“O Le Sailia o Tusitusiga Paia,” Uo, Iuni 2024, 18–19.
O Le Sailia o Mau i Tusitusiga Paia
Pe na alofa moni ea le Tama Faalelagi ia te ia?
O lenei tala sa tupu i le ISA.
“Manuia le po, Tina.” Sa pe’a Calan i lona moega.
“Manuia le po. Ou te alofa ia te oe, ma e alofa foi le Tama Faalelagi ia te oe.” Sa fusi o ia e Tina ma tape le moli.
Sa sioa atu Calan i le taualuga. E masani lava ona ta’u atu e Tina ma Tama ia te ia e alofa le Tama Faalelagi ia te ia. Ae e moni ea? Sa le’i atoatoa Calan, ma o nisi taimi sa ia faia ai ni mea sese. Pe na alofa moni ea le Tama Faalelagi ia te ia?
Sa feliuai o ia i lona moega. Sa faaali atu e ona matua ia te ia le alofa i le tele o auala, e pei o le fusiina o ia. Ae na te le’i mauaina lava se opo mai le Tama Faalelagi. E faapefea la ona Ia lagonaina le alofa o le Tama Faalelagi?
O le aso na sosoo ai o le Aso Sa. A o faia ofu lotu o Calan, sa ia mafaufau pea pe alofa le Tama Faalelagi ia te ia. E mafai faapefea ona ia iloa lagona moni o le Tama Faalelagi e uiga ia te ia?
I le lotu, sa taumafai Calan ma lona uso ma tuafafine e nonofo filemu ma faalogologo i failauga. Sa pasi atu e Tina ni vali ma pepa ia Sierra, ma sa sii e Tama ia Jonny i ona vae.
Ae sa mafaufau pea Calan i lana fesili. Ona maua lea o sona manatu.
Sa tatala ana tusitusiga paia. Faimai Tina ma Tama na faamatala e le Tusi a Mamona mea e manao le Tama Faalelagi tatou te iloa. Atonu e mafai e le Tusi a Mamona ona tali le fesili a Calan.
Sa amata ona susue e Calan ia itulau. Sa ia vaaia fuaiupu e uiga ia Alema le Itiiti ma Samuelu le sa Lamana. Ae na te le’i vaai i ni upu e uiga i le alofa o le Tama Faalelagi.
Ina ua oo i le taimi o le Peraimeri, sa aumai e Calan lana Tusi a Mamona faatasi ma ia. Sa ia faitauina nisi fuaiupu. I le pito i tua o le Tusi a Mamona sa ia maua ai se lisi o mau e uiga i le alofa. Sa ia sueina ni fuaiupu, ae na te le’i vaai lava i se mea e uiga i le auala e alofa ai le Tama Faalelagi ia te ia.
Ona oo lea i le taimi o vasega. Na tuuina atu e Brother ma Sister Walters le taimi i le vasega e sue ai se fuaiupu i le Tusi a Mamona na lagona le taua ia i latou taitoatasi.
Sa toe tatala e Calan ana tusitusiga paia.
Na iu lava ina ia vaai i se fuaiupu na te le’i faitauina. Sa faatatau ia Nifae ina ua ia vaai i se faaaliga ma talanoa atu i se agelu.
Sa lagona e Calan le mafanafana a o ia faitauina upu a Nifae e uiga i le Tama Faalelagi. “Ua ou iloa e alofa o ia i ana fanau” (1 Nifae 11:17). Sa toe faitau e Calan le fuaiupu. Sa i ai se lagona malosi i lona loto. Sa pei o se opo lapoa. Sa alofa le Tama Faalelagi ia te ia!
Ina ua uma le Peraimeri, sa fiafia Calan e ta’u atu ia Tina mea sa ia aoaoina. “E alofa le Tama Faalelagi i Ana fanau uma. A lea e faimai sao ai lava i i, i le Tusi a Mamona,” o le tala lea a Calan. “Ma o lona uiga e alofa o Ia ia te a’u!”
Na tuu atu e Tina se opo lapoa ia te Calan. “E moni lena mea. E alofa tele le Tama Faalelagi ia te oe .”
Sa lagonaina e Calan le fiafia tele. Atonu e le mafai ona ia maua se opo mai le Tama Faalelagi, ae o le lagonaina o le Agaga Paia sa tutusa lava le lelei.
Ata na tusia e Josh Talbot