Stap Visitim Apu Woman mo Apu Man

I kam long Alelie Camitan-Coronel

(I kamaot long wan tru stori)

Ernesto i wantem blong serem wanem hem i bin lanem long Praemeri.

Stori ia i hapen long Indonesia.

Ernesto i putum wan nara set long basket blong hem. Hem i lukluk raon long rum. ?Hem i nidim blong karem wanem moa? Hem i luk Buk blong Momon i stap long tebol. !Hem i no save fogetem hemia!

Hem i taem blong spel long sama. Famli blong Ernesto bae i go visitim Apu Woman mo Apu Man. Hem i glad tumas blong go luk apu man mo apu woman blong hem.

Boe mo papa mo mama oli stap talem halo long apu woman mo apu man

Taem Ernesto mo famli blong hem oli kam, Apu Man i givim wan bigfala hag long hem. “!Mi glad tumas se yu stap ia!”

“!Mifala i misim yu!” Apu Woman i smael mo i haggem Ernesto tu.

“Mi bin stap wet mo wet from dei blong tedei. Mifala i laekem blong kam visit,” Ernesto i talem.

“Yumi go insaed,” Apu Man i talem. “Apu Woman bae i mekem evri fevret kaekae blong yu.”

Ernesto i wokbaot i go insaed long haos wetem Apu Woman mo Apu Man. Hem i glad tumas blong spendem taem wetem tufala.

Long nekis moning, Ernesto i wekap mo smelem raes we oli stap kukum. Hem i faenem Mama mo Apu Woman we tufala i stap bisi long kijin. Hem i kisim jik blong tufala tugeta. Afta hem i ron i go aotsaed, long yad.

Papa mo Apu Man oli stap sidaon mo toktok aotsaed mo stap drink long kap.

“Gud moning. ?Yu wantem sam ti?” Apu Man i pusum kap blong hem i go long Ernesto.

Ernesto i lukluk kap blong ti afta i lukluk Apu Man. Hem i wantem blong serem wanem we hem i bin lanem long Praemeri. “No, tangkyu Apu Man,” hem i talem. “Mi lanem long jos blong mi se ti, kofi, mo tabak, oli no gud blong bodi blong yumi. Mi wantem folem wanem we Jisas i wantem mi blong mekem.”

Papa i smael. “Famli blong mifala i obei long Tok blong Waes, be Apu Man i biliv i defren, mo hem ia i oraet.”

“Tangkyu blong serem wanem we yu biliv long hem,” Apu Man i talem long Ernesto. “Yu yu wan gud boe. Yu save gat sam hot wota olsem papa blong yu.” Apu Man i kasem wan kap blong wota blong Ernesto long ketel.

Ernesto i drink smol. Hem i filim hapi insaed from hem i jusum raet.

Long lanj, Ernesto i kakae ol fevret kaekae blong hem. Apu Woman i mekem nasi goreng, wan kaekae we i gat raes, eg, mit, mo ol vejetebol. I tes naes tumas. Mo Ernesto i laekem blong toktok long Apu Woman mo Apu Man taem oli stap kakae.

Plet wetem raes mo eg

Long aftenun, famli i plei haed tugeta. !Apu Man mo Apu Woman tu i plei!

“!Mi luk yu biaen long tri ia, Ernesto!” Papa i singaot mo i resis i go long hem. Ernesto i laf mo i traem blong ronwe. I wan gud taem blong stap pleiplei wetem famli blong hem.

Long naet, evriwan i sidaon raon long Apu Man taem hem i stap talem sam stori. Taem Apu Man i finis, Ernesto i tingbaot se oli no bin ridim ol skripja.

Ernesto i jiam i stanap. “Bae mi kambak.”

Hem i ron i go mo karem Buk blong Momon blong hem. Taem hem i kambak, hem i askem, “?Yumi save rid?”

“Mi glad se yu tingbaot.” Mama i karem buk long Ernesto mo i tanem i go long fevret ves blong hem. Hem i ridim laod. Afta olgeta evriwan oli nildaon.

“?Yutufala i wantem prea wetem mifala?” Ernesto i askem long apu man mo woman blong hem.

“Yes, bae i naes blong mekem hemia,” Apu Woman i talem. Hem i nildaon narasaed long Apu Man.

Famli i stap ridim Buk blong Momon tugeta

Papa i talem prea. Hem i talem tangkyu long Papa long Heven se oli save spendem taem tugeta olsem wan famli.

Afta long prea, Apu Man i haggem Ernesto. “Hem i gud se famli blong yu i stap prea,” hem i talem. “Mi glad se yu wantem stap kolosap long God. Bae i helpem famli blong yu blong stap strong.”

Ernesto i filim wom mo pis insaed long hem. Hem i laekem blong serem ol bilif blong hem—wan samting we hem i laekem—wetem Apu Woman mo Apu Man—ol pipol we hem i lavem.

Stori PDF

Ol pikja droing oli kam long Melissa Manwill Kashiwagi