“Ol Bigfala Noes mo Ol Naes Kala,” Fren, Julae 2024, 10–11.
Ol Bigfala Noes mo Ol Naes Kala
“?From wanem Papa long Heven i no mekem ol laod noes ia i gowe?” Charlotte i askem.
Stori ia i hapen long YSA.
!Charlotte i no laekem nating ol laod noes! Hem i no laekem taem noes i faerap strong long sora blong hem o taem i hem i filim ol noes ia long hed blong hem. Nomata sapos hem i save se hem i sef, hem i stil filim nogud taem ol wil blong trak oli krae, ol bigfala grup blong pipol oli singsingaot, o taem ol dram oli faerap.
Mo Charlotte i !rili no laekem ol faeawok!
Famli blong hem i bin traem fulap samting blong kamfotem hem taem i gat ol laod noes. Papa i pem ol spesel hedfon blong kavremap sora blong hem blong help blong blokem noes. Taem tanda i stap faerap, Mama i haed wetem hem andanit long blangket. Charlotte tu i prea from help blong hem i no fraet.
Evri samting ia oli help. Be ol laod noes ia oli gohed blong mekem hem i fraet.
“Bae yumi go long wan spesel faeawok so tedei long naet long pak,” Mama i talem long Charlotte. “?Yu wantem kam?”
Charlotte i mekem fes blong hem i nogud. “Be ol faeawok oli laod tumas.”
“Naoia we yu moa bigwan, maet bae yu laekem blong wajem faeawok,” Mama i talem. “Evri fren blong yu bae oli stap long we. Yumi save karem ol spesel hedfon blong yu. ?Yu ting se yu save traem?”
Charlotte i pulum longfala win. “Okei. Ating bae mi traem.”
Faeawok so long pak i stat gud we. Charlotte mo ol fren blong hem oli ronron olbaot long gras, oli serem ol swit kaekae mo pleiplei ol gem. I no longtaem, skae i stap go tudak. Charlotte i sidaon mo karem spesel hedfon blong hem mo stap lukluk skae wetem fraet.
!BUM! !BUM! !KRAK!
Hat blong Charlotte i pam kwik moa, mo hem i filim jes blong hem i taet. Hem i jiam i go antap mo traem blong ronwe long ol laod noes raon long hem.
Mama i ron biaen long Charlotte mo karem hem. Tufala i sidaon bakegen, mo Mama i haggem hem strong. Wota blong ae blong Charlotte i ron long fes blong hem.
“Mi sori se hemia i mekem yu fraet,” Mama i talem. “Mi stap ia. Bae yumitu lukluk gud ol kala blong mekem se yu no luksave tumas ol noes. ?Yu luk wanem wetem ol ae blong yu?”
Charlotte i pulum bigfala win. “Mi luk gol, mo red, mo grin.”
“Naoia yusum nus blong yu,” Mama i talem. “?Yu smelem wanem?”
“Mi save smelem smok mo gras,” Charlotte i talem. “!Mo popkon!”
“?Wanem ol nara pat blong bodi we yu save yusum naoia?”
Charlotte i sarem ae blong hem. “Mi save filim olgeta. Taem faeawok i stap posta, mi save filim jes blong mi i seksek.”
“?Yu save testem eni samting?” Mama i askem.
Charlotte i pusumaot tang blong hem. “Mi no save testem ol faeawok.” Hem i laf.
Evri samting ia i mekem Charlotte i wantem save moa. ?Hao nao ol pipol oli stap mekem ol defren kala? hem i askem hemwan. ?From wanem ol faeawok oli stap posta? ?Olsem wanem nao oli stap mekem ol defren sep? I luk olsem ol faeawok i nomo mekem hem i fraet tumas nao.
“!Mama, ol faeawok oli naes tumas!” Charlotte i talem.
Taem Mama i mekem Charlotte i silip long bed long naet, Charlotte i askem, “?From wanem Papa long Heven i no stap ansarem ol prea blong mi taem mi askem Hem blong mekem ol laod noes i gowe?”
Mama i tingting blong wan smoltaem. “I no oltaem we Papa long Heven i stap karemaot ol samting we i mekem yumi fraet,” hem i talem. “Be samtaem Hem i helpem yumi blong luk ol samting long wan defren wei, o i givim ol pipol long yumi blong help blong kamfotem yumi.”
“!Olsem we Hem i bin helpem mi tedei long naet!” Charlotte i talem.
“Yes. !Hemia nao!” Mama i smael. “Yu bin go long so blong faeawok nomata se yu bin fraet. Afta Papa long Heven i bin helpem yu blong mekem yu no fraet. Hem i bin helpem yu tu blong luk hamas faeawok i naes taem yu yusum ol pat blong bodi blong yu blong filim samting.”
Charlotte i tingting long ol naes kala long skae mo i smael. Hem i no laekem ol laod noes yet. Oli mekem hem i fraet yet. Be hem i save se Papa long Heven oltaem i save helpem hem blong hem i no fraet.
Ol pikja droing oli kam long Adam Howling