“Faitau Ou Manuia,” Uo, Iuni 2024, 36–37.
Faitau Ou Manuia
“Ou te faamoemoe ia lava mea ta te faatau atu e totogi ai se taavale e o atu ai i le lotu i lenei vaiaso,” o le tala lea a Tama.
O lenei tala sa tupu i Filipaina.
“Mano po! Talofa lava!” Sa fai atu ai Arkin ia Tinamatua ina ua taunuu i le fale. Sa ia faafeiloaia o ia e ala i le ifo ma oomi le pito i tua o lona lima i lona muaulu.
Sa ataata Tinamatua. “O loo faatali lou tamā mo oe ma le i’a. Faatopetope ma alu e fesoasoani ia te ia!”
O le tamā o Arkin o se tagata faigaluega faufale. Sa galue malosi o ia ia maua se tupe mo lo latou aiga. Ae sa le tele ni a latou tupe. Ma o nisi taimi e le mafai e Tama ona maua se galuega. Ina ua tupu lena mea, sa fesoasoani Arkin ia te ia e faatau atu tinapa e fai i le fale (i’a faaasu).
Sa tuu e Arkin ma Tama ia pepa tinapa i totonu o se ato ma aveina i fafo.
“Faafetai mo lou fesoasoani ia te a’u,” o le tala lea a Tama. “Ou te faamoemoe ia lava mea ta te faatau atu e totogi ai se taavale e o atu ai i le lotu i lenei vaiaso.”
Sa nonofo le aiga o Arkin i se tamai nuu e lata i laufanua araisa ma se vaituloto e i ai i’a. Sa na o ia lava, Tama, Tinamatua, ma lona tuafafine matua. Sa mamao ese i latou mai le falesa. Ina ia oo atu i le lotu, e tatau ona latou totogia le faimalaga atu ai i se uilaafi (o se uila afi ma se taavale toso). Afai e leai se latou tupe, e tatau ona latou savavali mo le lua itula.
“Ou te faatuatua o le a fesoasoani mai le Tama Faalelagi ia i ta’ua.” “Ta o!”
Na muamua ona la o atu i le fale o le latou tuaoi o Aling Nena. Sa ia faatauina mai tinapa mai ia i la’ua i taimi uma.
“Talofa lava!” Sa fai atu ai Arkin.
Sa tatala e Aling Nena le faitotoa mo i la’ua. “Oi, ua i ai iinei tagata e toalua e sili ona ou fiafia i ai!” sa ia fai mai ai ma se ataata. Sa ia tuuina atu ia Tama sina tupe, ma sa ia tuuina atu ia te ia ni tamai pepa e lua o tinapa.
“Faafetai mo le faatau mai ia ma’ua!” Sa fai atu ai Arkin. “E matua tele lava lau fesoasoani mo i matou.”
Sa toe savavali atu Arkin ma Tama i le auala.
“Tinapa! Tinapa! Tinapa Tofolelei!” Sa valaau atu ai Arkin. Sa toatele tagata na faatau mai i’a mai ia i la’ua.
Sa vevela fafo, ae sa le afaina ia Arkin. Sa la usuina ma Tama le “Faitau Ou Manuia” a o la savavali. O aso uma o se faamanuiaga mo i latou!
Sa faaauau pea ona la pepese ma faatau atu. Sa toetoe lava a le iloa e Arkin ua gaogao le la ato.
“Vaai, Tama! Ua ta faatauina uma i’a!” Sa fai atu ai Arkin.
Sa ataata Tama. “Ioe, o se faamanuiaga.”
Sa fiafia Arkin sa la faatauina atu le tele o tinapa. O le a fesoasoani e totogi ai nisi o latou pili, ma sa lava mo se latou taavale i le lotu i le Aso Sa!
Ae o taeao o le Aso Toonai, ma o le taimi lena latou te fesoasoani ai e faamama le falelotu. I le taeao po lava na sosoo ai, na feala ae ai Arkin ma Tama e amata le savaliga umi i le falelotu. Sa la savavali i taimi uma ina ia sefe ai le tupe mo le Aso Sa.
“E te le o vaivai ea i le faamamaina o le tou falelotu i Aso Toonai uma?” na fesili atu ai Tinamatua ae la te le’i o ese.
Sa tuu atu e Tama lona lima i luga o le tauau o Tinamatua. “O le faamamaina o le falelotu o se tasi lea o auala tatou te auauna atu ai i le Alii.”
Sa lue atu le ulu o Arkin. “Tatou te maua faamanuiaga mo le faamamaina o le falelotu. E fesoasoani le Tama Faalelagi ia taulia a tatou tinapa ina ia mafai ona tatou faatauina meaai!”
A o la savavali, sa usuina e Arkin ma Tama nisi viiga. Ona la’ua galulue malosi lea e faamama le falelotu. Sa solo e Arkin le pefu mai faamalama ma nofoa uma. Sa salu e Tama ma solo le foloa.
Ina ua mae’a, sa faasoa atu e le epikopo ni pandesal (pani suamalie) i tagata uma sa fesoasoani. Sa ’ai e Arkin lana meaai ma se ataata lapoa. O le a umi se savaliga i le fale, ae sa lagona e lona loto le fiafia ma le lotofaafetai. Pe a latou toe foi mai i le lotu taeao, o le a mamā le falesa mo tagata uma e olioli ai ma manatua Iesu Keriso. Sa fiafia o ia sa mafai ona ia fesoasoani.
Ata na tusia e Margarida Esteves