O Mea e Mafai ona Tatou Tuuina Atu

Saunia e Aliya Jakeman

(E faavae i se tala moni)

“Ua tatou i ai iinei e fesoasoani e faamama ia vaito’a,” o le tala lea a Auntie Nikki.

O lenei tala sa tupu i le ISA.

“Ua tatou oo ea?” Na valu e Aliya lona vae i le mea na u ai o ia e se namu. Sa latou savavali sopo i luga o maa maugamu mo se taimi umi lava! Sa amata ona vaivai Aliya.

“Toeitiiti lava,” o le tala lea a lona faiaoga, o Auntie Nikki. “Ma talitonu mai. O le a aoga lava.”

Sa le’i mautinoa tele Aliya. Sa latou i ai i se malaga a le aoga i Kīholo, o se faasao o le natura i le Motu Tele o Hawaii. Sa fiafia Aliya e aoao e uiga i manu ma laau i lo latou motu, ae sa ia lagona le popole. Sa fou o ia i le motu, ma na te le’i iloaina le toatele o tagata. Sa matutua uma isi tamaiti, ma sa latou taliē faatasi i le savaliga sopo atoa. Sa savali filemu atu Aliya i o latou autafa. Sa manao o ia e fai sana uo, ae na te le’i iloa pe faapefea.

Na iu lava ina latou taunuu i le ana. A o latou savavali atu i luga o se maupuepue oneone, sa iloa atu ia vaito’a o loo i ai i’a .

“Susu maia i Kīholo,” o le tala lea a Auntie Nikki.

Sa tilotilo solo Aliya. Sa manaia tele iinei! Sa sa’o lava lona faiaoga—o le savaliga sopo sa matuai aoga lava.

Mo nai itula na sosoo ai, na aoao ai e Aliya ma tamaiti o lana vasega mea uma e uiga i le faasao. Sa fiafia Aliya e matamata i le i’a o aau i le vai.

“O vaito’a na faia ina ia mafai ai ona maua ni i’a ma aveesea mai le vaito’a ae tuu isi ma tutupu tetele ma malolosi. O lenei auala, e tumau ai le paleni o mea uma, ma e lava ai pea i’a i taimi uma,” o le faamalamalama mai lea a Auntie Nikki.

Ina ua mae’a le taumafataga o le aoauli, sa valaau atu Auntie Nikki i tamaiti [e o atu ] i se tasi o vaito’a e tele atu. “Ua lelei, tamaiti uma, fai ni totinilima. Ua tatou i ai iinei e fesoasoani e faamama ia vaito’a.”

“E tatau ea ona tatou faia?” na fesili atu ai se tasi o tamaitiiti o le vasega a Aliya.

“Ioe! O se vaega o le asiasi mai i Kīholo o le galulue faatasi lea e fesoasoani e tausisia le mamā. E faatatau i mea e mafai ona tatou tuuina atu,” o le tala lea a Auntie Nikki.

Sa fiafia Aliya e fesoasoani. Sa ia faamauluina ni totigilima ma amata ona piki i luga lapisi ma lala laau mai le vaito’a.

Sa savali atu se tasi o lana vasega i ona autafa. E le’i talanoa muamua ai lava Aliya ia te ia. Sa ia ofuina se ofutino lanu piniki sesega.

Sa lagona e Aliya le tata vave o lona fatu. Sa manao o ia e fai atu talofa, ae sa fefe o ia. Ae a pe a faapea le teineitiiti e ese o ia?

Ona mafaufau lea o Aliya i le tala a Auntie Nikki. E faatatau i mea e mafai ona tatou tuuina atu. Sa manava loloa Aliya ma ataata. “Talofa,” o lona tala lea. “Ou te fiafia i lou ofutino.”

Sa ataata mai le teineitiiti. “Faafetai! O a’u o Zoe.”

“O lo’u igoa o Aliya.”

Sa faaalu e teineiti le aso atoa e talatalanoa ai ma talie a o la aoina mai ni fasi palasitika ma pepa sa tuua i vaituloto. O le tele lava o le iloa e Aliya o Zoe, o le tele foi lea o le fiafia na ia lagonaina. O Zoe e ese le lelei.

I le faaiuga o le aso, sa faia ai e le faiaoga se afi e nonofo faataamilomilo ai tamaiti. Sa tiga maso o Aliya mai le faamamaina o vaito’a.

“Aliya, sau ii. E tatau ona e vaai i le mea lenei!” Sa tamoe atu Zoe ia te ia, ma talotalo atu ona lima mo Aliya e mulimuli atu. Sa mulimuli Aliya ia Zoe i se alalaupapa na kolosi i luga o vaito’a.

I lalo o le alalaupapa, sa nofo ai se laumei tele i le vai manino. O laumei laiti sa feausi ma pasi ane ai.

Sa ataata Aliya. Sa matagofie! Sa tutu i laua ma Zoe i luga o le alalaupapa, i autafa o le isi itu, ma sa lagona e Aliya le toafilemu. O le faamamaina o vaito’a sa faigata, ae o lea ua mafai nei ona ola saogalemu nei manu i lo latou apitaga.

Sa tilotilo atu Aliya ia Zoe. Ua i ai foi sana uo fou i le taimi nei, ona sa lava lona lototele e faatalofa atu ai. Sa faia e Aliya se tatalo puupuu i lona loto. Faafetai i Lau Afio, le Tama Faalelagi, mo lenei lalolagi matagofie ma mo la’u uo fou. Faafetai i Lau Afio mo le fesoasoani mai ia te a’u e taulai atu i mea e mafai ona ou tuuina atu.

Ata tusi na saunia e Melissa Manwill Kashiwagi