i ai isi auala a le epikopo e fesoasoani ai.”
Sa savavali atu Dominic ma Tina i le faitotoa. “O lea la, o le aiga o loo ta fesoasoani i ai i le asō e le lava ni tupe e faatau ai ni meaai?”
“E le o le taimi nei,” o le tala lea a Tina. “Ae o le mafuaaga lena o loo ta fesoasoani i ai! E fesoasoani tagata uma o le Ekalesia i le tasi ma le isi, o lea e leai se tasi o i tatou e fiaai.”
Sa lue atu le ulu o Dominic. “Ou te fiafia o le a mafai ona latou maua ni meaai.”
“Faapena foi a’u. “Ia ta o loa! O le a ou faaali atu ia te oe le auala e fai ai.”
Sa savavali atu Dominic ma Tina i totonu o le faleteuoloa. Sa i ai laina o fata e eseese mea sa i ai, e pei o se faleoloa.
Sa toso mai e Tina se pepa mai lana ato. “Ua ta’ua lenei mea o se ‘oka meaai.’ O se lisi o mea e manaomia e le aiga. Sa galulue faatasi lo tatou epikopo ma le Peresitene o le Aualofa e fesoasoani ia i latou e fai le lisi.”
“E te faaaogaina i taimi uma se lisi pe a e faatau foi, Tina!” Na fai atu ai Dominic.
“E sa’o! O le a ta faamautinoaina ia maua mea uma i luga o le lisi ina ia maua e le aiga mea latou te manaomia.
Sa maua e Tina se taavale faifaatau. Ona fesoasoani lea o se volenitia ia i la’ua e sue mea o loo i luga o le lisi. Sa tulei e Dominic le taavale faifaatau a’o tuu e Tina mea i totonu.
“Ua lelei, ou te manatu ua uma ta’ua!” Sa toe tilotilo Tina i le lisi. “Sei ta faamautinoaina ua i ai mea uma. “Sa ta aumaia ni fa’i?”
“Ioe!” Na fai atu ai Dominic.
“Falaoa?”
“Ioe!”
Ina ua uma, sa fesoasoani le volenitia ia i la’ua e tuu meaai i totonu o le la taavale. Sa talotalo faatofa atu Dominic.
“O le a sou faalogona?” Na fesili atu ai Tina ao la o atu i le fale.
“Lelei tele!” Na fai atu ai Dominic. “Ae … e le lelei tele foi.”
Sa te’i Tina. “Aisea ua e lagona e le lelei tele ai?”
“Ona o le vaaia o na meaai uma na ou fiaai ai! E mafai ona fai le ta meaai o le aoauli pe a ta o i le fale?”
Na ataata Tinā. “Ae a!” O se tagata faigaluega malosi e pei o oe e manaomia foi ni meaai.”
Sa toe ataata atu ia Dominic. Sa ia lagona le fiafia mo le fesoasoani i se tasi i le asō.
Ata na tusia e Dagmar Smith