“Joes blong Sandei,” Fren, Julae 2024, 4–5.
Joes blong Sandei
“?Wanem ia sakramen?” Anita i askem.
Stori i tekem ples long Aeslan.
“!Antap moa!” Evolett i talem long fren blong hem Anita. Tufala i stap luk hamas tufala i save jiam i go antap long trampolin blong Evolett.
Stret long taem ia, Anita i jiam antap tumas. Taem ol leg blong hem i stanap bakegen long trampolin, !i mekem Evolett i flae i go antap! Tugeta gel i foldaon long trampolin. Tufala i laf.
“Hemia i naes tumas,” Anita i talem. “?Yumi save pleplei tumoro tu?”
Evolett i tanem hem mo silip long bak blong hem. “!Yes! Bae mi wantem tumas.”
“Yumi save pleiplei long haos blong apu woman blong mi.” Apu woman blong Anita i stap kolosap long haos blong Evolett.
Afta Evolett i tingbaot se nekis dei hem i Sandei. Hem i wantem blong go long Praemeri. Bae i wan gud taem blong pleiplei wetem Anita, be hem i wantem mekem wan gudfala joes.
“Mi jes tingbaot se mi no save kam pleiplei,” Evolett i talem. “Mi sori. Bae mi go long jos wetem famli blong mi tumoro.”
Anita i stanap mo jiam bakegen. “?From wanem?”
Evolett i stat blong jiam tu. “Mi wantem blong folem Jisas Kraes. Famli blong mi i stap go long jos evri Sandei blong lanem abaot Hem mo tekem sakramen.”
“?Wanem ia sakramen?” Anita i askem.
“Hemia taem mifala i kakae wan smol pis bred mo drink wan smol kap blong wota blong tingbaot Jisas Kraes,” Evolett i talem. “Afta ol pipol oli tokbaot olsem wanem Jisas i stap helpem olgeta. Mo afta long hemia, !i gat wan spesel klas blong ol pikinini!”
“!Hemia i naes tumas!” Anita i talem. “?Mi save kam?”
“!Yes!” Evolett i smael.
Anita i ron i go long haos blong askem apu woman blong hem sapos hem i save go long jos wetem Evolett. Long nekis moning, Evolett mo famli blong hem i pikimap Anita taem oli stap go long jos.
Taem oli kasem jos, Evolett i soem ples long Anita. Hem i soem Praemeri rum, ples blong plei basketbol, mo japel long Anita.
Kolosap hem i taem blong sakramen miting. Evolett mo Anita i sidaon tugeta. Evolett i traem blong tingbaot Jisas Kraes long taem blong sakramen. Oli lisin long ol toktok.
!Hem i taem blong go long Praemeri! Evolett i introdiusum Anita long sam long ol fren blong hem.
“Hemia fren blong mi Anita,” Evolett i talem.
“Mifala i glad tumas se yu kam tedei. Mi mi Sista Magnusson,” Praemeri tija i talem.
Taem Evolett mo Anita i stap lisin long lesen abaot Jisas Kraes, Evolett i filim hapi insaed long hem. Hem i laekem blong stap long jos wetem Anita. Hem i tanem hem mo smael long Anita. Fren blong hem i smael i kambak.
“Tangkyu blong invaetem mi,” Anita i talem taem oli stap gobak long haos.
Evolett i hapi se hem bin save folem Jisas Kraes. Mo hem i glad se Anita i wantem blong lanem abaot Hem tu.
Hem i naes blong jiam long trampolin mo flae long ea, be wom filing we Evolett i filim insaed long hem, i moa gud.
Ol pikja droing oli kam long Fiona Powers