O Gaoioiga o le Sau, Mulimuli Mai ia te A’u

Mo afiafi faaleaiga po o le suesueina o tusitusiga paia—pe tau lava o se mea manaia!

27 Me–2 Iuni

Valivaliga Agalelei o le Atua

Mo le Mosaea 25–28

Na faitau e le Tupu o Mosaea tala i lona nuu e uiga i le ala na faamanuiaina ai e le Atua le nuu o Alema. Ina ua latou faalogo i tala, sa latou mafaufau e uiga i le “vave o le agalelei o le Atua” (Mosaea 25:10). Fesili i ou matua ma matua o matua e uiga i le auala na agalelei ai le Atua i lou aiga. Tusi ni ata o tala e sili ona e fiafia i ai e te faalogo i ai.

Mo tamaiti laiti: Fai le itulau valivali i le itulau e 48. A o e valivali, talanoa e uiga i auala e mafai ona tatou lagonaina ai le alofa o le Tama Faalelagi ma Iesu Keriso.

3–9 Iuni

Faailogatusi o le Papatisoga

Mo le Mosaea 29–Alema 4

Sa papatiosina e Alema ni tagata e toatele Ina ua papatisoina i latou, sa latou auai i le Ekalesia a le Atua (Alema 4:5). Fai se faailogatusi o le papatisoga! Oti ese se fasi pepa faatafafa laumiumi. Tusi se ata o se tagata o papatiso i le tasi itu. I le isi itu, tusi i lalo fuaiupu o mau e te maua e aoao mai ai e uiga i le papatisoga. Faaaoga lau faailogatusi o le papatisoga mo lau faitauga o tusitusiga paia.

Mo tamaiti laiti: Usu pe faalogologo i le pese “Papatisoga” (Tusipese a Tamaiti, 54). O taimi uma lava e te faalogo ai i upu “papatisoga” po o le “Iesu,” tu i luga.

10–16 Iuni

Taaloga Tuli a le Leoleo Mamoe

Mo le Alema 5–7

O Iesu Keriso o le Leoleo Mamoe Lelei, ma e finagalo o Ia ia tatou o mai ia te Ia (tagai i le Alema 5:38). Taaalo i se taaloga o le tuli a le leoleo mamoe! O le tagata o le a pa’i atu i ai ma faapea atu “ua e pe”, o ia lea o le leoleo mamoe e aoina mai mamoe. Pe a pa’i atu le leoleo mamoe i se tasi, latou te mulimuli i le leoleo mamoe. A uma loa ona pa’i atu le leoleo mamoe i tagata uma, toe taaalo ma se leoleo mamoe fou!

Mo tamaiti laiti: O Iesu e pei o se leoleo mamoe, ma Na te valaauina i tatou e o mai ia te Ia. Tuu atu i se tasi e lafi ma valaau atu i le igoa o se tamaitiiti. Ona tuu lea i lau tamaitiiti e sue i latou.

17–23 Iuni

Pepese Televave

Mo le Alema 8–12

Ina ua ta’u atu e se agelu ia Alema e alu e aoao le nuu, sa “vave” ona alu Alema (Alema 8:18). Talanoa pe mafai faapefea ona e mulimuli vave i nei poloaiga. Usu le “Filifili Le Ala Sa’o” (Tusipese a Tamaiti,, 82). O le taimi muamua, usu lemu le pese. Ona toe usuina lea, televave ma televave atu. O le a le televave e mafai ona e usuina ai?

Mo tamaiti laiti: Tuu atu i lau fanau laiti se faatinoga faigofie e fai, e pei o le osooso, pa’i i o latou tamaivae, po o le fealuai solo. Valaaulia i latou e taumafai ia vave ma televave atu le faia o le faatinoga. Ona talanoa lea e uiga i le auala e mafai ona tatou vave ai e mulimuli i le Atua.

24–30 Iuni

O Tala a Tusitusiga Paia

Mo le Alema 13–16

Na aoao e Alema ma Amoleka ia tagata ia vaai atu ia Iesu Keriso ma salamo (Alema 13:16). Faitau le tala o loo i le itulau e 26 e aoao atili ai e uiga ia Alema ma Amoleka. Na faapefea ona fesoasoani le Atua ia i latou? E faapefea ona Ia fesoasoani ia te oe?

Mo tamaiti laiti: Vaai i le atavali o Iesu Keriso i le itulau e 49. Talanoa pe faape’i le vaai ia te Ia!

O ata na tusia e Katy Dockrill