“O Fuamoa ma Pene,” Uo, Iuni 2024, 14–15.
O Fuamoa ma Pene
Sa lagona le vevela o foliga o Izzy. Tuu atu se tasi o ana pene? Sa le mafai ona ia faia!
O lenei tala sa tupu i le ISA.
Valu … iva … sefulu!
Sa tuu ma le faaeteete e Izzy le fuamoa lona 10 i lana ato. Sa totogi e Tamamatua lana pene e tasi i le fuamoa. Talu ai e 10 fuamoa, o le a maua e Izzy le 10 sene i le aso.
Sa felelei solo moa ma feotei a o felafoaiina atu a latou meaai e Izzy. Sa faaeteete o ia e tausisia le mama o lona sakete o le Aso Sa. Sa tatau ona fafagaina moa i aso uma, e oo lava i le Aso Sa. Ma sa tatau ona aoina fuamoa.
“Faafetai mo fuamoa, matuamoa!” sa fai atu ai Izzy. “Ma faafetai mo le 10 sene!”
Sa tilotilo atu Izzy i fuamoa matagofie i lana ato. E le manaomia uma e Tamamatua le 10. O le a ia tuuina atu le tele o nei fuamoa i le aiga o Izzy. Ae sa fiafia o ia e fai se fuamoa mo lana meaai o le taeao. Sa alu atu o ia i le isi itu o le fanua ma agai atu i le umukuka a Tamamatua.
“Kiliva Faapitoa!” sa valaau atu ai Izzy.
“Faafetai!” Sa ataata Tamamatua. “Ou te lagona le fiafia tele pe a e aumaia ia te a’u se fuamoa.”
Sa tuu atu e Izzy ia te ia le fuamoa sili ona tele mai le ato. “Ou te alofa ia te oe Tamamatua,” na ia fai atu ai.
Sa ta ta e Tamamatua le fuamoa i le faatausiusiuga o se falai vevela ma ta’e ai. O le lega lanu auro o le fuamoa sa taape i totonu o le falai.
“Ia tago loa e aveese au pene e 10 mai la’u fagu.” Na fusi mai e Tamamatua Izzy. “O le a ou vaai ia te oe i le lotu!”
Sa tamoe Izzy i le fale ma isi fuamoa e iva i lana ato ma ni pene iila se 10 o loo tatagi i lana taga.
Ina ua alu o ia i le Peraimeri, sa i ai lava ia Izzy ana pene i lena taimi. Sa ia tuu lona lima i lana taga e uu a o ia faalogologo i le lesona.
“O le sefuluai o le taimi lea tatou te tuuina atu ai le tasi vaesefulu o mea tatou te maua e toe foi atu ai i le Tama Faalelagi,” o le tala lea a Sister Ayala. “Afai la e 10 sene, e te tuuina atu se sene se tasi e avea ma sefuluai.”
Sa lagona le vevela o foliga o Izzy. Tuu atu se tasi o ana pene? Sa le mafai ona ia faia! Sa ia uu mau lana tupe.
“Aisea e manaomia ai e le Atua a tatou tupe?” na fesili atu ai le uo a Izzy o Jaime. “Na te le faaaogaina foi se tupe.”
Na ataata Sister Ayala. “Ae ua silafia e le Atua e manaomia tupe e totogi ai mea e pei o lenei fale lotu matagofie,” sa ia fai atu ai. “Ua Ia talosagaina i tatou e totogi le sefuluai ina ia mafai ona tatou taulimaina manaoga o le Ekalesia. Ae o le mea e sili ona taua, e finagalo o Ia e faamanuia i tatou. Afai tatou te totogiina a tatou sefuluai, ua folafola mai e le Atua ia i tatou faamanuiaga mai le lagi.”
Sa lagona e Izzy ia pene i lana taga ma mafaufau e uiga i le fuamoa a Tamamatua.
O fuamoa e mai i ana moa, ae sa na o le tasi lava na ia tausia mo ia lava. Sa matuai fiafia lava Tamamatua e aumai se fuamoa i taeao uma lea na manao ai Izzy e avatu ia te ia le fuamoa sili ona lelei. E le gata i lea, sa sili atu lona alofa ia Tamamatua nai lo fuamoa. O mea e pito silo ona taua lena.
“O lea la,” na fai lemu atu ai Izzy, “tatou te toe avatu i le Tama Faalelagi sina mea itiiti ua Ia tuuina mai ia i tatou. Ona tatou te mananao e faaali atu ia te Ia tatou te alolofa ia te Ia.
“Lena tonu lava.” Sa tuuina atu e Sister Ayala i tamaiti taitoatasi se teutusi o le sefuluai.
Sa aumai e Izzy ana pene iila e 10 ma faitauina i luga o ona vae.
Valu … iva … sefulu.
I le lagonaina o le mafanafana, na ave ai e Izzy le sene sili ona iila ma tuu i totonu o lana teutusi e avatu i le Tama Faalelagi. “Faafetai mo pene,” sa ia musumusu atu ai. “Ma faafetai mo faamanuiaga mai le lagi.”
Ata na tusia e Alyssa Petersen