“Skripja Tieta,” Fren, Julae 2024, 14–15.
Skripja Tieta
“?Olsem wanem sapos yumi openem Sandei bokis?” Jonny i askem.
Stori ia i hapen long YSA.
“Mi les blong stap nating.” Jonny i stap silip long floa blong siting rum.
Sista blong hem Jenna i stap lukluk aotsaed long windo. “I nogat samting blong mekem,” hem i talem.
Jonny i lukluk antap long siling. ?From wanem i filim olsem se ol Sandei oli no naes tumas?
Afta, hem i tingbaot wan samting. “?Olsem wanem sapos yumi openem Sandei bokis?” Jonny i askem. Sandei bokis hem i wan spesel bokis we i fulap long ol gem blong pleiplei long hem long Sandei.
Fes blong Jenna i hapi wetem wan smael. “!Hemia i naes blong mekem!”
Jonny mo Jenna i spid i go long rum blong Mama. Tufala i pulumaot wan bigfala bokis i go long siting rum.
“?Bae yumi mekem wanem faswan?” Jonny i askem. Hem i openem bokis mo karemaot sam pikja buk mo wan gem blong kad.
“Yumi plei gem blong faenem ol pikja blong ol skripja hiro we oli semsemmak,” Jenna i talem.
Gem ia i gat ol kad we oli gat ol pikja blong ol profet blong Buk blong Momon. Jenna i putum ol kad daon mo i fesem floa. Tufala i plei wan afta narawan blong stap pikimap ol kad mo traem blong faenem ol pikja we oli semsemmak.
Jonny i pikimap tu defren kad we Kapten Moronae i stap long hem. “!Mi faenem semsemmak wan!” hem i singaot.
“!Mi tu!” Jenna i soem tu kad we i gat pikja blong Saraea long hem.
Jonny mo Jenna i plei sam moa raon. Hem i wan gud taem blong tingbaot ol fevret stori blong olgeta long Buk blong Momon.
Afta long sam taem, Jenna i talem, “Yumitu mekem wan nara samting.”
“Okei. Yumitu aktem wan long ol fevret skripja stori blong yumi. !Bae yumitu gat wan skripja tieta!” Jonny i stat blong pikimap ol kad.
“!Yes!” Jenna i help blong pikimap gem blong tufala mo putumbak.
Jonny i lukaot ol samting insaed long bokis kasem taem hem i faenem sam klos blong aktem stori. Hem i karemaot wan braon kaliko dres mo i werem. “!Mi mi Samuel, wan Man blong Leman!” Hem i jiam i go antap long wan jea mo aktem Samuel we i stap tij antap long wol blong siti.
Jenna i openem pikja buk blong Buk blong Momon. Hem i lukluk tru long ol pej kasem taem hem i kasem stori blong Samuel, wan Man blong Leman. Hem i ridim stori laod mo Jonny i aktemaot stori.
Tufala pikinini i praktisim stori sam moa taem. Jonny i filim wom mo hapi insaed long hem. I filim gud blong tingbaot ol profet we oli bin tijim abaot Jisas Kraes.
Taem tufala i filim se tufala i redi, Jonny i ron go long Mama, Papa, mo smol sista blong olgeta, Makenna. “!Kam mo luk pleiplei blong mitufala!”
Jenna i stanap long medel blong rum mo i openem ol han blong hem. “Welkam long skripja tieta blong mifala. Tedei bae mitufala i presentem stori blong Samuel, wan Man blong Leman!”
Afta hem i statem stori. “Long taem bifo, i gat wan profet we nem blong hem Samuel, i bin kam blong tijim Ol Man blong Nifae”
Taem we hem i taem blong Jonny, hem i stanap antap long wan jea. Hem i toktok long wan laod voes. “Mi mi Samuel, mo Papa long Heven i wantem yufala blong mekem ol gudfala joes. Stop blong mekem ol nogud samting. From se long faef yia taem, bae Jisas Kraes i bon i kam long wol.”
“Paoa blong God i bin stap wetem Samuel,” Jenna i talem. Hem i finisim blong ridim flatem haf stori. Taem tufala i finis, Mama, Papa, mo Makenna oli klap.
“!I naes tumas!” Mama i talem.
Jonny mo Jenna i bo daon. Tufala i smael bigwan.
“Bae yumitu aktem wan moa stori,” Jonny i talem.
“Bae mifala i laekem blong luk wan nara wan moa,” Mama i talem. Makenna i klap mo smael.
Jenna mo Jonny i spid i gobak long Sandei bokis blong karem sam moa klos blong aktem stori.
“!Sandei i wan gud taem! Mi laekem blong lanem abaot ol skripja,” Jenna i talem.
“Mo Jisas.” Jonny i smael taem hem i faenem wan moa klos blong aktem stori. !Sandei i wan spesel dei tru!
Ol pikja oli kam long Shawna J. C. Tenney