“Raina I Traem Bakegen,” Fren, Julae 2024, 36–37.
Raina I Traem Bakegen
“Hemia i las taem we bae mi traem wan niu samting bakegen,” Raina i talem.
Stori ia i hapen long YSA.
Raina i ridim ol toktok long posta long skul blong hem bakegen. Kompetisen blong Raetem Sot Stori: !Winim wan fri trip i go long Niu Yok Siti!
Hem i wan kompetisen blong ol studen long plante skul long eria ia. Raina i pikjarem hemwan long Niu Yok Siti, wetem ol longlongfala bilding raon long hem mo Ston blong Libeti kolosap. !Hem i wantem blong go!
“Yu sud traem,” Sydney i talem. “!Yu yu bes wan blong stap raet long klas blong yumi!”
Ol toktok blong Sydney i mekem Raina i filim gud. Hem i no save fulap samting abaot fasin blong stap raetem ol sot stori. Be hem i wantem blong traem.
Afta long skul, Raina i sidaon long tebol blong hem. Tap, tap, tap. Hem i kilkilim pensel blong hem long pepa taem hem i stap tingting long ol aedia blong hem. Long en, hem i stat blong raet.
I tekem wan ful wik blong Raina i finisim. Be wetem sam help blong Mama, hem i filim se hem i redi blong givim raeting blong hem i go.
Sam wik i pas. Raina i wantem tumas blong luk huia i win. !Maet bae hem i stap go long Niu Yok i no longtaem!
“Ova long wan handred studen oli bin tekpat,” Mista Wright i talem long fored blong klasrum. “Tangkyu long yufala evriwan we i bin raetem wan sot stori.”
Hat blong Raina i stap pam from glad.
“Nomata we nogat wan long ol studen blong yumi i bin winim kompetisen, Raina i bin stap long ol top 5 blong olgeta we oli tekpat. Kongratulesen, Raina,” Mista Wright i talem.
Raina i smael taem ol fren blong hem long klas oli klap. Be insaed, fes blong hem i nogud. Blong stap long top 5 i no gud semmak long blong win. Drim blong hem blong luk Niu Yok i nomo gat.
Taem Raina i kasem haos, hem i sidaon long wan jea long kijin narasaed long papa mo mama blong hem. “Mi lus long kompetisen,” hem i talem. “Hemia i las taem we bae mi traem wan niu samting bakegen. Bae mi mekem nomo wanem we mi save se mi gud long hem.” Hem i kavremap hed blong hem wetem ol han blong hem.
“Mi sori se yu no bin win. Mama mo mi, mitufala i glad tumas long yu blong traem,” Papa i talem. Hem i sidaon narasaed long Raina. “?Yu tingbaot long sam yia i pas, mi nogat wok?”
Raina i sakem hed blong hem blong talem yes.
“Mi bin aplae from fulap wok mo nogat wan i tekem mi,” Papa i talem. “Mi filim se tingting blong mi i stap foldaon.”
Raina i leftemap hed blong hem. “?Tru?”
Papa i saksakem hed blong agri. “Be mi no stop. Afta long wan longfala taem, mi faenem wan wok we i stret gud evriwan. Be bae i no save hapen sapos mi bin stop blong stap traem.”
Mama i putum han blong hem long bak blong Raina. “?Yu save hamas stori mi stap sendem i go long ol defren magasin?” hem i askem. “?Mo hamas oli no akseptem? Be mi no save stop nomo sapos mi wantem blong luk oli pablisim wok blong mi. Blong stap raet i impoten long mi, mekem se mi gohed blong traem.”
Oltaem Raina i bin tingting se papa mo mama blong hem oli gud long evri samting we tufala i mekem. Hem i neva save se oli no bin stap akseptem tufala tu samtaem.
Hem i harem nogud yet, be i krangke smol blong nomo wantem traem wan niu samting bakegen. Hemia i no wanem we Papa long Heven i wantem blong hem. Raina i disaed se bae hem i no stop. Hem i save traem sam moa samting, iven ol samting we hem i no gud long hem kwiktaem.
“Mi ting se bae mi tekpat long kompetisen bakegen nekis yia,” Raina i talem. Blong lusum kompetisen i no minim se bae hem i en blong ol drim blong hem.
Raina i gobak long tebol blong hem mo pikimap pensel blong hem. Blong stap raet i bin wan gud taem. Tap, tap, tap. ?So, wanem wan niu samting bakegen we hem i save raetem nekis wan?
Ol pikja droing oli kam long Vivian Mineker